ເພື່ອເປັນການສະເຫຼີມສະຫຼອງການເຕີບໃຫຍ່ຂະ ຫຍາຍຕົວ ຂອງສະຫະພັນກຳມະບານລາວຢ່າງເລິກເຊິ່ງ, ກ້ວາງຂວາງທົ່ວສະມາຊິກກຳມະບານ, ຊົນຊັ້ນກຳມະກອນ ແລະ ຜູ້ອອກແຮງງານລາວບັນດາເຜົ່າ, ສູນກາງສະຫະພັນກຳມະບານລາວ ໄດ້ຄົ້ນຄວ້າ ແລະ ປັບປຸງເນື້ອໃນເອກະສານມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນກຳມະບານລາວ, ຊຶ່ງໄດ້ຕີລາຄາຄືນທາດແທ້, ຜົນງານອັນພົ້ນເດັ່ນໃນການເຄື່ອນໄຫວ ແລະ ປະກອບສ່ວນໃນພາລະກິດປະຕິວັດຊາດ, ປະຊາທິປະໄຕ, ປົກປັກຮັກສາ ແລະ ພັດທະນາປະເທດຊາດຂອງສະຫະພັນກຳມະບານລາວຜ່ານມາ.
ຕອນເຊົ້າຂອງວັນພະຫັດ, ວັນທີ 1 ກຸມພາ 2024, ຢູ່ທີ່ຫ້ອງປະຊຸມສະພາປະຊາຊົນແຂວງ, ກໍາມະບານຮາກຖານສະພາປະຊາຊົນແຂວງ ໄດ້ຈັດຕັ້ງເຜີຍແຜ່ເອກະສານມູນເຊື້ອວັນສ້າງຕັ້ງສະຫະພັນກໍາມະບານລາວ ຄົບຮອບ 68(1 ກຸມພາ 1956-1 ກຸມພາ 2024), ໂດຍການເປັນປະທານຂອງສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກໍາມະບານແຂວງ, ປະທານສະຫະພັນກໍາມະບານຮາກຖານ ສພຂ, ມີຄະນະກໍາມະບານ, ບັນດາສະຫາຍສະມາຊິກກໍາມະບານພາຍໃນ ສພຂ ເຂົ້າຮ່ວມຢ່າງພ້ອມພຽງ. 
ພິທີ, ສະຫາຍ ນ. ຄໍາພອນ ພິມມະຈັນ ຄະນະບໍລິຫານງານສະຫະພັນກໍາມະບານແຂວງ, ປະທານສະຫະພັນກໍາມະບານຮາກຖານ ສພຂ, ໄດ້ເຜີຍແຜ່ມູນເຊື້ອການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງກໍາມະບານລາວ, ຜົນງານທີ່ພົ້ນເດັ່ນໃນໄລຍະຜ່ານມາ ແລະ ອື່ນໆ. ພ້ອມນັ້ນ, ໄດ້ເນັ້ນໜັກໃຫ້ສະມາຊິກກໍາມະບານ, ເອົາໃຈໃສ່ເພີ່ມທະວີປັບປຸງການຈັດຕັ້ງສະຫະພັນກຳມະບານຂັ້ນຂອງຕົນໃຫ້ມີຄວາມເຂັ້ມແຂງ, ເສີມຂະຫຍາຍຫົວຄິດປະດິດສ້າງໃນການຈັດຕັ້ງປະຕິບັດພາລະບົດບາດ, ໜ້າທີ່ຂອງຕົນ, ເອົາໃຈໃສ່ເພີ່ມທະວີບໍາລຸງ, ກໍ່ສ້າງ, ຍົກລະດັບຄວາມຮູ້, ຄວາມສາມາດກ່ຽວກັບວຽກງານກຳມະບານ, ຄວາມຮູ້ວິທະຍາສາດອື່ນໆ ແລະ ເອົາໃຈໃສ່ຝຶກຝົນຫຼໍ່ຫຼອມຕົນເອງ, ສ້າງແບບແຜນດຳລົງຊີວິດທີ່ປອດໄສ ແລະ ຮ່ຳຮຽນຄຸນລັກສະນະດີເລີດຂອງຊົນຊັ້ນກຳມະກອນ ແລະ ໄດ້ຮັບຟັງການເຜີຍແຜ່ມະຕິກອງປະຊຸມຄົບຄະນະກາງສະໄໝຄະນະບໍລິຫານງານສູນກາງສະຫະພັນກໍາມະບານລາວສະ ໄໝທີ VIII.
ພ້ອມນັ້ນ, ໄດ້ຮັບຟັງການຜ່ານຮ່າງບົດສະຫຼຸບປະຈໍາເດືອນ ມັງກອນ, ທິດທາງແຜນການເດືອນ ກຸມພາ 2024, ຫລັງຈາກນັ້ນໄດ້ປະກອບຄໍາຄຶດຄໍາເຫັນຕໍ່ຮ່າງບົດສະຫລຸບ ແລະ ຖືເອົາໂອກາດດັ່ງກ່າວ ສຶກສາອົບຮົມດ້ານການເມືອງ-ແນວຄິດ, ຕໍານິສົ່ງຂ່າວເຊິ່ງກັນ ແລະ ກັນ ເພື່ອເຮັດໃຫ້ສະມາຊິກກຳມະບານມີແນວຄິດອຸ່ນອ່ຽນທຸ່ນທ່ຽງ, ມີຄວາມສາມັກຄີພາຍໃນ-ພາຍນອກໃຫ້ແໜ້ນແຟ້ນ, ຊ່ວຍເຫຼືອເຊິ່ງກັນ ແລະ ກັນ, ມີຄວາມຫ້າວຫັນປະຕິບັດໜ້າທີວຽກງານວິຊາສະເພາະ ສຳເລັດຜົນຕາມລະດັບຄາດໝາຍທີ່ວາງໄວ້.
ພາບ/ຂ່າວ: ສະພາປະຊາຊົນແຂວງ.