ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ລະຫວ່າງວັນທີ​ 9-12​ ມີນາ​ 2022,ສະມາຊິກສະພາປະຊາຊົນແຂວງ​ (ສສຂ)​ ປະຈຳເຂດເລືອກຕັ້ງ​ເມືອງພູວົງ.​ນຳໂດຍ​ ທ່ານ​ ຄຳ​ໃບ​ ແກ້ວມະນີ​ ຫົວໜ້າ​ຄະນະ​ ສສຂ​ ເຂດເລືອກຕັ້ງເມືອງພູວົງ ປະທານກວດກາພັກລັດເມືອງ ພ້ອມຄະນະ​ ສສຂ​ ແລະ​ ວີຊາການ​ຕິດຕາມ​ ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະ​ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 2​ ຂອງສະພາປະຊາຊົນແຂວງ​ ຊຸດທີ​ II.​ ຢູ່​ 4​ ບ້ານຄື: ບ້ານ ພູໄຊ,​ ບ້ານ ພູຍາງ,​ ບ້ານ ນໍ້າຊວນ ແລະ ບ້ານ ພູເກືອ ໄດ້ສຳເລັດຕາມຄາດໝາຍທີ່ວ່າງໄວ້.​ມີຄະນະພັກ,​ອໍານາດການປົກຄອງບ້ານ ແລະພໍ່-ແມ່ປະຊາຊົນຜູ້ມີສິດເລືອກຕັ້ງທັງ 4 ບ້ານ ໄດ້ເຂົ້າຮ່ວມທັງໝົດ 210 ຄົນ,​ ຍິງ 116 ຄົນ.


ຕະຫລອດໄລຍະການເຄື່ອນໄຫວ ສສຂ​ ເຂດເລືອກຕັ້ງເມືອງພູວົງ ໄດ້ນຳເອົາເນື້ອໃນມະຕິສຳຄັນທີ່ໄດ້ຮັບຮອງໃນກອງປະຊຸມສະພາປະຊາຊົນແຂວງ ເປັນຕົ້ນ:ເນື້ອໃນມະຕິກອງປະຊຸມ ສພຂ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII, ການຈັດຕັ້ງປະຕິບັດແຜນງົບປະມານແຫ່ງລັດ 5 ປີ (2016-2020) ແລະ ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX, ແຜນງົບປະມານແຫ່ງລັດ 5 ປີ(2021-2025); ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງປະຈໍາປີ 2021 ແລະ ທິດທາງແຜນການປະຈໍາປີ 2022 ຂອງແຂວງອັດຕະປື; ນິຕິກຳຈໍານວນ 02 ສະບັບ.(1) ແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມແບບຮອບດ້ານຂອງແຂວງອັດຕະປື; (2) ຂໍ້ຕົກລົງ ຂອງທ່ານເຈົ້າ ແຂວງ ວ່າດ້ວຍກອງທຶນຊ່ວຍເຫຼືອເຊີ່ງກັນ ແລະ ກັນ ຂອງສະຫະພັນກຳມະບານແຂວງອັດຕະປື.
ພ້ອມທັງໄດ້ໂອ້ລົມຕໍ່ພະນັກງານ-ລັດຖະກອນຄະນະພັກ, ອໍານາດການປົກຄອງບ້ານ, ຕະຫຼອດຮອດພໍ່ແມ່ປະຊາຊົນຜູ້ມີສິດເລືອກຕັ້ງ ໃຫ້ສືບຕໍ່ຮັກສາສະຖຽນລະພາບທາງດ້ານການເມືອງຢ່າງໜັກແໜ້ນ, ເພີ່ມທະວີຄວາມສາມັກຄີປອງດອງ, ມີປະຊາທິປະໄຕ ແລະ ມີຄວາມສະເໝີພາບຕໍ່ແນວທາງຂອງພັກ, ລະບຽບກົດໝາຍຂອງລັດ, ອະນຸລັກຮັກສາຮີດຄອງປະເພນີອັນດີງາມຂອງຊາດ-ຂອງເຜົ່າ, ມີຄວາມດຸໝັ່ນຂະຫຍັນພຽນໃນການທໍາການຜະລິດ ເປັນຕົ້ນດ້ານການປູກ-ການລ້ຽງໃຫ້ກຸ້ມກິນ ແລະ ກາຍເປັນສິນຄ້າ ເພື່ອສ້າງເສດຖະກິດຄອບຄົວໃຫ້ດີຂຶ້ນ.​ ແລະ​ ໄດ້ເປີດໂອກາດ ໃຫ້ປະຊາຊົນປລຜູ້ມີສິດເລືອກຕັ້ງປະກອບຄໍາຄິດຄຳເຫັນຄຳສະເໜີ,​ ຄວາມຂັດຂ້ອງໝອງໃຈ, ປະກົດການຫຍໍ້ທໍ້ຕ່າງໆ ທີ່ພົວພັນເຖິງແຜນພັດທະນາເສດຖະກິດ-ສັງຄົມໂດຍສະເພາະດ້ານພື້ນຖານໂຄງລ່າງ,​ ດ້ານຄົມມະນາຄົມ, ລະບົບໄຟຟ້າ, ນໍ້າປະປາ, ດ້ານໄປສະນີໂທລະຄົມມະນາຄົມ, ການສຶກສາ, ສາທາ, ການຊຸກຍູ້ສົ່ງເສີມ,​ດ້ານກະສີກຳ,​ ດ້ານຈັດສັນທີ່ດີນ ແລະ ດ້ານນະໂຍບາຍຕ່າງໆ ແມ່ນຍັງບໍ່ທັນຕອບສະໜອງໄດ້ເທົ່າທີ່ຄວນ ຕໍ່ກັບຄໍາສະເໜີດັ່ງກ່າວ ຄະນະ ສສຂ ຈະໄດ້ນໍາໄປສົມທົບຄົ້ນຄວ້າສະເໜີຕໍ່ຂັ້ນເມືອງ,​ຂັ້ນແຂວງ ກໍຄືພາກສ່ວນທີ່ກ່ຽວຂ້ອງໄດ້ຮັບຮູ້ ແລະ ພິຈາລະນາແກ້ໄຂຕາມຄວາມເໝາະສົມ.

(ວິນັດ ສີສຸລາດ)