ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ເຜີຍແຜ່ຂໍ້ຕົກລົງຂອງທ່ານເຈົ້າແຂວງວ່າດ້ວຍ ການປະຢັດ ແລະ ຕ້ານການຟຸມເຟືອຍ.

​ພ.ຈ. 16, 2022 | ເຂດ 4 ອຸດົມໄຊ

ຕອນເຊົ້າຂອງວັນອັງຄານ, ວັນທີ 15 ພະຈິກ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດຕັ້ງເຜີຍແຜ່ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການປະຢັດ ແລະ ຕ້ານການຟຸມເຟືອຍ, ໂດຍການເປັນປະທານຂອງທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ມີທ່ານ ນ. ຄໍາພອນ ພິມມະຈັນ ຮອງປະທານສະພາປະຊາຊົນແຂວງ, ບັນດາທ່ານຄະນະປະຈຳ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ ແລະ ພະນັກງານວິຊາການພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.
ເອກະສານທີ່ນໍາມາເຜີຍແຜ່ຄັ້ງນີ້ປະກອບມີ: ຄໍາສັ່ງຂອງທ່ານເຈົ້າແຂວງ ສະບັບເລກທີ 999/ອຊ, ລົງວັນທີ 10 ຕຸລາ 2022 ວ່າດ້ວຍການເພີ່ມທະວີຈັດຕັ້ງປະຕິບັດຄຸ້ມຄອງພະນັກງານ-ລັດຖະກອນ ແລະ ກໍາລັງປະກອບອາວຸດຢູ່ແຂວງອຸດົມໄຊ. ຂໍ້ຕົກລົງຂອງທ່ານເຈົ້າແຂວງ ສະບັບເລກທີ 1032/ອຊ, ລົງວັນທີ 24 ຕຸລາ 2022 ວ່າດ້ວຍການປະຢັດ ແລະ ຕ້ານການຟູມເຟືອຍ ສະເໜີໂດຍທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານ ສພຂ ແລະ ໄດ້ຮັບຟັງການເຜີຍແຜ່ຂໍ້ຕົກລົງ ວ່າດ້ວຍການປະສານງານລະຫວ່າງຫ້ອງວ່າການແຂວງ, ບັນດາພະແນກການ, ອົງການທຽບເທົ່າຂັ້ນແຂວງ ແລະ ເມືອງ, ດໍາລັດວ່າດ້ວຍຈັນຍາບັນຂອງພະນັກ ງານ-ລັດຖະກອນ ສະບັບເລກທີ 184/ລບ, ລົງວັນທີ 26 ມິຖຸນາ 2022 ສະເໜີໂດຍທ່ານ ນ. ວັນສີ ພວງມະໄລ ເລຂາທິການສະພາປະຊາຊົນແຂວງ.
ຈຸດປະສົງ ແມ່ນເພື່ອເປັນການຜັນຂະຫຍາຍບັນດາດໍາລັດ, ຄໍາສັງ, ຂໍ້ຕົກລົງ ແລະ ເອກະສານຕ່າງໆ ໃຫ້ພະນັກງານ-ລັດຖະກອນ ຮັບຮູ້ ແລະ ເຂົ້າໃຈ ບັນດາຄາດໝາຍ, ເປົ້າໝາຍ, ຂອບເຂດການນໍາໃຊ້, ຂໍ້ຫ້າມ ແລະ ມາດຕະການໃນການປະຕິບັດໃນອົງການຈັດຕັ້ງລັດ ທີ່ນຳໃຊ້ງົບປະມານຂອງລັດໃຫ້ມີປະສິດທິຜົນສູງ ແລະ ເປັນການປູກຈິດສໍານຶກປະຕິບັດການປະຢັດ ແລະ ຕ້ານການຟຸມເຟືອຍ ໃນການສ້າງແຜນ, ການປະຕິບັດລາຍຈ່າຍງົບປະມານ, ປະຢັດຊັບສິນ, ປະຢັດພະລັງງານ, ປະຢັດແຮງງານ, ປະຢັດເວລາ ແລະ ອື່ນໆ ເພື່ອຫຼີກລ້ຽງການໃຊ້ຈ່າຍ ແລະ ນຳໃຊ້ທີ່ບໍ່ມີເຫດຜົນ, ບໍ່ສ້າງຜົນປະໂຫຍດຕອບແທນໃຫ້ລັດ ແລະ ສັງຄົມ.
  
(📸✍: ແສງພອນ ອິນນະລົງ).