(ສພຊ) – ວັນທີ 10 ກໍລະກົດ 2024 ທ່ານ ສີສູນທອນ ສ.ຜາບມີໄຊຍ໌ ຮອງປະທານກໍາມາທິການຍຸຕິທໍາ ພ້ອມດ້ວຍຄະນະ ໄດ້ລົງເຄື່ອນໄຫວເຜີຍແຜ່ກົດໝາຍວ່າດ້ວຍການແກ້ໄຂຄໍາຮ້ອງທຸກ ສະບັບປັບປຸງປີ 2022 ຢູ່ເມືອງພຽງ ແຂວງໄຊຍະບູລີ; ເຂົ້າຮ່ວມມີບັນດາຄະນະປະຈຳ ແລະ ຄະນະພັກເມືອງ, ພະນັກງານຫຼັກແຫ່ງ, ອົງການປົກຄອງບ້ານຂອບເຂດເທດສະບານເມືອງ.

ຈຸດປະສົງແມ່ນເພື່ອຮັບປະກັນເຮັດໃຫ້ການຈັດຕັ້ງປະຕິບັດກົດໝາຍວ່າດ້ວຍການແກ້ໄຂຄໍາຮ້ອງທຸກ ຂອງບັນ ດາພະແນກການ ແລະ ຂະແໜງການຕ່າງໆທີ່ຢູ່ຂັ້ນເມືອງ ແລະ ບ້ານ ໂດຍສະເພາະແມ່ນພະນັກງານ-ລັດຖະກອນທີ່ຮັບ ຜິດຊອບວຽກງານການແກ້ໄຂຄໍາຮ້ອງທຸກ ລວມໄປເຖິງພໍ່ແມ່ປະຊາຊົນບັນດາເຜົ່າໃນຂອບເຂດທົ່ວປະເທດ ໄດ້ຮັບຮູ້ ແລະ ເຂົ້າໃຈເນື້ອໃນຂອງກົດໝາຍດັ່ງກ່າວ ໃຫ້ມີຄວາມເປັນເອກະພາບກັນໃນການນຳໃຊ້ ແລະ ຈັດຕັ້ງປະຕິບັດຢ່າງເຂັ້ມງວດ ເພາະເນື້ອໃນກົດໝາຍສະບັບນີ້ ແມ່ນຕິດພັນກັບການປະຕິບັດພາລະບົດບາດ, ສິດ ແລະ ໜ້າທີ່ຂອງທຸກອົງການ ຈັດຕັ້ງຂອງລັດ, ພາກສ່ວນທຸລະກິດ ລວມໄປເຖິງປະຊາຊົນລາວບັນດາເຜົ່າ.

ໃນໂອກາດດຽວກັນນີ້, ກໍາມາທິການຍຸຕິທໍາ ຍັງໄດ້ມອບປຶ້ມກົດໝາຍວ່າດ້ວຍການແກ້ໄຂຄໍາຮ້ອງທຸກ, ແຜ່ນພັບ ແລະ ໂປສເຕີ ກ່ຽວກັບການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຈໍານວນໜຶ່ງ ໃຫ້ແກ່ສະພາປະຊາຊົນແຂວງ, ເມືອງ ແລະ ບ້ານ ເພື່ອເອົາໄປນໍາໃຊ້ເປັນບ່ອນອີງໃນການປະຕິບັດວຽກງານ ແລະ ເຜີຍແຜ່ຕໍ່ໃຫ້ແກ່ພາກສ່ວນທີ່ກ່ຽວຂ້ອງໄດ້ຮັບຮູ້.

(ຂ່າວ-ພາບ: ນາງ ກຸກກິກ ບຸດດາໄຊ)