ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນພະຫັດ, ວັນທີ 29 ກັນຍາ 2022, ຢູ່ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ, ໄດ້ຈັດພິທີເຊັນບົດບັນທຶກຮ່ວມລະຫວ່າງ ຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ ສະພາປະຂາຊົນແຂວງ ກັບ 4 ພະແນກການຄື: ພະແນກສຶກສາທິການ ແລະ ກິລາ, ພະແນກສາທາລະນະສຸກ, ພະແນກແຮງງານ ແລະ ສະຫວັດດີການສັງຄົມ, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ໂດຍການເປັນປະ ທານຂອງທ່ານ ຄໍາມະນີ ໄຊດວງຕາ ຄະນະປະຈໍາ-ປະທານຄະນະກຳມະການ ວັດທະນະທໍາ-ສັງຄົມ ແລະ ບັນດາ ເຜົ່າ ແລະ ທ່ານ ນາງ ຄໍາພອນ ພິມມະຈັນ, ຮອງປະທານສະພາປະຊາຊົນແຂວງ, ຜູ້ຊີ້ນໍາວຽກງານຄະນະກຳມະການ ວັດທະນະທໍາ-ສັງຄົມ ແລະ ບັນດາເຜົ່າ ສພຂ, ມີຮອງຫົວໜ້າພະແນກ, ຫົວໜ້າຂະແໜງ-ຮອງຫົວໜ້າຂະແໜງການກ່ຽວຂ້ອງຂອງ 4 ພະແນກການ ແລະ ຄະນະຮັບຊອບຈາກ ສພຂ ເຂົ້າຮ່ວມ.

 

ພິທີທ່ານ ດຣ ນາງ ສິດທິວອນ ຫົງສາຄອນ ຮອງປະທານຄະນະກຳມະການວັດທະນະທໍາ-ສັງຄົມ ແລະ ບັນດາເຜົ່າ ສພຂ ໄດ້ຕາງໜ້າຄະນະຮັບຜິດຊອບຜ່ານບົດບັນທຶກຮ່ວມລະຫວ່າງ ຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ ສພຂ ກັບ 4 ພະແນກການນັ້ນກໍ່ຄື: ພະແນກສຶກສາທິການ ແລະ ກິລາ, ພະແນກສາທາ ລະນະສຸກ, ພະແນກແຮງງານ ແລະ ສະຫວັດດີການສັງຄົມ, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ບົດບັນທຶກດັ່ງກ່າວປະກອບມີ 4 ໝວດ, 17 ມາດຕາ, ເຊິ່ງໄດ້ກໍາຈຸດປະສົງ, ການປະສານງານ, ຫລັກການປະສານງານ, ຂອບເຂດການນໍາໃຊ້, ເນື້ອໃນການປະສານງານ ໃຫ້ມີຄວາມເປັນເອກະພາບບົນພື້ນຖານແນວທາງນະໂຍບາຍຂອງພັກ-ລັດ, ລັດຖະທຳມະນູນ ແລະ ກົດໝາຍ; ເຄົາລົບສິດສະເໝີພາບ, ເຄື່ອນໄຫວຕາມຫຼັກການ, ຕາມພາລະບົດບາດ, ສິດ ແລະ ໜ້າທີ່ຂອງກັນ ແລະ ກັນ ສ້າງຄວາມເຊື່ອໝັ້ນ ໃຫ້ແກ່ປະຊາຊົນບັນດາເຜົ່າ.

  

ຫຼັງຈາກນັ້ນ, ຜູ້ເຂົ້າຮ່ວມພິທີໄດ້ປະກອບຄໍາຄິດຄໍາເຫັນໃສ່ບົດບັນທຶກຮ່ວມດັ່ງກ່າວເພີ່ມເຕີ່ມບາງບັນຫາ ແລະ ໄດ້ເຊັນບົດບັນທຶກຮ່ວມດັ່ງກ່າວຢ່າງເປັນທາງການ.

ຈຸດປະສົງຂອງພິທີເຊັນບົດບັນທຶກຮ່ວມຄັ້ງນີ້ ແມ່ນເພື່ອຮັບປະກັນ ໃຫ້ແກ່ການເຄື່ອນໄຫວການຈັດຕັ້ງປະ ຕິບັດໜ້າທີ່ການເມືອງຕາມພາລະບົດບາດ, ສິດ ແລະ ໜ້າທີ່, ທັງເປັນບ່ອນອີງໃຫ້ແກ່ການພົວພັນປະສານງານ ລະ ຫວ່າງ ຄະນະກໍາມະການ ວັດທະນະທໍາ-ສັງຄົມ ແລະ ບັນດາເຜົ່າ ສພຂ ກັບ 4 ພະແນກການ ໃນການຜັນຂະຫຍາຍແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມ ໄດ້ຮັບການຈັດຕັ້ງປະຕິບັດໃຫ້ມີຜົນສຳ ເລັດສູງ, ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ ແລະ ມີສະຖຽນລະພາບທາງດ້ານການເມືອງ.

ທ້າຍພິທີ ປະທານກອງປະຊຸມໄດ້ມີຄໍາເຫັນ ເຊິ່ງທ່ານໄດ້ເນັ້ນໜັກ ໃຫ້ບັນດາພະແນກການນໍາເອົາເນື້ອໃນຈິດໃຈຂອງການເຊັນບົດບັນທຶກຮ່ວມຄັ້ງນີ້ ໄປຈັດຕັ້ງເຜີຍແຜ່ໃຫ້ແກ່ພະນັກງານພາຍໃນກົມກອງຂອງຕົນຮັບຮູ້ ແລະ ເຂົ້າໃຈຕື່ມອີກ.

ພາບ-ຂ່າວ: ແສງພອນ ອິນນະລົງ.