ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                ໃນວັນທີ 02 ສິງຫາ 2022 ຜ່ານມານີ້ ທີ່ຫ້ອງວ່າການແຂວງ ເຊກອງ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ຕ້ອນຮັບທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໃນໂອກາດທີ່ທ່ານລົງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ສະພາປະຊາຊົນແຂວງ ເຊກອງ.
             ໃນໂອກາດນີ້, ທ່ານ ເຫລັກໄຫລ ສີວິໄລ ໄດ້ສະແດງຄວາມຕ້ອນຮັບ ແລະ ແຈ້ງໃຫ້ຮູ້ກ່ຽວກັບສະພາບການຈັດຕັ້ງປະຕິບັດວຽກງານຢູ່ແຂວງ ເຊກອງ ໂດຍສະເພາະການພັດທະນາເສດຖະກິດ-ສັງຄົມຢູ່ແຂວງ ເຊກອງ ໃນໄລຍະຜ່ານມາເຫັນວ່າມີການຂະຫຍາຍຕົວຢ່າງຕໍ່ເນື່ອງ, ໃນນີ້ ສະເພາະວຽກງານສະພາປະຊາຊົນແຂວງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ແມ່ນໄດ້ພ້ອມກັນເອົາໃຈໃສ່ປະຕິບັດ 03 ພາລະບົດບາດຂອງຕົນ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ຢ່າງແຂງແຮງ, ໄດ້ຍົກສູງຄວາມຮັບຜິດຊອບປະສານສົມທົບກັບອົງການປົກຄອງທ້ອງຖິ່ນ ແລະ ບັນດາຂະແໜງການທີ່ກ່ຽວຂ້ອງ ໃນການຄວ້າຄວ້າ ແລະ ແກ້ໄຂບັນຫາຕ່າງໆໄດ້ຢ່າງທ່ວງທັນ, ຮັບປະກັນຄວາມເປັນລະບຽບຮຽບຮ້ອຍ ແລະ ຄວາມສະຫງົບໂດຍພື້ນຖານ. ພ້ອມນີ້, ທ່ານ ຍັງໄດ້ແຈ້ງໃຫ້ຮູ້ກ່ຽວກັບຄວາມພ້ອມໃນການກະກຽມບັນດາເນື້ອໃນທີ່ສໍາຄັນຕ່າງໆຂອງທ້ອງຖິ່ນ ທີ່ຈະນໍາເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ທີ່ຈະໄດ້ໄຂຂຶ້ນໃນໝໍ່ໆນີ້.
                ຈາກນັ້ນ, ທ່ານ ຄໍາໃບ ດໍາລັດ ກໍໄດ້ກ່າວສະແດງຄວາມຂອບໃຈມາຍັງທ່ານ ເຈົ້າແຂວງ ເຊກອງ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໂດຍຈຸດປະສົງໃນການມາເຮັດວຽກໃນຄັ້ງນີ້ ກໍເພື່ອເປັນການຢ້ຽມຢາມ ແລະ ຮັບຟັງການລາຍງານການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະພາປະຊາຊົນແຂວງ ໃນໄລຍະຜ່ານມາ ໂດຍຊອກໃຫ້ເຫັນຜົນສໍາເລັດອັນພົ້ນເດັ່ນທີ່ຄວນເສີມຂະຫຍາຍ ແລະ ຈຸດອ່ອນ-ຂໍ້ຄົງຄ້າງ ເພື່ອຫາວິທີແກ້ໄຂ ແນໃສ່ເຮັດໃຫ້ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະພາປະຊາຊົນແຂວງ ນັບມື້ນັບເຂັ້ມແຂງ.
#ໂດຍ:ນາລີວັນ.