ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ກອງປະຊຸມໃຫຍ່ IPU ຄັ້ງທີ 144, ດໍາເນີນລະຫວ່າງວັນທີ 20-24 ມີນາຜ່ານມາ ທີ່ປະເທດອິນໂດເນເຊຍ ໃນຮູບແບບເຊິ່ງໜ້າ ໂດຍຈະສຸມໃສ່ປຶກສາຫາລືກັນພາຍໃຕ້ຫົວຂໍ້: “ເຂົ້າໃກ້ເປົ້າໝາຍທີ່ເປັນສູນ: ຊຸກຍູ້ໃຫ້ລັດຖະສະພາດຳເນີນງານກ່ຽວກັບການປ່ຽນແປງດິນຟ້າອາກາດ”, ຄະນະຜູ້ແທນທີ່ເຂົ້າຮ່ວມ ຈະໄດ້ພ້ອມກັນພິຈາລະນາບັນຫາຮີບດ່ວນທີ່ເປັນຄວາມກັງວົນຮ່ວມກັນໃນທົ່ວໂລກ. ນອກນັ້ນ, ຍັງຈະໄດ້ເຂົ້າຮ່ວມ ແລະ ປະກອບຄຳເຫັນໃນກອງປະຊຸມຕ່າງໆເຊັ່ນ: ກອງປະຊຸມສະພາບໍລິຫານງານ, ກອງປະຊຸມກຳມາທິການປະຈຳກ່ຽວກັບສັນຕິພາບ ແລະ ຄວາມໝັ້ນຄົງສາກົນ, ກອງປະຊຸມກຳມາທິການປະຈຳກ່ຽວກັບວຽກງານການພັດທະນາແບບຍືນຍົງ, ກອງປະຊຸມກຳມາທິການປະຈຳວ່າດ້ວຍປະຊາທິປະໄຕ ແລະ ສິດທິມະນຸດ, ກອງປະຊຸມກຳມາທິການປະຈຳ ກ່ຽວກັບກິດຈະການຂອງອົງການສະຫະປະຊາຊາດ, ກອງປະຊຸມເວທີປຶກສາຫາລືວຽກງານສະມາຊິກລັດຖະສະພາເພດຍິງ, ກອງປະຊຸມເວທີປຶກສາຫາລືຂອງສະມາຊິກສະພາໜຸ່ມ ແລະ ກອງປະຊຸມປິ່ນອ້ອມອື່ນໆຂອງ IPU ພ້ອມທັງພິຈາລະນາຮັບຮອງເອົາມະຕິທີ່ກ່ຽວຂ້ອງກັບວຽກງານຂອງກຳມາທິການດັ່ງກ່າວ ອີກຈຳນວນໜຶ່ງ.
ຈຸດປະສົງຂອງການເຂົ້າຮ່ວມກອງປະຊຸມຄັ້ງນີ້ ແມ່ນເພື່ອເປັນການປະຕິບັດພັນທະ ແລະ ບົດບາດສະພາແຫ່ງຊາດ ແຫ່ງ ສປປລາວ ທີ່ເປັນສະມາຊິກສົມບູນຂອງ IPU, ເພື່ອສະແດງທັດສະນະຂອງ ສປປລາວ ກໍຄື ສະພາແຫ່ງຊາດລາວ ຕໍ່ເວທີສາກົນ ແລະ ເປັນການແລກປ່ຽນທັດສະນະ, ຄຳຄິດຄຳເຫັນກັບບັນດາຜູ້ແທນຈາກລັດຖະສະພາເພື່ອນມິດ ກ່ຽວກັບເນື້ອໃນຕ່າງໆໃນກອງປະຊຸມ ແນໃສ່ຮັດແໜ້ນຄວາມສາມັກຄີ, ເສີມຂະຫຍາຍມິດຕະພາບ ແລະ ການຮ່ວມມືເພື່ອການພັດທະນາ ແລະ ຮັບມືກັບສິ່ງທ້າທາຍຕ່າງໆທີ່ເກີດຂຶ້ນ.
ຄະນະຜູ້ແທນຂອງສະພາແຫ່ງຊາດລາວ ນຳໂດຍທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ພ້ອມດ້ວຍສະມາຊິກສະພາແຫ່ງຊາດ ແລະ ພະນັກງານ-ວິຊາການທີ່ກ່ຽວຂ້ອງຈຳນວນໜຶ່ງ ໄດ້ເຂົ້າຮ່ວມກອງປະຊຸມດັ່ງກ່າວ ໂດຍການເປັນເຈົ້າພາບຂອງລັດຖະສະພາອິນໂດເນເຊຍ, ມີສະມາຊິກສະພາແຫ່ງຊາດ ຈໍານວນ 1.000 ທ່ານ ທີ່ມາຈາກ 115 ປະເທດ ທົ່ວໂລກ ແລະ ຄະນະຜູ້ແທນຈາກອົງການສະຫະປະຊາຊາດ, ຕົວແທນຈາກອົງການລັດຖະສະພາປະຈຳພາກພື້ນຕ່າງໆຂອງໂລກ ເຂົ້າຮ່ວມ.
ໃນພິທີເປີດກອງປະຊຸມ, ໄດ້ມີບຸກຄົນສຳຄັນເຂົ້າຮ່ວມ ແລະກ່າວຄຳເຫັນໂດຍທ່ານ ດູຣອາເຕ ປາເຊໂກ (Duarte Pacheco), ປະທານສະຫະພັນລັດຖະສະພາສາກົນ (IPU); ທ່ານ ມາຕິນ ຈູງກົງ (Martin Chungong), ເລຂາທິການໃຫຍ່ IPU; ທ່ານ ອັນເຕນິໂອ ກູເຕີເຣສ ເລຂາທິການໃຫຍ່ສະຫະປະຊາຊາດ; ທ່ານ ໂຈໂກວີ ໂດໂດ ປະທານາທິບໍດີ ແຫ່ງ ສາທາລະນະລັດອິນໂດເນເຊຍ ແລະ ກ່າວເປີດກອງປະຊຸມຢ່າງເປັນທາງການ ໂດຍທ່ານ ນາງ ປອນ ມາຫາຣານີ (Puan Maharani) ປະທານສະພາຜູ້ແທນປະຊາຊົນ ແຫ່ງ ສາທາລະນະລັດ ອິນໂດເນເຊຍ.