ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 8 ເມສາ 2022 ນີ້ ທ່ານຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ເຂົ້າຮ່ວມກອງປະຊຸມປຶກສາຫາລື ກ່ຽວກັບການກະກຽມການປະເມີນການຈັດຕັ້ງປະຕິບັດກົດໝາຍ 4 ສະບັບ  ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ( ດ້ວຍລະບົບທາງໄກ) ຢູ່ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານກອງປະຊຸມຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກຳມາທິການກົດໝາຍ, ຫົວໜ້າຄະນະຮັບຜິດຊອບປະເມີນການຈັດຕັ້ງປະຕິບັດກົດໝາຍ, ໂດຍມີຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ, ຄະນະປະຈຳສະພາປະຊາຊົນແຂວງ, ຮອງເຈົ້າແຂວງ ຜູ້ຊີ້ນໍາວຽກງານເສດຖະກິດ, ຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງທົ່ວປະເທດເຂົ້າຮ່ວມ.

ກອງປະຊຸມໄດ້ຮັບຟັງການຜ່ານມະຕິສະບັບເລກທີ 75/ຄປຈ, ວັນທີ 25 ມີນາ 2022 ວ່າດ້ວຍ ການແຕ່ງຕັ້ງຄະນະຮັບຜິດຊອບຊີ້ນຳ ແລະ ກອງເລຂາ ການປະເມີນຜົນການປະຕິບັດກົດໝາຍ 4 ສະບັບ ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ; ຮັບຟັງຄຳແນະນຳເລກທີ 03/ຄປຈ, ວັນທີ 1 ເມສາ 2022 ວ່າດ້ວຍການຕິດຕາມກວດກາການປະເມີນການຈັດຕັ້ງປະຕິບັດກົດໝາຍ ແລະ ແຜນການ ເລກທີ 02/ຄປກໝ, ວັນທີ 31 ມີນາ 2022 ກ່ຽວກັບການຕິດຕາມກວດກາ ແລະ ເກັບກຳຂໍ້ມູນ ກ່ຽວກັບການປະເມີນການຈັດຕັ້ງປະຕິບັດກົດໝາຍ 4 ສະບັບ ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ; ພ້ອມດຽວກັນ ປະທານກອງປະຊຸມຍັງໄດ້ເຈາະຈິ້ມຕໍ່ ກັບກົດໝາຍ 4 ສະບັບຄື: ກົດໝາຍວ່າດ້ວຍ ທີ່ດິນ, ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍ ແຮ່ທາດ  ນອກນັ້ນ ບັນດາທ່ານຜູ້ແທນກອງປະຊຸມໄດ້ແລກປ່ຽນປະກອບຄຳຄິດເຫັນຕໍ່ກັບການກະກຽມການປະເມີນການຈັດຕັ້ງປະຕິບັດກົດໝາຍ 4 ສະບັບຢ່າງມີຈຸດສຸມ ເພື່ອເຮັດໃຫ້ການປະເມີນກົດໝາຍຄັ້ງນີ້ ໃຫ້ມີເນື້ອໃນຮັດກຸມຖຶກຕ້ອງສອດຄ່ອງກັບສະພາບຕົວຈິງ ສາມາດນຳໄປຈັດຕັ້ງປະຕິບັດໃຫ້ມີຄຸນນະພາບຂຶ້ນກວ່າເກົ່າ.

ໂດຍ ວັນນີ ແຝງບົວວັນ