ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນຈັນ, ວັນທີ 27 ມິຖຸນາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ເປີດກອງປະຊຸມອະນຸກໍາມະການ ພິທີການ ແລະ ໂຄສະນາ-ຂ່າວສານ ຂຶ້ນ, ໂດຍການເປັນປະທານຂອງທ່ານ ຄໍາເຜີຍ ງອນວັນຄໍາ ຮອງປະທານ ສພຂ, ທັງເປັນຫົວໜ້າອະນຸກໍາມະການ ພິທີການ ແລະ ໂຄສະນາ-ຂ່າວສານ, ມີຮອງປະທານຄະນະກໍາມະການ, ຄະນະເລຂາທິການ, ຫົວໜ້າ/ຮອງຫົວໜ້າຂະແໜງ ແລະ ວິຊາການພາຍໃນອະນຸກໍາມະການ ພິທີການ ແລະ ໂຄສະນາ-ຂ່າວສານ ເຂົ້າຮ່ວມ.

ກອງປະຊຸມຄະນະຮັບຜິດຊອບໄດ້ຜ່ານຮ່າງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບ ໃນອະນຸກຳມະ ການ ພິທີການ ແລະ ໂຄສະນາ-ຂ່າວສານ, ເພື່ອກະກຽມ ແລະ ຊ່ວຍວຽກ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ອຸດົມໄຊ ຊຸດທີ II, ຈາກນັ້ນ, ປະທານກອງປະຊຸມໄດ້ມີທິດຊີ້ນຳ ແລະ ຜູ້ເຂົ້າຮ່ວມໄດ້ປະກອບຄຳຄິດຄໍາເຫັນ, ມີຄໍາສະເໜີຕໍ່ກອງປະຊຸມຢ່າງກົງໄປກົງມາ ແລະ ຖອດຖອນບົດຮຽນໃນການກະກຽມກອງປະຊຸມຄັ້ງຜ່ານມາ, ເຫັນວ່າມີຂໍ້ສະດວກ, ຂໍ້ຫຍຸ້ງຍາກແນວໃດ ແລະ ຄວນມີວິທີທາງແກ້ໄຂຄືແນວໃດ ເປັນຕົ້ນແມ່ນການເຊີນເປົ້າໝາຍເຂົ້າຮ່ວມ, ການປະດັບປະດາ, ປ້າຍພິທີ, ການໂຄສະນາ, ການຊ່ວຍວຽກໃນມື້ປະຊຸມ ແລະ ວຽກງານປິ່ນອ້ອມດ້ານອື່ນໆ, ເພື່ອເຮັດໃຫ້ການກະກຽມດໍາເນີນກອງປະຊຸມໃຫ້ສໍາເລັດຕາມລະດັບຄາດໝາຍ ແລະ ທັນຕາມກໍານົດເວລາ.

ຕອນທ້າຍ, ປະທານກອງປະຊຸມໄດ້ເນັ້ນໜັກໃຫ້ພະນັກງານ-ລັດຖະກອນ ທີ່ຢູ່ໃນອະນຸກໍາມະການທີ່ຖືກແຕ່ງຕັ້ງໃຫ້ເອົາໃຈໃສໃນການປະສານສົມທົບກັບບັນດາອະນຸກໍາມະການພາຍໃນ, ພະແນກການທີ່ກ່ຽວຂ້ອງໃຫ້ລະ ອຽດຄົບຖ້ວນ, ຂໍທິດຊີ້ນໍາຈາກຫົວໜ້າອະນຸກຳມະການຢ່າງເປັນປົກກະຕິ ແລະ ປະຕິບັດໜ້າທີ່ຕົນຕາມການໝອບໝາຍໃຫ້ສໍາເລັດ. ພາບ/ຂ່າວ: ແສງພອນ ອິນນະລົງ.