ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 19 ພຶດສະພາ 2022 ນີ້, ຢູທີ່ຫ້ອງປະຊຸມຂອງສະພາປະຊາຊົນແຂວງຈໍາປາສັກ ໄດ້ເປີດກອງປະຊຸມຮ່ວມກັບ 5 ພາກສ່ວນ ເພື່ອເກັບກໍາຂໍ້ມູນ ໃນການກະກຽມເຂົ້າຮ່ວມກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໂດຍພາຍໃຕ້ການເປັນປະທານຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງ, ມີຮອງປະທານຄະນະປະຈໍາສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ແລະ ຕາງໜ້າຈາກ 5 ພາກສ່ວນຄື: ພະແນກແຜນການ ແລະ ການລົງທຶນ, ພະແນກອຸດສະຫະກຳ ແລະ ການຄ້າ,  ພະແນກການເງິນ, ກອງບັນຊາການປ້ອງກັນຄວາມສະຫງົບແຂວງ, ທະນາຄານແຫ່ງ ສປປ ລາວ ປະຈໍາພາກໃຕ້ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ວາລະດໍາເນີນກອງປະຊຸມ, ໄດ້ຮັບຟັງການລາຍງານກ່ຽວກັບ ການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ ຈາກພະແນກແຜນການ ແລະ ການລົງທຶນແຂວງ; ຮັບຟັງການລາຍງານກ່ຽວກັບບັນຫາການເໜັງຕິງຂອງສິນຄ້າ, ການກັກຕຸນສິນຄ້າເພື່ອຂຶ້ນລາຄາ ຈາກຫົວຫນ້າພະແນກການຄ້າແຂວງ;ຮັບຟັງການລາຍງານກ່ຽວກັບອັດຕາແລກປ່ຽນເງິນຕາຕ່າງປະເທດ ແລະຄຸ້ມຄອງເງິນຕາ, ການຊື້ຂາຍທີ່ບໍ່ຜ່ານລະບົບທະນາຄານ ເຮັດໃຫ້ລັດເສຍລາຍຮັບ ຈາກທະນາຄານແຫ່ງ ສປປ ລາວ ປະຈໍາພາກໃຕ້; ຮັບຟັງການລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ບັນຫາຄ້າຍຄູ້ມຂັງພາຍໃນແຂວງ ຈາກກອງບັນຊາການປ້ອງກັນຄວາມສະຫງົບແຂວງ. ຈາກນັ້ນ, ບັນດາຜູ້ແທນກອງປະຊຸມໄດ້ມີຄໍາເຫັນ ແລະ ຕັ້ງຄຳຖາມເຈະຈີ້ມ ແລະ ມີການແລກປ່ຽນຄໍາຄິດຄໍາເຫັນຕໍ່ ເນື້ອໃນທີ່ນໍາມາຄົ້ນຄວ້າໃນກອງປະຊຸມ.

ໃນຕອນທ້າຍ, ທ່ານ ສາຍທອງ ໄຊຍະວົງ ປະທານກອງປະຊຸມ ໄດ້ມີຄໍາເຫັນວ່າ: ຂ້າພະເຈົ້າຂໍສະແດງຄວາມຊົມເຊີຍຕໍ່ການຈັດຕັ້ງປະຕິບັດວຽກງານ ຂອງບັນດາພະແນກການ-ກົມກອງ ທີ່ລາຍງານມາຂ້າງເທິງນັ້ນ, ເຊິ່ງເຫັນໄດ້ເຖິງດ້ານດີ ແລະ ຂໍ້ຫຍຸ້ງຍາກ ເຊິ່ງເປັນວຽກງານຂໍ້ຄົງຄ້າງ ທີ່ພວກເຮົາຈະຕ້ອງໄດ້ສືບຕໍ່ພ້ອມກັນເພີ່ມທະວີໃນການຈັດຕັ້ງປະຕິບັດໃຫ້ສໍາເລັດ. ໂດຍສະເພາະຂໍ້ມູນບັນຫາທີ່ທຸກພາກສ່ວນໄດ້ສະເໜີລາຍງານມາຂ້າງເທິງນັ້ນ, ຄະນະປະຈໍາສະພາປະຊາຊົນແຂວງພວກເຮົາຈະສັງລວມ ແລະ ຄົ້ນພິຈາລະນາຢ່າງທີ່ຖ້ວນ ເພື່ອເປັນຂໍ່ມູນນໍາສະເໜີຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX  ໄດ້ຄົ້ນຄວ້າພິຈາລະນາ, ຊຸກຍູ ແລະ ຫາວິທີ່ແກ້ໄຂ.

(ພາບ-ຂ່າວ: ພຸດທະສອນ ແສງພອນ)