(ສພຊ) – ເມື່ອວັນພະຫັດທີ 04 ກໍລະກົດຜ່ານມາ ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດໄດ້ມີກອງປະຊຸມຮຽບຮຽງເນື້ອໃນຮ່າງກົດໝາຍວ່າດ້ວຍການສົ່ງເສີມການລົງທຶນ (ສະບັບປັບປຸງ) ໂດຍການເປັນປະ ທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ; ເຂົ້າຮ່ວມມີທ່ານປະທານກຳມາທິການແຜນການ,​ ການເງິນ ແລະ ການກວດສອບ, ບັນດາທ່ານຮອງປະທານກຳມາທິການພາຍໃນສະພາແຫ່ງຊາດ (ສພຊ), ບັນດາທ່ານຮອງລັດຖະມົນຕີກະຊວງທີ່ກ່ຽວຂ້ອງ, ທ່ານຮອງຫົວໜ້າຫ້ອງວ່າການສຳນັກງານປະທານປະເທດ, ທ່ານຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານປະທານຄະນະສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 7, 11, 12, 14, 15 ແລະ ຄະນະທີ່ປຶກສາທາງດ້ານກົດໝາຍຂອງຄະນະປະຈຳສະພາແຫ່ງຊາດ ພ້ອມດ້ວຍພາກສ່ວນທີ່ກ່ຽວຂ້ອງ.
ກອງປະຊຸມມີຈຸດປະສົງເພື່ອຮັບປະກັນໃຫ້ບັນດາຄໍາຄິດຄໍາເຫັນຂອງບັນດາທ່ານ ສສຊ ທີ່ໄດ້ປະກອບຄໍາເຫັນໃສ່ຮ່າງກົດໝາຍວ່າດ້ວຍການສົ່ງເສີມການລົງທຶນ ທີ່ຜ່ານການພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ໄດ້ຮັບການຄົ້ນຄວ້າເລືອກເຟັ້ນປັບປຸງໃສ່ຮ່າງກົດໝາຍດັ່ງກ່າວ ໃຫ້ມີຄວາມຮັດກຸມ, ຈະແຈ້ງ, ສອດຄ່ອງກັບແນວທາງນະໂຍບາຍຂອງລັດ, ລັດຖະທໍາມະນູນ ແລະ ກົດໝາຍອື່ນ, ສົນທິສັນຍາສາກົນ ທີ່ ສປປລາວ ເປັນພາຄີ, ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ ແລະ ສາມາດຈັດຕັ້ງປະຕິບັດໄດ້ຢ່າງຍາວນານ; ທັງເປັນການລະດົມສະຕິປັນຍາຈາກທຸກພາກສ່ວນທີ່ກ່ຽວຂ້ອງກັບຮ່າງກົດໝາຍສະບັບນີ້ ເພື່ອປັບປຸງຮ່າງກົດໝາຍຢ່າງຮອບດ້ານ ຈາກນັ້ນນໍາສະເໜີກອງປະຊຸມຄະນະປະຈໍາສະພາແຫ່ງຊາດ ພິຈາລະນາກ່ອນນໍາສະເໜີປະທານສະ ພາແຫ່ງຊາດພິຈາລະນາລົງລາຍເຊັນ ເພື່ອສະເໜີຕໍ່ປະທານປະເທດພິຈາລະນາອອກລັດຖະດໍາລັດປະກາດໃຊ້.
​ບັນດາທ່ານທີ່ເຂົ້າຮ່ວມ ໄດ້ພ້ອມກັນຄົ້ນຄວ້າ ແລະ ຮຽບຮຽງເນື້ອໃນຮ່າງກົດໝາຍວ່າດ້ວຍການສົ່ງເສີມການລົງທຶນ ຕາມການປະກອບຄໍາເຫັນຂອງ ສສຊ ໃນຄັ້ງວັນທີ 26 ມິຖຸນາ 2024 ຈຳນວນ 32 ທ່ານ ກວມເອົາ 40 ມາດຕາ ເຊິ່ງຄະນະຮັບຜິດຊອບປັບປຸງກົດໝາຍດັ່ງກ່າວ ກໍໄດ້ຄົ້ນຄວ້າພິຈາລະນາປັບປຸງສຳເລັດໂດຍພື້ນຖານແລ້ວ ໃນນີ້ສາມາດປັບປຸງ 22 ມາດຕາ ແລະ ຮັກສາໄວ້ຄືເກົ່າ 18 ມາດຕາ ແລະ ໃນວັນທີ 28 ມິຖຸນາ 2024 ເປັນວັນພິຈາລະນາຮັບຮອງເອົາ ກໍມີ ສສຊ 10 ທ່ານ ໄດ້ປະກອບຄຳເຫັນຕື່ມ ກ່ອນລົງຄະແນນສຽງຮັບຮອງເອົາດ້ວຍຄະແນນເຫັນດີ 142 ທ່ານ ເທົ່າກັບ 84.5%, ບໍ່ເຫັນດີ 19 ທ່ານ ເທົ່າກັບ 13.38%, ບໍ່ອອກສຽງ 3 ທ່ານ ເທົ່າກັບ 2.11% ຖືວ່າກົດໝາຍສະບັບນີ້ ຜ່ານການຮັບຮອງຈາກສະພາແຫ່ງຊາດ.
(ຂ່າວ-ພາບ: ນາງ ກຸກກິກ ບຸດດາໄຊ)