ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອຮັບປະກັນໃນການສ້າງປຶ້ມຄູ່ມືຂອງຄະນະປະຈຳສະພາແຫ່ງຊາດ ວ່າດ້ວຍການຮັບ ແລະ ພິຈາ ລະນາຄຳຮ້ອງຂໍຄວາມເປັນທຳທີ່ຜ່ານກອງປະຊຸມ ເພື່ອໃຫ້ມີເນື້ອໃນຮັດກຸມ, ຄົບຖ້ວນ, ສົມບູນ, ມີປະສິດທິພາບ ກ່ອນທີ່ຈະມານຳໃຊ້ໃນວຽກງານຂອງກຳມາທິການ ແລະ ລົງເຜີຍແຜ່ໃຫ້ບັນດາເຂດເລືອກຕັ້ງໃນທົ່ວປະເທດ. ໃນລະຫວ່າງວັນທີ 14-15 ກັນຍາ 2022 ກໍາມາທິການຍຸຕິທໍາຂອງສະພາແຫ່ງຊາດ ໄດ້ດໍາເນີນກອງປະຊຸມຮຽບຮຽງເນື້ອໃນປຶ້ມຄູ່ມືການຮັບ ແລະ ພິຈາລະນາຄຳຮ້ອງຂໍຄວາມເປັນທຳຂອງຄະນະປະຈຳສະພາປະຊາຊົນຂັ້ນແຂວງ ແລະ ຄະນະປະຈຳສະພາແຫ່ງຊາດ ຢູ່ທີ່ເມືອງວັງວຽງແຂວງວຽງຈັນ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ, ເຂົ້າຮ່ວມມີບັນດາທ່ານຮອງປະທານກຳມາທິການຕ່າງໆ ພາຍໃນສະພາແຫ່ງຊາດ, ຄະນະບໍດີຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ, ຮອງປະທານສານປະຊາຊົນສູງສຸດ, ຮອງຫົວໜ້າອົງການໄອຍະການປະຊາຊົນສູງສຸດ, ທີ່ປຶກສາອາວຸໂສທາງດ້ານກົດໝາຍຂອງຄະນະປະຈຳສະພາແຫ່ງຊາດ ພ້ອມດ້ວຍຄະນະກົມ, ຄະນະພະແນກ ແລະ ວິຊາການທີ່ກ່ຽວຂ້ອງ.
ບັນດາທ່ານທີ່ເຂົ້າຮ່ວມ ໄດ້ປຶກສາຫາລື ແລະ ຄົ້ນຄວ້າຕໍ່ຮ່າງປຶ້ມຄູ່ມືການຮັບ ແລະ ພິຈາລະນາຄຳຮ້ອງຂໍຄວາມເປັນທຳຂອງຄະນະປະຈຳສະພາປະຊາຊົນຂັ້ນແຂວງ ແລະ ຄະນະປະຈຳສະພາແຫ່ງຊາດ ເພື່ອເຮັດໃຫ້ເນື້ອໃນຂອງປຶ້ມຄູ່ມືດັ່ງກ່າວ ມີຄວາມຄົບຖ້ວນ, ກະທັດຮັດ ແລະ ສາມາດນຳໃຊ້ໄດ້ໃນວຽກງານຕົວຈິງ ໃຫ້ມີປະສິດທິຜົນສູງສຸດ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນທາງດ້ານງົບປະມານ ຈາກອົງການເຮວວີຕັດ (HELVETAS) ແລະ ງົບປະມານສົມທົບຈາກຄະນະເລຂາທິການສະພາແຫ່ງຊາດ.
(ພາບ ແລະ ຂ່າວ: ນາງ ປາກາລັກ ພົມມີໄຊ)