ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໂດຍໄດ້ຮັບການສະໜັບສະໜູນຈາກຄະນະເລຂາທິການສະພາແຫ່ງຊາດ ແລະ ແຜນງານເຊກາ (CEGGA), ກອງ​ປະຊຸມ​ຮຽບຮຽງ​ກົດໝາຍ​ການແກ້ໄຂຄຳຮ້ອງຂໍຄວາມເປັນທຳ (ສະບັບ​ປັບປຸງ) ຕາມ​ການ​ປະກອບ​ຄຳ​ເຫັນ​ຂອງສະມາຊິກສະພາແຫ່ງຊາດ ໃນວາລະ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ IX ເຊິ່ງມີຜູ້ລົງທະບຽນປະກອບຄຳເຫັນ ທັງໝົດ 38 ທ່ານ ແລະ ສົ່ງເອກະສານປະກອບຄຳເຫັນ 17 ທ່ານ ກວມເອົາທັງໝົດ 41 ມາດຕາ, 135 ເນື້ອໃນ.
ໃນກອງປະຊຸມ, ບັນດາທ່ານທີ່ເຂົ້າຮ່ວມໄດ້ພ້ອມກັນສຸມໃສຄົ້ນຄວ້າ ແລະ ແລກປ່ຽນຄຳຄິດຄຳເຫັນ ຢ່າງກົງ ໄປກົງມາ ດ້ວຍຄວາມຮັບຜິດຊອບ ເພື່ອເຮັດໃຫ້ການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ຂອງສະພາແຫ່ງຊາດ ແລະ ພາກສ່ວນກ່ຽວຂ້ອງ ຖືກຕ້ອງ ແລະ ສອດຄ່ອງ ຕາມມະຕິຂອງກອງປະຊຸມຄົບຄະນະບໍລິຫານງານສູນກາງພັກ ສະບັບເລກທີ 037/ຄບສພ, ລົງວັນທີ 18 ມີຖຸນາ 2018 ແລະ ມະຕິ ສະບັບເລກທີ 112/ກມສພ, ລົງວັນທີ 02 ມີຖຸນາ 2020 ແນໃສ່ຫັນເອົາການຄຸ້ມຄອງລັດ, ການຄຸ້ມຄອງເສດຖະກິດ-ສັງຄົມດ້ວຍກົດໝາຍ ໃຫ້ເຂົ້າສູ່ລວງເລິກ ແລະ ຊີວິດຕົວຈິງເທື່ອລະກ້າວ ທັງເປັນການເພີ່ມທະວີການຕິດຕາມກວດກາຂອງສະພາແຫ່ງຊາດ ຕໍ່ກັບຄວາມຮັບຜິດຊອບການເມືອງຂອງອົງການທີ່ມີສິດ ແລະ ໜ້າທີ່ ໃນການແກ້ໄຂຄຳຮ້ອງທຸກ ເພື່ອຮັບປະກັນໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປະຊາຊົນສາມາດເຂົ້າເຖິງຂະບວນການຍຸຕິທຳຫລາຍຂຶ້ນ ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຄວາມຍຸຕິທຳ ແລະ ໂປ່ງໃສ.
ກອງປະຊຸມໄດ້ໄຂຂຶ້ນໃນວັນທີ 2 ສິງຫາ 2022 ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານກອງປະຊຸມຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ສະພາແຫ່ງຊາດ; ມີທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ບັນດາທ່ານຮອງປະທານກຳມາທິການຍຸຕິທຳ, ກຳມາທິການກົດໝາຍ, ຄະນະທີ່ປືກສາດ້ານກົດໝາຍຂອງຄະນະປະຈຳສະພາແຫ່ງຊາດ, ຫົວໜ້າ-ຮອງຫົວໜ້າກົມ ແລະ ພະນັກງານ-ລັດຖະກອນ ຈາກສຳນັກງານປະທານປະເທດ, ສຳນັກງານນາຍົກລັດຖະມົນຕີ, ກະຊວງຍຸຕິທຳ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການຈັດຕັ້ງມະຫາຊົນ, ສູນກາງແນວລາວສ້າງຊາດ, ສະຫະພັນນັກຮົບເກົ່າ ແລະ ສະພາແຫ່ງຊາດ.
​(ພາບ ແລະ ຂ່າວ: ນາງ ປາກາລັກ ພົມມີໄຊ)