ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 19 ສິງຫາ 2022 ທີ່ສະພາແຫ່ງຊາດ, ຄະນະຫ້ອງການຄຸ້ມຄອງຕະຫຼາດພະລັງງານ ຂອງສິງກະ ໂປ (EMA) ນຳໂດຍທ່ານ ໂຈນາທານ ໂກ (Jonathan Goh) ຫົວໜ້າຝ່າຍພົວພັນສາກົນ ແລະ ທ່ານ ຢູຈິນ ໂຕ (Eugene Toh) ຫົວໜ້າຝ່າຍການຄ້າ, ເຊື່ອມໂຍງພະ ລັງງານ ຫ້ອງການຄຸ້ມຄອງຕະຫຼາດພະລັງງານ ພ້ອມດ້ວຍຄະນະ ໄດ້ເຂົ້າພົບປະ ແລະ ເຮັດວຽກຮ່ວມກັບທ່ານ ຄຳມ່ວນ ຊົມສີຫາປັນຍາ ຮອງປະທານກຳມາທິການເສດຖະ ກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດລາວ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ ໃນລະຫວ່າງວັນທີ 17-20 ສິງຫາ 2022.
ການພົບປະເຮັດວຽກຄັ້ງນີ້ ເພື່ອສືບຕໍ່ປະຕິບັດຂໍ້ລິເລີ່ມໂຄງການເຊື່ອມໂຍງພະລັງງານໃນຂົງເຂດພາກພື້ນ ລາວ-ໄທ-ມາເລເຊຍ-ສິງກະໂປ ທີ່ລັດຖະບານລາວ ໄດ້ມີການພົວພັນຮ່ວມມືທາງດ້ານພະລັງງານກັບສິງກະໂປ ເປັນຕົ້ນແມ່ນການຊື້-ຂາຍໄຟຟ້າ ແລະ ອື່ນໆ ທີ່ກ່ຽວຂ້ອງ.
ໃນໂອກາດນີ້, ທ່ານ ຄຳມ່ວນ ຊົມສີຫາປັນຍາ ໄດ້ໃຫ້ຮູ້ວ່າ:​ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດ ລ້ອມ ປະຕິບັດພາລະບົດບາດເປັນເສນາທິການໃຫ້ແກ່ສະພາແຫ່ງຊາດ ແລະ ຄະນະປະຈຳສະພາແຫ່ງຊາດ, ໃນການສ້າງ, ປັບປຸງກົດໝາຍ, ນິຕິກໍາໃຕ້ກົດໝາຍ, ການຄົ້ນຄວ້າບັນຫາສໍາຄັນພື້ນຖານຂອງປະເທດຊາດ, ຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ, ມະຕິຂອງສະພາແຫ່ງຊາດ, ແຜນພັດທະນາເສດຖະ ກິດ-ສັງຄົມ, ແຜນງົບປະມານແຫ່ງລັດ, ຄົ້ນຄວ້າປະກອບຄຳເຫັນກ່ຽວກັບການໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ແລະ ຄຳສະເໜີຂອງປະຊາຊົນ ໃນຂົງເຂດກະສິກໍາ ແລະ ປ່າໄມ້, ໂຍທາທິການ ແລະ ຂົນສົ່ງ, ອຸດສາຫະກໍາ ແລະ ການຄ້າ, ເຕັກໂນໂລຊີ ແລະ ການສື່ສານ, ພະລັງງານ ແລະ ບໍ່ແຮ່ ແລະ ຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ເຂດເສດຖະກິດພິເສດ ໃນບັນດາຈຳນວນ 6 ກະຊວງຄື: ກະຊວງກະສິກຳ ແລະ ປ່າໄມ້, ກະຊວງອຸດສາຫະກໍາ ແລະ ການຄ້າ, ກະຊວງໂຍທາທິການ ແລະ ຂົນສົ່ງ, ກະຊວງເຕັກໂນໂລຊີ ແລະ ການສື່ສານ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ກະຊວງພະລັງງານ ແລະ ບໍ່ແຮ່; ພ້ອມນັ້ນ, ທ່ານຍັງໃຫ້ຮູ້ຕື່ມວ່າ: ການພັດທະນາພະລັງງານໄຟຟ້າ ຂອງ ສປປລາວ ໄດ້ລິເລີ່ມແຕ່ປີ 1970 ເປັນຕົ້ນມາ ເຫັນວ່າມີການຂະຫຍາຍຕົວສູງ ເມື່ອທຽບກັບຂະແໜງເສດຖະກິດອື່ນ ໂດຍກຳລັງການຜະລິດມີອັດຕາການຂະຫຍາຍຕົວສະເລ່ຍປະມານ 17% ຕໍ່ປີ ຈາກ 30 ເມກາວັດ ມາເຖິງທ້າຍປີ 2020 ສປປລາວ ມີແຫຼ່ງຜະລິດໄຟຟ້າທັງໝົດ 82 ແຫ່ງ ລວມກໍາລັງການຜະລິດຕິດຕັ້ງ 10.091 ເມກາວັດ, ສາມາດຜະລິດໄຟຟ້າໄດ້ປະມານ 53.197 ລ້ານກິໂລວັດໂມງຕໍ່ປີ; ໃນປັດຈຸບັນ, ມີແຫລ່ງຜະລິດໄຟຟ້າຈາກເຂື່ອນໄຟຟ້າພະລັງງານນໍ້າ ກວມເອົາ 80,41%, ພະລັງ ງານໄຟຟ້າຖ່ານຫີນ 18,61%, ພະລັງງານຊີວະມວນ ແລະ ພະລັງງານແສງຕາເວັນ 0,98% ຂອງກຳລັງຕິດຕັ້ງໄຟຟ້າທັງໝົດ, ໂຄງການໄຟຟ້ານໍ້າຕົກ ແບບຝາຍນໍ້າລົ້ນ Run of the River ແລະ ມີອ່າງເກັບນໍ້າຂະໜາດນ້ອຍ ກວມເອົາປະມານ 70% ຂອງແຫຼ່ງຜະລິດໄຟຟ້າທັງໝົດ, ຈຳນວນໂຄງການທີ່ມີກຳລັງຕິດຕັ້ງໄຟຟ້າ 15 ເມກາວັດລົງໄປ ແມ່ນມີຫຼາຍກວ່າ 53% ຫຼື ຫຼາຍກວ່າ 21% ຂອງກໍາລັງຕິດຕັ້ງໄຟຟ້າທັງໝົດ.
(ຂ່າວ: ນາງ ສຸພາວັນ ຫອມສະນິດ, ຮູບພາບ: ນາງ ກຸກກິກ ບຸດດາໄຊ)