(ສພຊ) ຕອນບ່າຍຂອງວັນທີ 1 ພະຈິກ 2022 ທີ່ສະພາແຫ່ງຊາດ ທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ມີການພົບປະ ແລະ ເຮັດວຽກ ກັບ ທ່ານ Paul Grove ເຈົ້າໜ້າທີ່ອາວຸໂສ ກຳມາທິການດ້ານຈັດສັນແຜນງົບປະມານ ຂອງສະພາສູງ ສະຫະລັດອາເມລິກາ ພ້ອມດ້ວຍຄະນະຜູ້ແທນ ສະຖານເອກອັກຄະລັດຖະທູດອາເມລິກາ ແລະ ອົງການ USAID.

ໃນການພົບປະຄັ້ງນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນຍາວນານ ບົນພື້ນຖານການເປັນຄູ່ຮ່ວມມື ແບບກວມລວມ ລະຫວ່າງ ສປປລາວ ແລະ ສ.ອາເມລິກາ ເວົ້າລວມ, ເວົ້າສະເພາະ ລະຫວ່າງ ສອງອົງການນິຕິບັນຍັດ ໃຫ້ໄດ້ຮັບການພັດທະນາຍິ່ງໆຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ, ເພື່ອພາລະກິດສັນຕິພາບ, ມິດຕະພາບ ແລະ ການຮ່ວມມື ໃນພາກພື້ນ ແລະ ໃນໂລກ ພ້ອມທັງແລກປ່ຽນຄໍາຄິດຄຳເຫັນນຳກັນກ່ຽວກັບການເປັນເສນາທິການຮັບໃຊ້ໃຫ້ແກ່ສະພາແຫ່ງຊາດ ແລະ ປຶກສາຫາລືທິດທາງແຜນການພົວພັນຮ່ວມມື ລະຫວ່າງ ສອງອົງການນິຕິບັນຍັດ ຂອງສອງປະເທດໃນຕໍ່ໜ້າ.

ໃນຕອນທ້າຍ ທ່ານ Paul Grove ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງສະພາແຫ່ງຊາດລາວ ພ້ອມທັງຢືນຢັນ ຈະສືບຕໍ່ໃຫ້ການສະໜັບສະໜູນແກ່ສະພາແຫ່ງຊາດລາວ ໃນຕໍ່ໜ້າ ເພື່ອເສີມຂະຫຍາຍສາຍພົວພັນມິດຕະພາບອັນດີງາມ ລະຫວ່າງ ສອງປະເທດ ກໍຄື ສອງອົງການນິຕິບັນຍັດ ສ.ອາເມລິກາ ແລະ ສປປລາວ ໃຫ້ໄດ້ຮັບໝາກຜົນຂຶ້ນເລື້ອຍໆ.