ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ເພື່ອເຮັດໃຫ້ວຽກງານຂອງຄະນະເລຂາທິການສະພາປະຊາຊົນແຂວງມີ​ຄວາມ​ເຂັ້ມ​ແຂງ ​ແລະ ປະຕິບັດໜ້າທີ່ທີ່ໄດ້ຮັບມອບໝາຍໃຫ້ສໍາລັດຕາມຄາດໝາຍທີ່ວາງໄວ, ສະນັ້ນ, ມາໃນວັນທີ 17 ຕຸລາ 2022 ທ່ານ ສິງຄໍາ ວົງພະຈັນຮອງ ເລຂາທິການສະພາແຫ່ງຊາດ ພ້ອມ​ດ້ວຍ​ຄະນະ ​ໄດ້ລົງຊຸກຍູ້ ແລະ ເກັບກຳຂໍ້ມູນການເຄື່ອນໄຫວວຽກງານຂອງຄະນະເລຂາທິການສະພາແຫ່ງຊາດ ຢູ່​ສະພາ​ປະຊາຊົນ​ແຂວງ​ຊຽງຂວາງ ໂດຍການໃຫ້ກຽດ​ເຂົ້າຮ່ວມຂອງ ທ່ານ ວຽງໄຊ ສີວິໄລ ກຳມະການພັກແຂວງຮອງປະທານສະພາປະຊາຊົນແຂວງ ແລະ, ມີບັນດາທ່ານຮອງປະທານຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າຂະແໜງ, ພະນັກງານທີ່ມາຈາກສະພາແຫ່ງຊາດ ແລະພະ ນັກງານສະພາປະຊາຊົນແຂວງເຂົ້າຮ່ວມ.

ໃນທີ່ປະຊຸມ ທ່ານ ຄໍາຫລ້າ ແສງຄໍາຢອງ ຮອງເລຂາທິການສະພາປະຊາຊົນແຂວງ ໄດ້ລາຍງານຫຍໍ້ກ່ຽວກັບສະພາບພົ້ນ​ເດັ່ນ, ຂໍ້ຫຍຸ້ງຍາກ ແລະ ຂໍ້ສະດວກໃນການຈັດຕັ້ງປະຕິບັດໜ້າທີ່ວຽກງານທີ່ຂຶ້ນກັບຄະນະເລຂາທິການ ແລະ ວຽກງານອື່ນໆ ທີ່ປິ່ນອ້ອມເປັນຕົ້ນແມ່ນ ຄະນະ​ເລຂາທິການສະພາ​ປະຊາຊົນແຂວງ​ຊຽງ​ຂວາງໄດ້ເອົາໃຈໃສ່ການຈັດຕັ້ງປະຕິບັດວຽກງານສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ລັດຖະກອນດ້ວຍຫຼາຍຮູບການ ​ເຊິ່ງ​ໄດ້​ ປະສານສົມທົບກັບສະພາແຫ່ງຊາດ, ຄະນະປະຈໍາສະພາປະຊາຊົນແຂວງ, ຄະນະເລຂາທິການ, ອົງການປົກຄອງແຂວງ, ບັນດາຂະແໜງການທີ່ກ່ຽວຂ້ອງໃນການກະກຽມ​ເອກະສານ​ຕ່າງໆ​ໂດຍ​ສະ​ເພາະ​ແມ່ນ: ກະກຽມເນື້ອໃນກອງປະຊຸມສະໄໝສາມັນແຕ່ລະຄັ້ງຂອງສະພາປະຊາຊົນແຂວງ, ໄດ້​ປັບປຸງ​ກົງຈັກ​ການຈັດ​ຂອງ​ສະພາ​ປະຊາຊົນ​ແຂວງ, ການ​ສ້າງ​ແຜນ​ລົງ​ເຄື່ອນ​ໄຫວ​ວຽກງານ​ຕ່າງໆ, ​ອໍານວຍ​ຄວາມ​ສະດວກ​ດ້ານ​ງົບປະມານ, ພາຫະນະ ​ແລະ ອື່ນໆ ​​ເພື່ອ​ຮັບປະກັນ​ໃຫ້​ແກ່​ການ​ເຄື່ອນ​ໄຫວ​ວຽກງານ​ຂອງ​ສະພາ​ປະຊາຊົນ​ແຂວງ ​ໃຫ້​ຖືກຕ້ອງ​ຕາມ​ພາລະ​ບົດບາດ, ສິດ ​ແລະ ໜ້າທີ່​ຂອງ​ຕົນ. ໃນທີ່ປະຊຸມຍັງມີການແລກປ່ຽນບົດຮຽນເຊິ່ງກັນໂດຍສະເພາະແມ່ນວຽກງານການກະກຽມເອກະສານໃຫ້ແກ່ກອງປະຊຸມ, ການກະກຽມເອກະສານໃຫ້ຄະນະປະຈໍາສະພາ​ປະຊາຊົນ​ແຂວງ, ການປັບປຸງກົງຈັກການຈັດຕັ້ງຂອງສະພາປະຊາຊົນແຂວງ, ການ​ອໍານວຍ​ຄວາມ​ສະດວກ​ດ້ານ​ຕ່າງໆ ​ໃຫ້​ສະພາ​ປະຊາຊົນ​ແຂວງ​ເຄື່ອນ​ໄຫວ​ວຽກງານ ​ແລະ ອື່ນໆ.

​         ໃນ​​ໂອກາດ​ດັ່ງກ່າວ ​ທ່ານ ສິງຄໍາ ວົງພະຈັນ ໄດ້ສະແດງຄວາມຍ້ອງຍໍຊົມ​ເຊີຍ ຕໍ່ຜົນງານທີ່ຄະນະ​ເລຂາທິການສະພາປະຊາຊົນແຂວງສາມາດຈັດຕັ້ງປະຕິບັດໄດ້ ໃນໄລຍະຜ່ານມາ ແລະ ທ່ານມີຄໍາເຫັນໂອ້ລົມຕໍ່ສະພາປະຊາຊົນແຂວງກໍຄືຄະນະ​ເລຂາທິການ ແລະ ພະນັກງານສະພາປະຊາຊົນແຂວງ ເອົາໃຈໃສ່​ເປັນ​ເສນາ​ທິການ​ທີ່​ດີ​ໃຫ້ການ​ນໍາ​ສະພາ​ປະຊາຊົນ​ແຂວງ, ​ເອົາ​ໃຈ​ໃສ່​ສ້າງ​ຄວາມ​ເຂັ້ມ​ໃຫ້​ພະນັກງານ​ສະພາ​ປະຊາຊົນ​ແຂວງ, ຍົກ​ສູງ​ພາລະ​ບົດບາດ​ຂອງ​ສະພາ​ປະຊາຊົນ​ແຂວງ​ກໍ່​ຄື​ສະພາ​ແຫ່ງ​ຊາດ​ໃຫ້​ສູງ​ຂຶ້ນ​ກວ່າ​ເກົ່າ ​ແລະ ທ່ານ​ຍັງ​ຮັບ​ເອົາ​ບັນດາ​ຂໍ້​ສະ​  ເໜີຂອງ​ຄະນະ​ເລຂາທິການ​ນໍາ​ໄປສະ​ເໜີຕໍ່​ຄະນະ​ປະ​ຈໍາ​ສະພາ​ແຫ່ງ​ຊາດ.

ສະພາປະຊາຊົນແຂວງຊຽງຂວາງ

ຂ່າວ​​ໂດຍ: ນາງ ສຸກສະຫວັນ ອິນທະແສງ