ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

            (ສພຊ) ໃນຕອນບ່າຍຂອງວັນທີ 3 ພຶດສະພາຜ່ານມາ, ທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ໄດ້ຕ້ອນຮັບ ທ່ານ IM MOO HONG ເອກອັກຄະລັດຖະທູດ ແຫ່ງ ສ.ເກົາຫຼີ ປະຈຳ ສປປລາວ ພ້ອມດ້ວຍຄະນະບໍລິຫານ ມູນນິທິ ໂກ ແອນ ດູ, ສ. ເກົາຫຼີ, ເນື່ອງໃນໂອກາດທີ່ຄະນະໄດ້ເດີນທາງມາເຮັດວຽກຢູ່ ສປປລາວ.
​             ທ່ານຮອງເລຂາທິການສະພາແຫ່ງຊາດ ໄດ້ກ່າວຕ້ອນຮັບ ທ່ານທູດ ດ້ວຍບັນຍາກາດອົບອຸ່ນ ແລະ ເປັນກັນເອງ, ພ້ອມນີ້ ກໍໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ມູນນິທິ ໂກ ແອນ ດູ, ສ.ເກົາຫຼີ ກໍຄືລັດຖະບານ ແລະ ປະຊາຊົນ ສ.ເກົາຫຼີ ທີ່ໄດ້ເຫັນຄວາມສຳຄັນໃນການຊ່ວຍເຫຼືອ ສປປລາວ ກໍຄືສະພາແຫ່ງຊາດ ໃນໄລຍະຜ່ານມາ ເປັນຕົ້ນແມ່ນການຊ່ວຍເຫຼືອທາງດ້ານພາຫະນະ ລົດກູ້ໄພ ແລະ ລົດດັບເພີງ ເຊິ່ງໄດ້ຕອບສະໜອງຕໍ່ຄວາມຕ້ອງການຂອງ ສປປລາວ, ທ່ານຮອງເລຂາທິການສະພາແຫ່ງຊາດ ຍັງໄດ້ຢືນຢັນຈະອຳນວຍຄວາມສະດວກໃຫ້ແກ່ ການຊ່ວຍເຫຼືອຂອງ ສ.ເກົາຫຼີ ຕາມຄວາມເໝາະສົມ.
​           ຈາກນັ້ນ, ທ່ານເອກອັກຄະລັດຖະທູດ ສ.ເກົາຫຼີ ກ່າວວ່າຈະສືບຕໍ່ໃຫ້ການຊ່ວຍເຫຼືອແກ່ ສປປລາວ ໃນຕໍ່ໜ້າ ແລະ ຈະສົ່ງຊ່ຽວຊານ ມາເຝິກອົບຮົມທາງດ້ານເຕັກນິກການນຳໃຊ້ ແລະ ການບຳລຸງຮັກສາ ພາຫະນະທີ່ໄດ້ຮັບການຊ່ວຍເຫຼືອ, ພ້ອມທັງສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້.