ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                 ວັນທີ 22 ກໍລະກົດ 2022 ນີ້, ທ່ານ ສາຍອູ ພູມສາລີ ຮອງຫົວໜ້າສະຖາບັນຄົ້ນຄວ້ານິຕິກໍາ ສະພາແຫ່ງຊາດ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບສະພາປະຊາຊົນແຂວງ ເຊກອງ ເຊິ່ງໃຫ້ການຕ້ອນຮັບໂດຍທ່ານ ນາງ ຄໍາເສັງ ທຸມມະວົງສາ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາ, ຄະນະກໍາມະການ, ຄະນະເລຂາທິການ ພ້ອມດ້ວຍພະນັກງານ-ລັດຖະກອນສະພາປະຊາຊົນແຂວງ ເຂົ້າຮ່ວມ ຢູ່ທີ່ສະໂມສອນສະພາປະຊາຊົນແຂວງ ເຊກອງ.
           ທ່ານ ສາຍອູ ພູມສາລີ ໄດ້ກ່າວວ່າ: ຈຸດປະສົງການລົງມາເຄື່ອນໄຫວຢ້ຽມຢາມ ແລະ ເຮັດວຽກ ຮ່ວມກັບ ສະພາປະຊາຊົນແຂວງ ເຊກອງ ໃນຄັ້ງນີ້ ກໍເພື່ອເປັນການປະຕິບັດພາລະບົດບາດຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ໃນການເປັນເສນາທິການ ແລະ ການເປັນໃຈກາງໃນການຄົ້ນຄວ້າວິທະຍາສາດ, ການຍົກສູງຂີດຄວາມສາມາດ, ການສະໜອງຂໍ້ມູນ-ຂ່າວສານໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ ໃຫ້ມີປະສິດທິພາບ ແລະ ປະສິທິຜົນສູງ. ພ້ອມນີ້, ຍັງເປັນການຕິດຕາມ, ກະຕຸກຊຸກຍູ້ ແລະ ເກັບກໍາຂໍ້ມູນພື້ນຖານໃຫ້ແກ່ການກໍານົດຫົວຂໍ້, ເນື້ອໃນ ແລະ ຮູບການ ໃນການຝຶກອົບຮົມ, ການຄົ້ນຄວ້າ ແລະ ການສະໜອງຂໍ້ມູນ-ຂ່າວສານ ໃຫ້ແກ່ ສສຊ-ສສຂ ແລະ ວິຊາການທີ່ເປັນເສນາທິການ, ທັງເປັນການປັບປຸງຂອດການປະສານງານ ໃນການປະຕິບັດວຽກງານທີ່ກ່ຽວຂ້ອງ ລະຫວ່າງ ສະຖາບັນ ກັບ ສະພາປະຊາຊົນແຂວງ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.
          ພ້ອມນັ້ນ, ທ່ານ ນາງ ຄໍາໄພ ວິລະສານ ເລຂາທິການ ສະພາປະຊາຊົນແຂວງ ເຊກອງ ໄດ້ລາຍງານໂດຍຫຍໍ້ກ່ຽວກັບຜົນສໍາເລັດການເຄື່ອນໄຫວວຽກງານ ນັບແຕ່ກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງເຊກອງ ຊຸດທີ II ຮອດປະຈຸບັນ ແລະ ທິດທາງແຜນການໃນຕໍ່ໜ້າ ໂດຍສະເພາະບັນດາໜ້າວຽກທີ່ຕິດພັນກັບແຜນການເຄື່ອນໄຫວຂອງສະຖາບັນຄົ້ນຄວ້ານິຕິກໍາ ສະພາແຫ່ງຊາດເປັນຕົ້ນ: ການຈັດຕັ້ງປະຕິບັດວຽກງານການຝຶກອົບຮົມ-ສໍາມະນາ, ວຽກງານການປັບປຸງຫ້ອງສະໝຸດ ຫຼື ຫ້ອງອ່ານ, ການສ້າງຖານຂໍ້ມູນ ແລະ ສະໜອງຂໍ້ມູນໃຫ້ແກ່ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃນແຕ່ລະໄລຍະ, ການສ້າງ ແລະ ປັບປຸງນິຕິກໍາໃຕ້ກົດໝາຍ ຂອງສະພາປະຊາຊົນແຂວງ ແລະ ດ້ານການຕິດຕາມກວດກາການຈັດຕັ້ງປະຕິບັດນິຕິກໍາໃຕ້ກົດໝາຍ ແລະ ບັນຫາສໍາຄັນຕ່າງໆຂອງທ້ອງຖິ່ນ.
                 ພາຍຫຼັງທີ່ໄດ້ຮັບຟັງການລາຍງານຂອງ ທ່ານ ເລຂາທິການສະພາປະຊາຊົນແຂວງແລ້ວ ບັນດາຜູ້ແທນກອງປະຊຸມກໍໄດ້ພ້ອມກັນປະກອບຄໍາຄິດຄໍາເຫັນ, ແລກປ່ຽນ, ຖອດຖອນບົດຮຽນເຊິ່ງກັນ ແລະ ກັນ ຢ່າງມີຈຸດສຸມ ເຊິ່ງເຫັນໄດ້ຫຼາຍບັນຫາທີ່ເກີດຂຶ້ນຢູ່ໃນທ້ອງຖິ່ນ ແລະ ຍັງມີຄວາມຕ້ອງການຫຼາຍໆຢ່າງ ທີ່ຈະໄດ້ພ້ອມກັນປັບປຸງແກ້ໄຂໃຫ້ເປັນລະບົບຄົບຊຸດ ແລະ ໃຫ້ມີຄວາມໜັກແໜ້ນເຂັ້ມແຂງຍິ່ງຂຶ້ນ.
#ໂດຍ:ນາລີວັນ.