ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

          ວັນທີ 30 ມີນາ 2022 ນີ້ ຢູ່ທີ່ຫ້ອງປະຊຸມຫ້ອງວ່າການແຂວງອຸດົມໄຊ ໄດ້ຕ້ອນຮັບການເຂົ້າຢ້ຽມຢາມ ແລະ ເຮັດວຽກຂອງທ່ານ ພົທ ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ(ສພຊ) ພ້ອມດ້ວຍຄະນະ ໄດ້ລົງມາເຄື່ອນໄຫວເຮັດວຽກຮ່ວມກັບ ສະພາປະຊາຊົນແຂວງ ແລະ ອົງການປົກຄອງແຂວງ ອຸດົມໄຊ ໂດຍມີທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງແຂວງອຸດົມໄຊ, ມີທ່ານ ຄຳດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ, ບັນ ດາທ່ານຄະນະປະຈໍາພັກແຂວງ, ກໍາມະການພັກແຂວງ, ຄະນະປະຈໍາສະພາປະຊາຊົນແຂວງ, ພ້ອມດ້ວຍສະມາຊິກສະ ພາປະຊາຊົນຂັ້ນແຂວງ ແລະ ພະແນກການອ້ອມຂ້າງແຂວງ ແລະ ວິຊາການຂະແໜງກ່ຽວຂ້ອງເຂົ້າຮ່ວມ.

            ກອງປະຊຸມທ່ານ ບຸນຄົງ ຫຼ້າຈຽມພອນ ເຈົ້າແຂວງໆອຸດົມໄຊ ໄດ້ຂຶ້ນລາຍງານສະພາບລວມ ແລະ ບາງວຽກງານທີ່ພົ້ນເດັ່ນໂດຍສະເພາະໄດ້ເອົາໃຈໃສຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ, ມະຕິກອງປະ ຊຸມໃຫຍ່ຂອງແຂວງ ແລະ ແຜນພັດທະນາເສດຖະກິດສັງຄົມ, ແຜນຍຸດທະສາດ 4 ໃຈກາງ, ພ້ອມນັ້ນ ກໍ່ໄດ້ສຸມໃສ່ແກ້ວຽກງານທີ່ເປັນຈຸດສຸມສຳຄັນເຊິ່ງລວມທັງການຊົດເຊີຍ ແລະ ແກ້ໄຂຜົນກະທົບຈາກການກໍ່ສ້າງໂຄງການທາງລົດໄຟລາວ-ຈີນ, ຈັດຕັ້ງປະຕິບັດສອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດໄດ້ຮັບຜົນສຳເລັດໃນຂັ້ນພື້ນຖານ, ເຮັດໃຫ້ທົ່ວແຂວງມີຄວາມສະຫງົບ. ການຜະລິດ, ການດຳເນີນທຸລະກິດເຖິ່ງຈະໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ກໍ່ຕາມ, ໃນປີ 2021 ເສດຖະ ກິດຂອງແຂວງຂະຫຍາຍຕົວລະດັບ 3,83% ສະເລ່ຍລາຍຮັບຕໍ່ຫົວຄົນປະຕິບັດໄດ້ 1.663 ໂດລາ/ຄົນ/ປີ. ພາຍຫຼັງເປີດການນຳໃຊ້ທາງລົດໄຟລາວ-ຈີນ ກໍ່ເຫັນວ່າວຽກງານທ່ອງທ່ຽວ, ການເຄື່ອນໄຫວທາງລັດຖະການ ແລະ ການສະເໜີລົງທຶນພັດທະນາກິດຈະການຕ່າງໆ ຂອງພາກເອກະຊົນຢູ່ແຂວງອຸດົມໄຊ ໄດ້ເປັນຂະບວນຟົດຟື້ນ.

          ໃນໂອກາດດັ່ງກ່າວຜູ້ແທນເຂົ້າຮ່ວມກອງປະຊຸມຍັງໄດ້ພັດປ່ຽນກັນປະກອບຄຳເຫັນກ່ຽວກັບໂຄງການກໍ່ສ້າງເສັ້ນທາງລົດໄຟລາວ-ຈີນ ທີ່ສົ່ງຜົນກະທົບຕໍ່ການຜະລິດຂອງປະຊາຊົນ ແລະ ຂອບເຂດຂອງການພັດທະນາບັນຫາການຊົດເຊີຍທີ່ດິນ, ສິ່ງກໍ່ສ້າງ, ຜົນກະທົບທາງອ້ອມ ແລະ ການດໍາເນີນເກັບກໍາຂໍ້ມູນຄືນໃໝ່ທີ່ປິ່ນອ້ອມກ່ຽວກັບການດຳເນີນກິດຈະການ ພ້ອມດຽວກັນກໍ່ເພື່ອກະຕຸກຊຸກຍູ້ໃຫ້ມີຄວາມສະດວກ, ຖືກຕ້ອງຕາມລະບຽບຫຼັກການ ແລະ ແຜນການທີ່ວາງໄວ້.

          ໃນໂອກາດເຄື່ອນໄຫວຢ້ຽມຢາມແຂວງອຸດົມໄຊຄັ້ງນີ້ ທ່ານ ພົທ ສຸວອນ ເລືອງບຸນມີ ກຳມະການສູນກາງພັກ ຮອງປະທານສະພາແຫ່ງຊາດ ກໍ່ໄດ້ໂອ້ລົມຊີ້ນຳບາງບັນຫາ, ໃຫ້ຍົກສູງປະສິດຕິພາບການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ, ເພີມທະວີການປຸກຈິດສຳນຶກແນວຄິດໃຫ້ມີສະຕິໃນການເຄົາລົບກົດໝາຍ, ເຜີຍແຜ່ບັນດາກົດ ໝາຍ, ນິຕິກຳໃຫ້ກວ້າງຂວາງ, ເລິກເຊິງ. ຈັດຕັ້ງປະຕິບັດວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການສົ່ງເສີມການຜະລິດທົດແທນການນຳເຂົ້າ ແລະ ເປັນສິນຄ້າສົ່ງອອກ ຕິດພັນກັບການແກ້ໄຂຄວາມທຸກຍາກຂອງປະຊາຊົນ, ສົ່ງເສີມປະຊາຊົນທຳການຜະລິດກະສິກຳໃຫ້ເປັນສິນຄ້າ ປູກພືດຜັກ, ລ້ຽງສັດເພື່ອເປັນສະບຽງອາຫານ, ໃຫ້ປະຊາຊົນມີຄວາມກະຕືລືລົ້ນເຮັດການຜະລິດ, ຮູ້ຄ້າຂາຍ, ເສີມຂະຫຍາຍທ່າແຮງທີ່ມີຂອງແຂວງເພື່ອບຸກທະລຸເຮັດໃຫ້ການພັດທະນາຂອງແຂວງນັບມື້ກ້າວຂຶ້ນ.

(ພາບ ແລະ ຂ່າວ: ແສງພອນ ອິນນະລົງ).