ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

          ວັນທີ 28 ມີນາ 2022 ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ(ສພຊ)ພ້ອມດ້ວຍຄະນະ ເຄື່ອນໄຫວເຮັດວຽກຮ່ວມກັບສະພາປະຊາຊົນແຂວງ ອຸດົມໄຊ, ຕ້ອນຮັບໂດຍທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ ແລະ ບັນດາທ່ານໃນຄະນະປະຈໍາສະພາປະຊາຊົນແຂວງເຂົ້າຮ່ວມ ຢູ່ທີ່ຫ້ອງປະຊຸມ ສພຂ.

          ພາຍຫຼັງຄະນະຈັດຕັ້ງພິທີໄດ້ກ່າວຈຸດປະສົງຂອງກອງປະຊຸມແລ້ວ, ທ່ານ ຄໍາດີ ວົງລ້ອມ ຕາງໜ້າຄະນະປະຈໍາ ສພຂ ອຸດົມໄຊ ໄດ້ລາຍງານໂດຍຫຍໍ້ຕໍ່ທ່ານຮອງປະທານສະພາແຫ່ງຊາດ (ສພຊ) ກ່ຽວກັບກົງຈັກການຈັດຕັ້ງຂອງສະພາປະຊາຊົນແຂວງ ອຸດົມໄຊ, ການເຄື່ອນໄຫວວຽກງານທີ່ພົ້ນເດັ່ນໃນໄລ ຍະຜ່ານມາ ແລະ ລາຍງານຄວາມຄືບໜ້າການຊົດເຊີຍຕໍ່ຜົນກະທົບຂອງໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ບັນຫາອື່ນໆ ອີກຈໍານວນໜຶ່ງ.

         ຈຸດປະສົງຂອງການລົງເຄື່ອນໄຫວຂອງທ່ານຮອງປະທານສະພາແຫ່ງຊາດ(ສພຊ) ພ້ອມດ້ວຍຄະນະຄັ້ງນີ້ ແມ່ນ ເພື່ອຊຸກຍູ້, ຕິດຕາມກວດກາ, ເກັບກໍາສະພາບການຕ່າງໆ ຢູ່ແຂວງອຸດົມໄຊ. ພ້ອມດຽວກັນນັ້ນ ຈະໄດ້ລົງເຄື່ອນໄຫວຕົວຈິງ ຢູ່ບັນດາເມືອງທີ່ຖືກຜົນກະທົງຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ຢູ່ເມືອງນາໝໍ້, ເມືອງໄຊ ແລະ ເມືອງງາ ຈົນເຖິ່ງວັນທີ 30 ມີນາ 2022 ຈຶ່ງຈະສຳເລັດຕາມແຜນການ.

(ພາບ ແລະ ຂ່າວ: ແສງພອນ ອິນນະລົງ).