ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 18 ຕຸລາ 2022 ທ່ານ ພົຕ ປອ ວົງສັກ ພັນທະວົງ ປະທານ ກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ, ໄດ້ລົງມາເຮັດວຽກຮ່ວມກັບ ຄະນະກຳມະການ ຍຸຕິທຳ ແລະ ປກຊ-ປກສ​ ສະພາປະຊາຊົນ ນວ, ເຊິ່ງໃຫ້ການຕ້ອນຮັບໂດຍ ທ່ານ ບຸນທາມ​ ພຸດທະວົງສາ​ ຮອງປະທານ ສະພາປະຊາຊົນ​ ນວ​, ມີ ທ່ານ ນາງສົມພຽນ​ ວົງໄຊ​ ປະທານ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນ ນວ​, ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ນວ ​ສັງກັດ​ຄະນະກຳມະການ​ ແລະ ພະນັກງານ ທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມປຶກສາຫາລືຄັ້ງນີ້, ໄດ້ສຸມໃສ່ການລົງເຄື່ອນໄຫວຕິດຕາມກວດກາຂົງເຂດວຽກງານ ປກຊ-ປກສ ແລະ ສະຫະພັນນັກຮົບເກົ່າ. ໃນນັ້ນ, ໄດ້ຮັບຟັງການລາຍງານການຈັດຕັ້ງປະຕິບັດຂົງເຂດວຽກງານຕ່າງໆ ໃນໄລຍະຜ່ານມາ ເປັນຕົ້ນ: ບັນຫາຢາເສບຕິດ ໄດ້ກວດພົບເປົ້າໝາຍທີ່ພົວພັນກ່ຽວກັບຢາເສບຕິດ​ ເປັນຕົ້ນ ການຊື້ຂາຍ,​ ການຄອບຄອງ,​ ການຜະລິດ, ການຂົນສົ່ງ ແລະ ການມົ້ວສຸມຈຳນວນໜຶ່ງ. ໄດ້ສະກັດກັ້ນແກ້ໄຂເປົ້າໝາຍຊື້-ຂາຍ, ຄອບຄອງ, ຜະລິດ, ຂົນສົ່ງຢາເສບຕິດ 730 ເລື່ອງ, ຍຶດຂອງກາງຢາບ້າ ໄດ້ 4,778,444 ເມັດ, ຢາໄອສ 37 ກິໂລ 215,7 ກຼາມ 17 ຖົງໃຫຍ່, 99 ຖົງນ້ອຍ; ເຮໂລອິນ 10 ແພັກ 1 ແທ່ງ ກັບ 10 ຖົງນ້ອຍ; ໂຄເຄນ 1 ຖົງນ້ອຍ; ຢາອີ 2 ຖົງ ກັບ 38 ເມັດ; ກັນຊາ 500 ກຼາມ ກັບ 2 ຖົງນ້ອຍ; ເຄຕາມິນ 10 ຖົງນ້ອຍ ກັບ 22 ເມັດ; ຢາສູບໄຟຟ້າ 15 ອັນ; ບັ້ງແກັດ 20 ບັ້ງ; ປຸມເປົ້າບັນຈຸສານເສບຕິດ 155 ໜ່ວຍ; ກາເຟມີສານເສບຕິດ 3 ຖົງ; ຜົງຂາວ 5 ຖົງນ້ອຍ; ຢາເສບຕິດເປັນຜົງສີເຫຼືອງ ສີເທົາ ສີຂາວ 40 ເປົ໋າ ກັບ 1,186 ກຼາມ; ປືນສັ້ນ 17 ກະບອກ ພ້ອມກະສຸນ 161 ລູກ ແລະ ຍຶດລົດໃຫຍ່ 13 ຄັນ, ລົດຈັກ 56 ຄັນ, ເຄື່ອງປໍ້າຢາບ້າ 1 ເຄື່ອງ ແລະ ໄດ້ອາຍັດທີ່ດິນ ແລະ ເຮືອນຈຳນວນໜຶ່ງ. ໄດ້ຊ່ວຍເຫຼືອຜູ້ຕິດຢາເສບຕິດເຂົ້າສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ (ສົມສະຫງ່າ) 2,020 ຄົນ, ຍິງ 83 ຄົນ, ປິ່ນປົວດີກັບຄືນສູ່ຄອບຄົວ 676 ຄົນ, ຍິງ 23. ນອກຈາກນັ້ນ, ຍັງໄດ້ຈັດຕັ້ງປະຕິບັດວາລະແຫ່ງຊາດໃນການສະກັດກັ້ນແກ້ໄຂບັນຫາຢາເສບຕິດທີ່ລັກຂົນຂ້າມຊາຍແດນຕາມແມ່ນໍ້າຂອງ ທັງໝົດ 6 ເທ່ືອ, ກັກໂຕໄດ້ 7 ຄົນ, ກັກຂອງກາງປະເພດຢາບ້າ ທັງໝົດ 12 ມັດ 300,369 ເມັດ, ເງິນບາດ 12.100 ບາດ ແລະ 580.000 ກີບ, ໄດ້ລົງກວດກາລາດຕະເວນພົບຜູ້ລະເມີດຊາຍແດນ ທັງໝົດ 8 ເທື່ອ, ກັກໂຕໄດ້ 16 ຄົນ, ຍິງ 8 ຄົນ ແລະ ຮັບຟັງການລາຍງານຂົງເຂດວຽກາງນອື່ນໆອີກຈຳນວນໜຶ່ງ.

ໃນຕອນທ້າຍ, ທ່ານ ພົຕ ວົງສັກ ພັນທະວົງ ປະທານກຳມາທິການ ປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ແລະ ທ່ານ ບຸນທາມ ພຸດທະວົງສາ ຮອງປະທານ ສະພາປະຊາຊົນ ນວ ກໍໄດ້ມີຄຳເຫັນແລກປ່ຽນການ ລາຍງານຂອງແຕ່ລະຂົງເຂດວຽກງານ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ການຈັດ ຕັ້ງປະຕິບັດຂອງພາກສ່ວນກ່ຽວຂ້ອງທີ່ໄດ້ປະ ຕິບັດໜ້າທີ່ດ້ວຍຄວາມຫ້າວຫັນ ແລະ ໃຫ້ສືບຕໍ່ເອົາໃຈໃສ່ປະຕິບັດຄາດໝາຍ ແລະ ທິດ ທາງແຜນການໃນຕໍ່ໜ້າໃຫ້ບັນລຸຄາດໝາຍ ແລະ ສຳເລັດຕາມແຜນທີ່ວາງໄວ້.

ໃນພາກບ່າຍຂອງມື້ດຽວກັນນັ້ນ, ຄະນະດັ່ງກ່າວ ໄດ້ລົງເຮັດວຽກຢູ່ສູນປິ່ນປົວຜູ້ຕິດຢາເສບຕິດ ນວ ແລະ ຄ້າຍຄຸມຂັງກອງບັນຊາການ ນວ ນາໄຫ-ນາໂນ.