ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

    (ສພຊ) ໃນລະຫວ່າງວັນທີ 14-17 ກຸມພາ 2022, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ (ສພຊ) ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍຄະນະ ໄດ້ສົມທົບກັບສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ (ສສຂ) ເຄື່ອນໄຫວພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ແລະ ຜົນສໍາເລັດກອງປະຊຸມສະພາປະຊາຊົນແຂວງ(ສພຂ) ສະຫວັນນະເຂດ ຊຸດທີ II ຢູ່ທີ່ສະໂມສອນເມືອງວິລະບູລີ ແຂວງສະຫວັນນະເຂດ, ຈຸດສຸມກະແຕບ-ນາຜາດ່າງ ແລະ ເຂດຈຸດສຸມເມືອງວັງ ມີບັນດາທ່ານຄະນະນໍາຂອງເມືອງ, ນາຍ ແລະ ພົນທະຫານ, ນາຍ ແລະ ພົນຕໍາຫລວດ, ພະນັກງານ-ລັດຖະກອນ, ຄະນະອໍານາດການປົກຄອງບ້ານເທດສະບານອ້ອມຂ້າງເມືອງວິລະບູລີ, ຄະນະອໍານາດການປົກຄອງບ້ານພ້ອມດ້ວຍປະຊາຊົນເຂດຈຸດສຸມກະແຕບ ແລະ ຈຸດສຸມເມືອງວັງ ເຂົ້າຮ່ວມ.

ໃນໂອກາດນີ້, ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບລວມຂອງການນໍາພາ-ຊີ້ນໍາວຽກງານແຕ່ລະດ້ານ ແລະ ທິດທາງວຽກງານຈຸດສຸມປີ 2022 ຂອງເມືອງວິລະບູລີ; ຮັບຟັງບົດລາຍງານຫຍໍ້ການຊີ້ນໍາ-ນໍາພາຂອງຈຸດສຸມກະແຕບ-ນາຜາດ່າງ ແລະ ບົດລາຍງານຫຍໍ້ການຊີ້ນໍາ-ນໍາພາຂອງຈຸດສຸມເມືອງວັງ ຈາກທ່ານຫົວໜ້າຈຸດສຸມດັ່ງກ່າວ; ຈາກນັ້ນ, ກອງປະຊຸມໄດ້ຮັບຟັງການເຜີຍແຜ່ຜົນສໍາເລັດກອງປະຊຸມ ສພຂ ສະຫວັນະເຂດ ຊຸດທີ II.

ໂອກາດດັ່ງກ່າວ, ທ່ານ ປອ. ນາງ ສູນທອນ ໄຊຍະຈັກ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຕີລາຄາສູງຕໍ່ຜົນງານການເມືອງທີ່ຍາດມາໄດ້ ພ້ອມທັງເຜີຍແຜ່ຜົນສໍາເລັດກອງປະຊຸມສະໄໝສາມັນຂອງ ສພຊ ຊຸດທີ IX ເຊິ່ງໄດ້ພິຈາລະນາຮັບຮອງເອົາຫຼາຍບັນຫາສໍາຄັນຂອງຊາດ, ຂອງທ້ອງຖິ່ນ ແລະ ໄດ້ອອກເປັນມະຕິກອງປະຊຸມຈໍານວນຫຼາຍມະຕິ ທີ່ລັດຖະບານ ແລະ ອົງການປົກຄອງທ້ອງຖິ່ນ ໄດ້ສຸມໃສ່ຈັດຕັ້ງປະຕິບັດ. ທ່ານຮອງປະທານສະພາແຫ່ງຊາດໄດ້ເນັ້ນໃຫ້ອໍານາດການປົກຄອງເມືອງ, ອໍານາດການປົກຄອງບ້ານຈຸດສຸມ ເອົາໃຈໃສ່ຈັດຕັ້ງປະຕິບັດວາລະແຫ່ງຊາດ, ລັດຖະທໍາມະນູນ, ກົດໝາຍ ແລະ ມະຕິຕ່າງໆຢ່າງເຂັ້ມງວດ. ພ້ອມນັ້ນ, ຍັງໄດ້ຮັບຟັງຂໍ້ສະເໜີຕ່າງໆ ຈາກອົງການປົກຄອງບ້ານ ກໍຄືພໍ່ແມ່ປະຊາຊົນ ໃນສອງເຂດຈຸດສຸມດັ່ງກ່າວ.

    ຈາກນັ້ນ, ຄະນະ ໄດ້ມອບເຄື່ອງຊ່ວຍເຫລືໃຫ້ປະຊາຊົນ ແລະ ໂຮງຮຽນບ້ານກະແຕບ (ຈຸດສຸມກະແຕບ), ໂຮງຮຽນແກ້ວວິໄລ (ຈຸດສຸມເມືອງວັງ), ຫ້ອງວ່າການປົກຄອງເມືອງວິລະບູລີ ແລະ ສະພາປະຊາຊົນແຂວງສະຫວັນນະເຂດ ເຊິ່ງປະກອບມີ: ຜ້າອັດປາກ-ດັງ, ເຈວລ້າງມື, ທິດຊູປຽກ, ເຄື່ອງນຸ່ງຫົມ, ຖົງພາຍ ແລະ ອຸປະກອນການຮຽນ (ປຶ້ມ, ສໍສີ, ຢາງລຶບ ແລະ ໄມ້ບັນທັດ) ແລະ ອຸປະກອນກິລາຈໍານວນໜຶ່ງ ລວມມູນຄ່າທັງໝົດ 26 ລ້ານກວ່າກີບ ແລະ ອຸປະກອນກອງປະຊຸມທາງໄກ (ສະມາດບອດ) 1 ເຄື່ອງມູນຄ່າ 150 ລ້ານກີບ; ພ້ອມນັ້ນ, ໄດ້ຢ້ຽມຢາມກຸ່ມການຜະລິດໝາກກ້ຽງ ເພື່ອຢ້ຽມຊົມຜົນຜະລິດຂອງປະຊາຊົນທີ່ເປັນຄອບຄົວຕົວແບບດ້ານການຜະລິດຂອງເມືອງວິລະບູລີ ແລະ ຢ້ຽມຊົມບໍ່ຄໍາເຊໂປນ (ອ່າງນໍ້າຫາງແຫ່) ເພື່ອເກັບກໍາຂໍ້ມູນກ່ຽວກັບການບໍາບັດນໍ້າເສຍ ແລະ ຊຸກຍູ້ໃຫ້ບໍລິສັດຂຸດຄົ້ນແຮ່ທາດດັ່ງກ່າວ ເອົາໃຈໃສ່ໃນການຮັກສາສິ່ງແວດລ້ອມ ແລະ ສ້າງເງື່ອນໄຂອໍານວຍຄວາມສະດວກໃຫ້ແກ່ພໍ່ແມ່ປະຊາຊົນເຂດດັ່ງກ່າວ ໂດຍສະເພາະແມ່ນເອົາໃຈໃສ່ໃນການປັບປຸງ-ປົວແປງຖະໜົນຫົນທາງໃຫ້ດີຂຶ້ນ.

​​​​​(ພາບ ແລະ ຂ່າວ: ກົງໃຈ ແສງອໍາພັນ)