ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 12 ກຸມພາ 2022 ທີ່ໂຮງຮຽນປະຖົມສົມບູນບ້ານກີ່ວກອກ ເມືອງໄຊສະຖານ ແຂວງໄຊຍະບູລີ ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ (ສພຊ) ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ ພ້ອມດ້ວຍຄະນະ ຮ່ວມກັບສະພາປະຊາຊົນແຂວງ, ສະມາຊິກສະພາປະຊາຊົນແຂວງ ນໍາໂດຍທ່ານ ສີສະໝອນ ນາມມະວົງ ຮັກສາການເຈົ້າເມືອງໄຊສະຖານ ໄດ້ພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ແລະ ກອງປະຊຸມສະພາປະຊາຊົນແຂວງໄຊຍະບູລີ ຊຸດທີ II ເຂົ້າຮ່ວມມີນາຍບ້ານ-ຮອງນາຍບ້ານ, ຜູ້ຊີ້ນໍາວຽກງານບ້ານ ແລະ ພໍ່ແມ່ປະຊາຊົນ.

ໂອກາດນີ້, ໄດ້ຮັບຟັງລາຍງານຫຍໍ້ກ່ຽວກັບສະພາບທີ່ຕັ້ງ ແລະ ຈຸດພິເສດຈາກຮອງນາຍບ້ານກີ່ວກອກ ແລະ ໄດ້ຕາງໜ້າໃຫ້ພໍ່ແມ່ປະຊາຊົນມີຄຳສະເໜີ ເປັນຕົ້ນແມ່ນການຍົກລະດັບເສັ້ນທາງໃຫ້ສະດວກ ແລະ ທາງເຂົ້າບ້ານ; ຈາກນັ້ນ, ສະມາຊິກສະພາປະຊາຊົນແຂວງກໍໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງ ຊຸດທີ II.

ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຍ້ອງຍໍຊົມເຊີຍຕໍ່ມູນເຊື້ອດຸໝັ່ນຂະຫຍັນພຽນຂອງພໍ່ແມ່ປະຊາຊົນທີ່ສາມາດເຮັດການຜະລິດກຸ້ມຢູ່ກຸ້ມກິນ ພ້ອມທັງໄດ້ເຜີຍແຜ່ຜົນສໍາເລັດກອງປະຊຸມສະໄໝສາ ມັນເທື່ອທີ 2 ຂອງ ສພຊ ຊຸດທີ IX ທີ່ໄດ້ພິຈາລະນາຮັບຮອງເອົາຫລາຍບັນຫາສໍາຄັນທີ່ເປັນພື້ນຖານຂອງຊາດ ແລະ ຂອງທ້ອງຖິ່ນເປັນຕົ້ນແມ່ນການສ້າງ ແລະ ປັບປຸງກົດໝາຍ ແລະ ອື່ນໆ ພ້ອມທັງມອບເຄື່ອງຊ່ວຍເຫລືອຈໍານວນໜຶ່ງໃຫ້ແກ່ອໍານາດການປົກຄອງໄປແຈກຢາຍໃຫ້ຄອບຄົວທຸກຍາກພາຍໃນບ້ານກີ່ວກອກ.

ໃນໂອກາດດຽວກັນນີ້, ຄະນະ ຍັງໄດ້ສົມທົບກັບຄະນະປະທານສະພາແຂວງ ພ້ອມດ້ວຍສະມາຊິກສະພາແຫ່ງຊາດປະຈໍາເຂດເລືອກຕັ້ງ ໄດ້ພົບປະກັບອໍານາດການປົກຄອງເມືອງ ແລະ ບັນດາອົງການ, ຫ້ອງການ ແລະ ອໍານາດການປົກຄອງບ້ານອ້ອມຂ້າງເມືອງໄຊສະຖານ ແລະ ໄດ້ມອບເງິນສົດ ຈໍານວນ 8 ລ້ານກວ່າກີບ ໃຫ້ອໍານາດການປົກຄອງເມືອງ ເພື່ອນໍາໄປຊື້ສັງກະສີມອບ ໃຫ້ແກ່ບ້ານກີ່ວກອກອີກດ້ວຍ.

(ພາບ ແລະ ຂ່າວ: ສອນສັກ ວັນວິໄຊ)