(ສພຊ) ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 7 ນໍາໂດຍທ່ານ ພົທ. ສຸວອນ ເລືອງບຸນມີກຳມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍສະມາຊິກສະພາປະຊາຊົນແຂວງ (ສສຂ) ໄຊຍະບູລີປະຈຳເມືອງໄຊສະຖານ ແລະ ຄະນະ ໄດ້ເຄື່ອນໄຫວພົບປະພະນັກງານຫຼັກແຫຼ່ງຂອງເມືອງໄຊສະຖານ ໃນວັນທີ 26 ມັງກອນ 2024 ທີ່ສະໂມສອນເມືອງ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ໄຊຍະບູລີ ຊຸດທີ II.
ທ່ານ ສີສະອອນ ນາມວົງ ເຈົ້າເມືອງໆໄຊສະຖານ ໄດ້ລາຍງານໂດຍຫຍໍ້ວ່າ ໃນໄລຍະຜ່ານມາ ເມືອງໄຊສະ ຖານປະເຊີນກັບບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ອັດຕາແລກປ່ຽນເໜັງຕີງແຮງ, ລາຄານໍ້າມັນເຊື້ອໄຟ ແລະ ສິນຄ້າເພີ່ມສູງຂຶ້ນ, ຊີວິດການເປັນຢູ່ມີຄວາມຝືດເຄືອງ, ໄພພິບັດທາງທໍາມະຊາດ, ສັດຕູພຶດທໍາລາຍຜົນຜະລິດ, ພະຍາດສັດລະບາດ, ຄວາມອ່ອນນ້ອຍຂອງພື້ນຖານການຜະລິດ ເຮັດໃຫ້ເສດຖະກິດບາງປະເພດມີການຊະລໍຕົວ ແລະ ທົດຖອຍລົງ; ແຕ່ພາຍໃຕ້ການນໍາພາ-ຊີ້ນຳຂອງອົງຄະນະພັກແຂວງ ກໍຄືອົງຄະນະພັກເມືອງ ໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ຄັ້ງທີ II ຂອງອົງຄະນະພັກເມືອງ ເຮັດໃຫ້ສະພາບໂດຍລວມຂອງເມືອງມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ; ອົງການປົກຄອງທຸກຂັ້ນກໍໄດ້ເອົາໃຈໃສ່ປຸກລະດົມ, ຊຸກຍູ້ການຜະລິດເປັນສິນຄ້າຂອງປະຊາຊົນ, ບັນດາຫົວໜ່ວຍທຸລະກິດດ້ານຕ່າງໆ ກໍໄດ້ດໍາເນີນໄປຢ່າງຕັ້ງໜ້າ ເຮັດໃຫ້ເສດຖະກິດຂອງເມືອງສືບຕໍ່ຂະຫຍາຍຕົວຖືກທິດ ລວມຍອດລາຍຮັບທັງໝົດຂອງເມືອງ 142 ຕື້ກີບ, ສະເລ່ຍຕໍ່ຫົວຄົນບັນລຸ 8,7 ລ້ານກວ່າກີບຕໍ່ຄົນຕໍ່ປີ.
ໂອກາດດັ່ງກ່າວ ທ່ານ ພັທ. ສັນຕິ ສິງທອງ ຫົວໜ້າການທະຫານກອງບັນຊາການທະຫານເມືອງໄຊສະຖານ ກໍ ໄດ້ລາຍງານສະພາບການເຄື່ອນໄຫວຂອງກົມກອງໂດຍຫຍໍ້ ໂດຍສະເພາະແມ່ນຈຸດພິເສດທີ່ຕັ້ງຂອງເມືອງ; ສະພາບຊາຍແດນ, ປະຊາຊົນ ແລະ ກົມກອງ; ຜົນສຳເລັດໃນການຈັດຕັ້ງປະຕິບັດແຕ່ລະຂົງເຂດວຽກງານ ເປັນຕົ້ນວຽກງານການ ເມືອງ, ການທະຫານ ແລະ ພະລາທິການ.
ພ້ອມດຽວກັນນີ້, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວຂອງອໍານາດການປົກຄອງ ແລະ ກອງບັນຊາການທະຫານເມືອງໄຊສະຖານ ທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະນັກງານຫຼັກແຫຼ່ງ ເຊິ່ງໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນການຮັກສາມູນເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະນັກງານ, ນາຍ ແລະ ພົນທະຫານ ສ້າງຜົນງານນັບມື້ດີຂຶ້ນເລື້ອຍໆ; ປະຕິບັດໜ້າທີ່ວຽກງານວິ ຊາສະເພາະທີ່ພັກ-ລັດມອບໝາຍໃຫ້ ດ້ວຍຄວາມຮັບຜິດຊອບສູງ ແລະອື່ນໆ.
ຈາກນັ້ນ, ສະມາຊິກສະພາ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ສພຂ ໄຊຍະບູລີ ຊຸດທີ II ເຊິ່ງປະກອບມີບັນດາມະຕິ, ກົດໝາຍ, ນິຕິກໍາໃຕ້ກົດໝາຍ ແລະ ບັນ ດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ຜູ້ເຂົ້າຮ່ວມກໍໄດ້ມີການແລກປ່ຽນຄຳຄິດຄຳເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)