(ສພຊ) ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ນໍາໂດຍທ່ານ ພົທ. ສຸວອນ ເລືອງບຸນມີ ກໍາມະ ການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍສະມາຊິກສະພາປະຊາຊົນແຂວງໄຊຍະບູລີ ໄດ້ເຄື່ອນໄຫວພົບປະພະນັກງານຫຼັກແຫຼ່ງຂອງແຂວງໄຊຍະບູລີ ໃນວັນທີ 29 ມັງກອນ 2024 ທີ່ຫໍປະຊຸມໃຫຍ່ຂອງແຂວງ ເພື່ອເຜີຍ ແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ຂອງສະພາປະຊາຊົນແຂວງໄຊຍະບູລີ ຊຸດທີ II; ໃນຕອນບ່າຍຂອງວັນດຽວກັນ, ຄະນະໄດ້ເຄື່ອນໄຫວວຽກງານຢູ່ກອງບັນຊາການປ້ອງກັນຄວາມສະ ຫງົບ (ປກສ) ແຂວງ ໂດຍໄດ້ຮັບຟັງການລາຍສະພາບການໂດຍຫຍໍ້ຈາກທ່ານ ພັອ. ຄໍາສິນ ຜິວວັນນາ ຮອງຫົວໜ້າກອງບັນຊາການ ປກສ ແຂວງ; ວັນທີ 30 ມັງກອນ, ຄະນະໄດ້ສືບຕໍ່ເຄື່ອນໄຫວພົບປະຜູ້ມີສິດເລືອກຕັ້ງຢູ່ກອງບັນຊາການທະຫານແຂວງ ແລະ ກອງພົນທະຫານຮາບທີ 2 ເຊິ່ງໄດ້ຮັບຟັງການລາຍງານສະພາບການໂດຍຫຍໍ້ຈາກທ່ານ ພົຈວ. ກູດ ພົມມາ ຫົວໜ້າກອງບັນຊາການທະຫານແຂວງ ແລະ ຈາກທ່ານ​ ພົຈວ. ຄຳດີ ໄຊຍະວົງ ຫົວຫນ້າການທະຫານ ກອງພົນທະຫານຮາບ ທີ 2.ໃນແຕ່ລະບ່ອນ, ສະມາຊິກສະພາ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງສອງກອງປະຊຸມດັ່ງກ່າວ ເຊິ່ງປະ ກອບມີບັນດາມະຕິ, ກົດໝາຍ, ນິຕິກໍາໃຕ້ກົດໝາຍ ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະ ນາ ແລະ ຮັບຮອງເອົາໃນກອງປະຊຸມ; ຜູ້ເຂົ້າຮ່ວມກໍໄດ້ມີການແລກປ່ຽນຄຳຄິດຄຳເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ. ພ້ອມດຽວກັນນີ້, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນໄຫວຂອງແຕ່ລະພາກສ່ວນ ທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະນັກງານຫຼັກແຫຼ່ງ ເຊິ່ງໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນການຮັກສາມູນເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະນັກງານ, ນາຍ ແລະ ພົນທະຫານ-ຕໍາຫຼວດ ສ້າງຜົນງານນັບມື້ດີຂຶ້ນເລື້ອຍໆ, ປະຕິບັດໜ້າທີ່ວຽກງານວິຊາສະເພາະທີ່ພັກ-ລັດມອບໝາຍໃຫ້ ດ້ວຍຄວາມຮັບຜິດຊອບສູງ ແລະອື່ນໆ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)