(ສພຊ) ໃນຕອນເຊົ້າວັນທີ 24 ມັງກອນ 2024 ທ່ານ ພົທ. ສຸວອນ ເລືອງບຸນມີ ກຳມະການສູນກາງພັກ,ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ໄດ້ເຄື່ອນໄຫວພົບປະຜູ້ມີສິດເລືອກຕັ້ງຢູ່ສະໂມສອນເມືອງເງິນ ໂດຍການເຂົ້າຮ່ວມຂອງທ່ານ ທະວີສັກ ໄຊຍະວົງ ເລຂາພັກເມືອງໆເງິນ ພ້ອມດ້ວຍຄະນະພັກ-ຄະນະບັນຊາທະຫານເມືອງ, ກອງບັນຊາການປ້ອງກັນຄວາມສະຫງົບເມືອງ.
ໂອກາດດັ່ງກ່າວ ທ່ານ ພັທ. ຈັນທອງ ໄຊສົງຄາມ ຫົວໜ້າການເມືອງກອງບັນຊາການທະຫານເມືອງເງິນ ໄດ້ລາຍງານສະພາບການເຄື່ອນໄຫວຂອງກົມກອງໂດຍຫຍໍ້ ໂດຍສະເພາະແມ່ນຈຸດພິເສດທີ່ຕັ້ງຂອງເມືອງ; ສະພາບຊາຍແດນ, ປະຊາຊົນ ແລະ ກົມກອງ; ຜົນສຳເລັດໃນການຈັດຕັ້ງປະຕິບັດແຕ່ລະຂົງເຂດວຽກງານ ເປັນຕົ້ນວຽກງານການເມືອງ, ການທະຫານ ແລະ ພະລາທິການ
ຫຼັງຈາກນັ້ນ, ທ່ານ ພົທ. ສຸວອນ ເລືອງບຸນມີ ໄດ້ສະແດງຄວາມຊົມເຊີຍຕໍ່ຜົນງານການເຄື່ອນ ໄຫວຂອງກອງບັນຊາການທະຫານເມືອງເງິນ ທີ່ສາມາດຍາດມາໄດ້ໃນໄລຍະຜ່ານມາ ທັງມີຄຳເຫັນໂອ້ລົມຕໍ່ພະນັກງານຫຼັກແຫຼ່ງ ເຊິ່ງໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນການຮັກສາມູນ ເຊື້ອອັນດີງາມ ແລະ ສືບຕໍ່ນຳພາ-ຊີ້ນຳພະນັກງານ,ນາຍ ແລະ ພົນທະຫານ ສ້າງຜົນງານນັບມື້ດີຂຶ້ນເລື້ອຍໆ; ປະຕິບັດໜ້າທີ່ວຽກງານວິຊາສະເພາະທີ່ພັກ-ລັດມອບໝາຍໃຫ້ ດ້ວຍຄວາມຮັບຜິດຊອບສູງ ແລະອື່ນໆ. ພ້ອມດຽວກັນນີ້,ທ່ານຍັງໄດ້ຍົກໃຫ້ເຫັນຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງໄຊຍະບຸລີ ຊຸດທີ II.
(ພາບ ແລະ ຂ່າວ: ນາງ ກຸກກິກ ບຸດດາໄຊ)