ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

              ​(ສພຊ) ໃນວັນທີ 4 ມີນາ 2022 ທີ່ສະພາແຫ່ງຊາດ ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ Annette KNOBLOCH ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ສະຫະພັນເຢຍລະມັນ ປະຈໍາ ສປປລາວ ເພື່ອສົນທະນາແລກປ່ຽນກ່ຽວກັບໂຄງການເຊກາ ແລະ ໂຣຊາລຸກຊໍາບວກ (CEGGA programme and Rosa Luxemburg Foundation) ຢູ່ ສປປລາວ.
​ໃນໂອກາດນີ້, ທ່ານຮອງປະທານສະພາແຫ່ງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ທ່ານ ນາງ Annette KNOBLOCH ພ້ອມທັງສະແດງຄວາມຊົມເຊີຍທີ່ທ່ານນາງ Annette KNOBLOCH ຖືກແຕ່ງຕັ້ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມຄົນໃໝ່ ແຫ່ງ ສາທາລະນະລັດ ສະຫະພັນເຢຍລະມັນ ປະຈໍາ ສປປລາວ ພ້ອມທັງຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສະຫະພັນ ເຢຍລະມັນ ຕະຫລອດໄລຍະເວລາ 60 ກວ່າປີທີ່ຜ່ານມາ.
               ​ ໂອກາດດັ່ງກ່າວ, ທ່ານ ນາງ Annette KNOBLOCH ໄດ້ສະແດງຄວາມຂອບໃຈຕໍ່ທ່ານ ປອ. ນາງ ສູນທອນ ໄຊຍະຈັກ ທີ່ໄດ້ໃຫ້ການຕ້ອນຮັບໃນຄັ້ງນີ້ ພ້ອມທັງຈະສືບຕໍ່ເສີມຂະຫຍາຍມູນເຊື້ອແຫ່ງການພົວພັນທີ່ດີງາມ ລະຫວ່າງສອງປະເທດ ໃຫ້ນັບມື້ນັບມີປະສິດທິຜົນຍິ່ງໆຂຶ້ນ ເພື່ອຜົນປະໂຫຍດ ຂອງປະຊາຊົນສອງຊາດ ກໍຄື ​ເພື່ອ​ສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ເພື່ອການພັດທະນາແບບຍືນຍົງ ໃນພາກພື້ນ ແລະ ໃນທົ່ວໂລກ.
(ພາບ ແລະ ຂ່າວ: ສອນສັກ ວັນວິໄຊ)