……………………………………………………………….
(ສພຊ) – ໃນຕອນບ່າຍຂອງວັນພະຫັດທີ 28 ມີນາ 2024 ທີ່ຫ້ອງຮັບແຂກສະພາແຫ່ງຊາດ (ສພຊ) ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຄຣິດສະໂຕບເຟີ ບາຮູເອ(Christophe Bahuet) ຮອງຜູ້ອຳນວຍການອົງການສະຫະປະຊາຊາດເພື່ອການພັດທະນາ (UNDP) ປະຈໍາພາກພື້ນອາຊີ-ປາຊີຟິກ ພ້ອມດ້ວຍຄະນະ.
ທ່ານ ສົມມາດ ພົລເສນາ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ການມາຢ້ຽມຢາມ ແລະ ເຮັດວຽກຢູ່ ສປປລາວ ຂອງທ່ານ ຄຣິດສະໂຕບເຟີ ບາຮູເອ ແລະ ຄະນະ ໃນຄັ້ງນີ້; ພ້ອມນັ້ນ, ຍັງໄດ້ໄປຢ້ຽມຢາມ, ພົບປະສະພາປະຊາຊົນແຂວງຊຽງຂວາງ ເຊິ່ງໄດ້ຮັບຮູ້ເຖິງສະພາບການ ແລະ ບັນຫາຕົວຈິງທີ່ຕິດພັນກັບວຽກງານຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ (ສພຂ). ສະແດງຄວາມຊົມເຊີຍ ແລະ ຕີລາຄາສູງຕໍ່ອົງການ UNDP ທີ່ໄດ້ປະ ກອບສ່ວນສຳຄັນເຂົ້າໃນການສະໜັບສະໜູນລັດຖະບານລາວ ໃນການພັດທະນາເສດຖະກິດ, ການກໍ່ສ້າງພື້ນຖານໂຄງລ່າງ, ການພັດທະນາຊົນນະບົດ, ການແກ້ໄຂຄວາມທຸກຍາກຂອງປະຊາຊົນ, ການພັດທະນາຊັບພະຍາກອນມະນຸດ, ການຄຸ້ມຄອງສິ່ງແວດລ້ອມ ແລະ ຊັບພະຍາກອນທຳມະຊາດ, ການສະໜັບສະໜູນການເກັບກູ້ລະເບີດທີ່ບໍ່ທັນແຕກ ແລະ ຂົງເຂດອື່ນໆ; ພ້ອມນັ້ນ, ກໍໃຫ້ການຊ່ວຍເຫຼືອລັດຖະບານລາວ ຈັດຕັ້ງກອງປະຊຸມໂຕະມົນໃນໄລຍະຜ່ານມາ ເພື່ອລະດົມຂົນຂວາຍທຶນຮອນຈາກສາກົນໃນການຕອບສະໜອງຄວາມຕ້ອງການດ້ານການລົງທຶນຂອງລັດໃຫ້ແກ່ໂຄງ ການພັດທະນາເສດຖະກິດ-ສັງຄົມ ແນໃສ່ບັນລຸເປົ້າໝາຍການພັດທະນາແບບຍືນຍົງ (SDGs).
ອົງການສະ​ຫະ​ປະ​ຊາ​ຊາດເພື່ອການພັດທະນາ ແມ່ນ​ໜຶ່ງ​ໃນບັນ​ດາຄູ່ຮ່ວມພັດທະນາ ແລະ ໄດ້ມີການຮ່ວມມືກັບສະ​ພາ​ແຫ່ງ​ຊາດລາວ ມາເປັນເວລາຍາວນານ ໂດຍຜ່ານການຊຸກຍູ້ສົ່ງ​ເສີມທາງດ້ານວິຊາການ ແລະ ​ການພັດທະນາອົງ​ການ ມາຕັ້ງແຕ່ປີ 2008; ອົງການ​ UNDP ໄດ້ສະໜັບສະ​ໜູນການສ້າງຕັ້ງສະພາປະຊາຊົນຂັ້ນແຂວງ ໃນ​​ໂຄງ​ການການ​ສະ​ໜັບ​ສະ​ໜູນ​ຍຸດ​ທະ​ສາດ​ເພື່ອ​ຍົກ​ສູງ​ບົດ​ບາດ​ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື NASSP ນັບຕັ້ງແຕ່ປີ 2024 ເປັນຕົ້ນມາ, ໂຄງການດັ່ງກ່າວ ໄດ້ໃຫ້ການສະໜັບສະໜູນຫຼາຍໆກິດຈະກໍາໃນການເຝິກອົບຮົມສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໂດຍ​ສະ​ເພາະການ ຈັດຕັ້ງປະຕິບັດພາລະບົດບາດນິຕິບັນ​ຍັດ ແລະ ການຕິດຕາມກວດກາ ຂອງ ສພຊ ແລະ ສພຂ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
ທ່ານຮອງປະທານສະພາແຫ່ງຊາດ ສະແດງຄວາມຊົມເຊີຍ ແລະ ຕີລາຄາສູງຕໍ່ການສະໜັບສະໜູນຂອງອົງການ​ UNDP ໃນໄລຍະຜ່ານມາ ກໍຄືແຜນການສະໜັບສະໜູນແກ່ສະພາແຫ່ງຊາດລາວໃນຕໍ່ໜ້າ ໂດຍສະເພາະແມ່ນການຊ່ວຍເຫຼືອພາຍໃຕ້ໂຄງການສ້າງຂີດຄວາມສາມາດ ແລະ ປະສິດທິພາບໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ (STEPs) ທີ່ໄດ້ຈັດຕັ້ງປະຕິບັດຮ່ວມກັບສະພາແຫ່ງຊາດລາວໃນປັດຈຸບັນ; ພ້ອມທັງແຈ້ງໃຫ້ຊາບວ່າ ໃນປີນີ້ ສປປລາວ ໄດ້ຮັບກຽດເປັນປະທານອາຊຽນ ແລະ ສະພາແຫ່ງຊາດລາວ ກໍໄດ້ຮັບກຽດເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາຫວ່າງຊາດອາຊຽນ (AIPA) ຄັ້ງທີ 45 ເຊິ່ງຈະຈັດຂຶ້ນໃນເດືອນຕຸລາ ທີ່ນະຄອນຫຼວງວຽງຈັນ, ຫວັງຢ່າງຍິ່ງວ່າຈະໄດ້ຮັບການສະໜັບສະໜູນຈາກອົງການ UNDP ໃນການເປັນເຈົ້າພາບຈັດກອງປະຊຸມດັ່ງກ່າວ ກໍຄືການປະຕິບັດພັນ ທະສາກົນໃຫ້ສຳເລັດຢ່າງຈົບງາມ.
ທ່ານ ຄຣິດສະໂຕບເຟີ ບາຮູເອ ໄດ້ສະແດງຄວາມຂອບໃຈເປັນຢ່າງສູງທີ່ທ່ານຮອງປະທານສະພາແຫ່ງຊາດ ໃຫ້ ການຕ້ອນຮັບຢ່າງອົບອຸ່ນ ແລະ ຄໍາເວົ້າອັນຈົບງາມຕໍ່ການປະກອບສ່ວນສະໜັບສະໜູນລັດຖະບານ ແລະ ສະພາແຫ່ງຊາດລາວ ຂອງອົງການ UNDP, ພ້ອມທັງແຈ້ງໃຫ້ຊາບສະພາບການເຄື່ອນໄຫວທີ່ຕັ້ງໜ້າຂອງອົງການສະຫະປະຊາຊາດເພື່ອການພັດທະນາ ໃນການປະຕິບັດພາລະບົດບາດປະຈຳພາກພື້ນອາຊີ-ປາຊີຟິກ ແລະ ຈຸດປະສົງຂອງການຢ້ຽມຢາມ ສປປລາວ ຄັ້ງນີ້.
(ພາບ ແລະ ຂ່າວ: ສອນສັກ ວັນວິໄຊ)