ລະຫວ່າງ ວັນທີ 04-05 ເມສາ 2024 ທ່ານ ພົທ. ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ ການພັດທະນາຊົນນະບົດ ແລະ ແກ້ໄຂຄວາມທຸກຍາກເຂດພື້ນຖານການປະຕິວັດ ຢູ່ 2 ເມືອງຂອງແຂວງຫົວພັນ ຄື: ຊຳເໜືອ ແລະ ຊຽງຄໍ້; ໂດຍມີທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ປະທານສະພາປະຊາຊົນ ແຂວງຫົວພັນ ພ້ອມດ້ວຍທີມງານ ຈາກສະພາແຫ່ງຊາດ ແລະ ສະພາປະຊາຊົນແຂວງ ເຂົ້າຮ່ວມຕິດຕາມ.

              ທັງນີ້, ກໍເພື່ອຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍຂອງບັນດາຂະແໜງ ການ ແລະ ອົງການທີ່ກ່ຽວຂ້ອງ ໂດຍສະເພາະດຳລັດ 348/ລບ, ລົງວັນທີ 16/11/2017 ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ; ບັນດາໂຄງການລົງທຶນຂອງລັດໃສ່ເຂດຈຸດສຸມພັດທະນາພື້ນຖານການປະຕິວັດ ແລະ ເຂດຊາຍແດນ ເພື່ອເປັນຂໍ້ມູນພື້ນຖານກະກຽມລາຍງານ ຕໍ່ກອງປະຊຸມຄະນະປະຈຳສະພາແຫ່ງຊາດ (ຄປຈສພຊ) ກໍຄືກອງປະຊຸມສະໄໝສາ ມັນ ເທື່ອທີ 7 ຂອງ ສພຊ ຊຸດທີ IX ທັງເປັນບ່ອນອີງໃນການປຶກສາຫາລື ແລະ ສະເໜີພາກສ່ວນທີ່ກ່ຽວຂ້ອງ ຄົ້ນຄວ້າມາດຕະ ການແກ້ໄຂ.

             ໃນການເຄື່ອນໄຫວ, ໄດ້ເປີດກອງປະຊຸມ ຮ່ວມກັບ ສະພາປະຊາຊົນແຂວງ ແລະ ອົງການປົກຄອງ ເມືອງຊຽງຄໍ້ ເພື່ອຮັບຟັງການລາຍງານ ຈາກບັນດາພະແນກການ, ຫ້ອງວ່າການແຂວງ, ກອງບັນຊາການທະຫານແຂວງ, ບັນດາຫ້ອງການຂອງເມືອງ ແລະ ພາກສ່ວນກ່ຽວຂ້ອງ ກ່ຽວກັບສະພາບການຈັດຕັ້ງປະຕິບັດໂຄງການລົງທຶນຢູ່ຈຸດສຸມພັດທະນາກຸ່ມບ້ານລາວຮຸ່ງ-ພຽງສາ ແລະ ມອງນໍ້າ ເມືອງຊຽງຄໍ້ ແລະ ສະພາບການຈັດຕັ້ງປະຕິບັດໂຄງການລົງທຶນຢູ່ກຸ່ມບ້ານຜາແດງ ເມືອງກວັນ ເຊິ່ງຈຸດສຸມພັດທະນາທັງ 2 ຈຸດ ເປັນເຂດທຸລະກັນດານ, ພູສູງເຫວເລິກ, ເສັ້ນທາງຜ່ານບ້ານເປັນທາງຄົດລ້ຽວກັນດານ, ການສັນຈອນມີຄວາມຫຍຸ້ງຍາກ ສາມາດທຽວໄດ້ພຽງລະດູດຽວ (ລະດູແລ້ງ); ໃນໄລຍະຜ່ານມາເຫັນວ່າ ໄດ້ຖືເອົາຈຸດສຸມດັ່ງກ່າວ ສ້າງເປັນຈຸດສຸມພັດທະນາໄລຍະໃໝ່ ເພື່ອແກ້ໄຂຊີວິດການເປັນຢູ່ຂອງປະຊົນໃນເຂດຈຸດສຸມໃຫ້ດີຂຶ້ນ ເຊິ່ງສະແດງໃຫ້ເຫັນຂະບວນການແກ້ໄຂຄວາມທຸກຍາກ ໂດຍມີການເພີ່ມການລົງທຶນເຂົ້າໃສ່ການພັດທະນາເຂດດັ່ງກ່າວຢ່າງມີຈຸດສຸມ, ການຈັດຕັ້ງປະຕິບັດແມ່ນໄດ້ສຸມໃສ່ປັບປຸງບູລະນະສ້ອມແປງພື້ນຖານໂຄງລ່າງເຊັ່ນ: ເສັ້ນທາງ, ໂຮງຮຽນ, ຊົນລະປະທານ, ນໍ້າລິນ, ສຸກສາລາ, ຫ້ອງການກຸ່ມບ້ານ, ປັບສະຖານທີ່ ແລະ ອື່ນໆ.

              ໃນກອງປະຊຸມ, ທ່ານ ພົທ. ສຸວອນ ເລືອງບຸນມີ ໄດ້ຕັ້ງຄຳຖາມເຈາະຈີ້ມ ເພື່ອໃຫ້ພາກສ່ວນກ່ຽວຂ້ອງຂອງແຂວງ ກໍຄືເມືອງຊຽງຄໍ້ ອະທິບາຍໃຫ້ຂໍ້ມູນເພີ່ມຕື່ມ, ສະເໜີຄວາມຄິດຄວາມເຫັນ ແລະ ຄຳສະເໜີຕ່າງໆຢ່າງກົງໄປກົງມາ ພ້ອມທັງມີຄຳເຫັນໂອ້ລົມເພື່ອເປັນທິດເຍືອງທາງໃນການປະຕິບັດວຽກງານພັດທະນາຊົນນະບົດ ແລະ ລົບລ້າງຄວາມທຸກຍາກ ໃຫ້ມີຄວາມສະດວກ, ມີປະສິດທິພາບ ແລະ ປະສິດທິຜົນ.

ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຄື່ອນໄຫວຢ້ຽມເບິ່ງຈຸດສຸມພັດທະນາກຸ່ມບ້ານລາວຮຸ່ງ-ພຽງສາ ເມືອງຊຽງຄໍ້ ແລະ ຈະເຄື່ອນໄຫວຕິດຕາມກວດກາ, ຊຸກຍູ້ ຢູ່ບ້ານຜາແດງ ແລະ ບ້ານປຸ່ງຫວາຍ ເມືອງກວັນ ຕື່ມອີກ.

ຂ່າວ ນ. ປາກາລັກ ພົມມີໄຊ

ພາບ ນ. ປຸ້ຍນິຕາ ເພັງມີໄຊ