ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງບົດລາຍງານຈາກທ່ານ ວັນໄຊ ກືໜໍເນັ້ງ ຮອງຫົວໜ້າພະແນກຍຸຕິທຳແຂວງ ກ່ຽວກັບການຈັດຕັ້ງຜັນຂະຫຍາຍກົດໝາຍວ່າດ້ວຍການປະຕິບັດຄຳຕັດສິນຂອງສານ ສະບັບປັບປຸງປີ 2021 ແລະ ສະພາບການປະຕິບັດວຽກງານປະຕິບັດຄຳຕັດສິນຂອງສານແຕ່ລະຂັ້ນທີ່ມີຄວາມຫຍຸ້ງຍາກ, ສາເຫດທີ່ເຮັດໃຫ້ມີການແກ່ຍາວ ແລະ ບໍ່ສາມາດປະຕິບັດໄດ້ ເຊິ່ງທ່ານໃຫ້ຮູ້ວ່າ: ສະຖິຕິປະຈຳເດືອນເມສາ 2024 ທົ່ວແຂວງມີຄຳຕັດສິນຂອງສານ ທັງໝົດ 1.253 ເລື່ອງ ຄະດີແພ່ງ 482 ເລື່ອງ, ຄະດີອາຍາ 771 ເລື່ອງ ໃນນັ້ນ, ບໍ່ມີເງື່ອນໄຂປະຕິບັດ 160 ເລື່ອງ ຄະດີແພ່ງ 56 ເລື່ອງ ແລະ ອອກຄຳສັ່ງໂຈະ 40 ເລື່ອງ ແພ່ງ 3 ເລື່ອງ; ຂັ້ນແຂວງ 675 ເລື່ອງ ຄະດີແພ່ງ 175 ເລື່ອງ ຄະດີອາຍາ 500 ເລື່ອງ ໃນນັ້ນ, ບໍ່ມີເງື່ອນໄຂປະຕິບັດ 127 ເລື່ອງ ຄະດີແພ່ງ 49 ເລື່ອງ ແລະ ອອກຄໍາສັ່ງໂຈະ 32 ເລື່ອງ ແພ່ງ 1 ເລື່ອງ; ຂອງກາງທີ່ໄດ້ທວງຕາມກົດໝາຍ, ແຕ່ບໍ່ໄດ້ຮັບຄວາມຮ່ວມມືມີ: ໄມ້ດູ່ແປຮູບ 120 ຕັບ ບໍລິມາດ 4.369 ແມັດກ້ອນ, ລົດກະບະ 1 ຄັນ, ລົດຈັກ 14 ຄັນ, ໂທລະສັບ 51 ໜ່ວຍ, ເງິນ 23.643.000 ກີບ 40 ບາດ 9 ໂດລາ ແລະ 75.000 ດົງ. ບົດລາຍງານຈາກທ່ານ ຈູຊົ່ງ ຈື່ໄຊ ຮອງຫົວໜ້າກອງບັນຊາການ ປກສ ແຂວງ ກ່ຽວກັບການຈັດຕັ້ງປະຕິບັດດຳລັດຂອງລັດຖະບານ ວ່າດ້ວຍຊັບສິນທີ່ຖືກຢຶດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 09/8/2022 ໂດຍທ່ານໃຫ້ຮູ້ວ່າສາ ມາດຢຶດ ແລະ ອາຍັດຊັບ 7 ລາຍການ, ຜູ້ຖືກຫາ 17 ຄົນ ຄົນຕ່າງປະເທດ 7 ຄົນ ໃນນັ້ນ, ຄະດີສໍ້ໂກງຊັບ 2 ລາຍ ມູນຄ່າເສຍຫາຍ 3,635 ຕື້ກີບ ໄດ້ອາຍັດຊັບປະເພດລົດດ່າມ 10 ລໍ້ 1 ຄັນ, ໃບຕາດິນ 18.954 ຕາແມັດ; ຄະດີຍັກຍອກຊັບ 1 ລາຍ ມູນຄ່າເສຍຫາຍ 5.949.005.340 ກີບ ໄດ້ອາຍັດຊັບປະເພດລົດກະບະ 1 ຄັນ, ລົດຈັກ 1 ຄັນ; ຄະດີຫຼິ້ນການພະນັນທີ່ຕ້ອງຫ້າມ 1 ລາຍ ໄດ້ຢຶດຊັບປະເພດຄອມພິວເຕີ 20 ໜ່ວຍ; ຄະດີປອມແປງ ແລະ ນຳໃຊ້ເອກະສານປອມ 1 ລາຍ ໄດ້ອາຍັດປະເພດໃບຕາດິນ 1 ໃບ, ເງິນ 38.000 ໂດລາ; ຄະດີຢາເສບຕິດ 2 ລາຍ ໄດ້ຢຶດຊັບປະເພດລົດຕູ້ຄອນເທນເນີ 3 ຄັນ ພ້ອມວັດຖຸຂອງກາງ ໃນນັ້ນ, ມີໄມ້ສັກສຳເລັດຮູບ 10.744 ແມັດກ້ອນ ໄມ້ປະສົມແປຮູບ 1.950 ແມັດກ້ອນ, ສິນຄ້າຄ້າຍຄືກັນຊາອັດແຫ້ງ 360 ແກັດ ນ້ຳໜັກ 6.551 ກິໂລ, ແປ້ງຝຸ່ນສີຂາວ 321 ເປົາ ນ້ຳໜັກ 11.550 ກິໂລ, ປາດສະປໍ 3 ຫົວ; ໄດ້ສະຫຼຸບສົ່ງໄອຍະການປະຊາຊົນແຂວງ 3 ລາຍ, ມອບສຳນວນຄະດີໃຫ້ກົມທີ່ກ່ຽວຂ້ອງຂອງກະຊວງ ປກສ ດຳເນີນ 1 ລາຍ, ປັດຈຸບັນພວມດຳເນີນ 3 ລາຍ.

ຫຼັງຈາກນັ້ນ, ຜູ້ເຂົ້າຮ່ວມກໍໄດ້ຄົ້ນຄວ້າ, ປະກອບຄຳເຫັນ, ແລກປ່ຽນບົດຮຽນເຊິ່ງກັນ ແລະກັນ ຢ່າງກົງໄປກົງມາ, ມີເຫດມີຜົນ, ພາວະວິໄສ ແລະ ແທດກັບສະພາບການຕົວຈິງໃນການຂະຫຍາຍຕົວຂອງສະພາບເສດຖະກິດ-ສັງຄົມໃນປັດຈຸບັນ.

ຕອນທ້າຍຂອງກອງປະຊຸມ, ທ່ານ ຈະເລີນ ເຍຍປາວເຮີ ໄດ້ມີຄຳເຫັນເນັ້ນໜັກກ່ຽວກັບການປະຕິບັດກົດໝາຍວ່າດ້ວຍການປະຕິບັດຄໍາຕັດສິນຂອງສານ ສະບັບປັບປຸງປີ 2021, ສະພາບການຈັດຕັ້ງປະຕິບັດວຽກງານປະຕິບັດ ຄໍາຕັດສິນຂອງສານຢູ່ແຂວງຊຽງຂວາງ ແລະ ການຈັດຕັ້ງປະຕິບັດດໍາລັດວ່າດ້ວຍຊັບສິນທີ່ຖືກຢຶດ, ອາຍັດ ແລະ ຮິບເປັນຂອງລັດ ທີ່ເຫັນວ່າຍັງມີຂໍ້ຫຍຸ້ງຍາກ, ດ້ານຄົງຄ້າງ ແລະ ສິ່ງທ້າທາຍຕ່າງໆ ຈຶ່ງສະເໜີໃຫ້ຄະນະພັກ, ຄະນະນຳແຕ່ລະຂັ້ນ ເປັນເຈົ້າການນຳພາ-ຊີ້ນຳການຈັດຕັ້ງຜັນຂະຫຍາຍໃຫ້ເຂົ້າສູ່ລວງເລິກ ແລະ ເປັນຮູບປະທຳເທື່ອລະກ້າວ; ການແບ່ງຂັ້ນຄຸ້ມຄອງຕ້ອງໃຫ້ລະອຽດຈະແຈ້ງ ເພື່ອເປັນເອກະພາບກັນໃນການຈັດຕັ້ງປະຕິບັດບັນດານິຕິກຳຕ່າງໆ ໃຫ້ເຂັ້ມງວດ, ສັກສິດ. ສະເໜີໃຫ້ຄະນະນໍາສະພາປະຊາຊົນແຂວງຊຽງຂວາງ ເອົາໃຈໃສ່ຕິດຕາມກວດກາການຈັດຕັ້ງປະຕິບັດບັນດານິຕິກຳໃຕ້ກົດໝາຍຂອງແຂວງ ໃຫ້ແທດເຖິງຕົວຈິງຕື່ມ ໂດຍສະເພາະນິຕິກຳທີ່ຕິດພັນກັບການຈັດຕັ້ງປະຕິບັດຄໍາຕັດສິນຂອງສານຂັ້ນຕ່າງໆ ເຊິ່ງເຫັນວ່າຍັງມີຫຼາຍດ້ານ, ຫຼາຍບັນຫາ ໄດ້ມີນິຕິກຳຄົບຖ້ວນແລ້ວ ແຕ່ການຈັດຕັ້ງປະຕິບັດຕົວຈິງບໍ່ເຂັ້ມງວດ, ບໍ່ເດັດຂາດ, ບໍ່ໂປ່ງໃສ, ບາງກໍລະນີກໍບໍ່ສາມາດປະຕິບັດໄດ້; ເອົາໃຈໃສ່ເຂົ້າຮ່ວມແຕ່ຫົວທີກັບອົງການປົກຄອງແຂວງ ເຮັດວຽກງານສ້າງ ແລະ ປັບປຸງນິຕິກຳຂອງແຂວງ ພ້ອມທັງເຮັດວຽກງານໂຄສະນາເຜີຍແຜ່ ໃຫ້ມີຄວາມວ່ອງໄວ, ຕໍ່ເນື່ອງ, ທັນກໍານົດເວລາ, ກວ້າງຂວາງ ແລະ ເຂົ້າເຖິງທຸກເປົ້າໝາຍ ທັງພາກລັດ, ເອກະຊົນ ແລະ ປະຊາຊົນລາວບັນດາເຜົ່າ ດ້ວຍຫຼາຍຮູບການ. ພ້ອມກັນນັ້ນ, ກໍສະ ເໜີໃຫ້ອົງການປົກຄອງແຂວງ ຈັດສັນດ້ານງົບປະມານ, ພາຫະນະ, ອຸປະກອນຮັບໃຊ້ໄວ້ແຕ່ຫົວທີ ເພື່ອສະໜອງໃຫ້ແກ່ການຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ມີປະສິດທິຜົນ. ໃຫ້ພະແນກຍຸຕິທໍາ ສົມທົບກັບກອງບັນຊາການປ້ອງກັນຄວາມສະຫງົບ ແລະ ພາກສ່ວນທີ່ກ່ຽວຂ້ອງຂອງແຂວງ ປັບປຸງບົດລາຍງານຄືນໃຫ້ລະອຽດ ໂດຍວິເຄາະວິໄຈຄັກແນ່ ລົງເລິກແຍກປະເພດຄະດີອາຍາ, ຄະດີແພ່ງ, ຄະດີປັບໃໝຢາເສບຕິດ ມີຈັກຄະ ດີແທ້; ຂອງກາງຄະດີທີ່ເປັນພາຫະນະ, ທີ່ດິນ, ເງິນ, ຄໍາ ແລະ ອື່ນໆ ໃຫ້ມີຕົວເລກສະຫຼຸບລະອຽດຈະແຈ້ງຂອງກາງແຕ່ລະປະເພດມີຈຳນວນເທົ່າໃດ, ຍັງຢູ່ໃນສະພາບປົກກະຕິ ແລະ ຄົບຕາມຈຳນວນ ຫຼືບໍ່, ມີອັນໃດແດ່ໄດ້ແກ້ໄຂໄປແລ້ວ ມີອັນໃດແດ່ທີ່ຈະເປ່ເພເສຍຫາຍໃນໄລຍະສັ້ນ ພ້ອມທັງໃຫ້ມີວິທີທາງອອກໃຫ້ແຕ່ລະກໍລະນີ ແລ້ວສົ່ງໃຫ້ສະພາປະຊາຊົນແຂວງ ເພື່ອສະຫຼຸບລາຍງານສົ່ງຄະນະປະຈໍາສະພາແຫ່ງຊາດ ໃຫ້ທັນຕາມກໍານົດເວລາ; ຮີບຮ້ອນຄົ້ນຄວ້າປັບປຸງກົງຈັກ, ບຸກຄະລາກອນ ແລະ ແບບແຜນວິທີເຮັດວຽກ ທີ່ຕິດພັນກັບວຽກງານປະຕິບັດຄໍາຕັດ ສິນຂອງສານ ໃຫ້ສໍາເລັດໂດຍໄວ; ເອົາໃຈໃສ່ສຶກສາອົບຮົມຖັນແຖວພະນັກງານປະຕິບັດຄຳຕັດສິນຂອງສານ ໃຫ້ມີຄວາມຮັບຜິດຊອບໜ້າທີ່ການເມືອງຂອງຕົນສູງຂຶ້ນ, ມີຄຸນສົມບັດ, ສິນທໍາປະຕິວັດ ເພື່ອຮັບປະກັນໃຫ້ແກ່ການ ຈັດຕັ້ງປະຕິບັດກົດໝາຍວ່າດ້ວຍການປະຕິບັດຄໍາຕັດສິນຂອງສານ ໃຫ້ມີປະສິດທິຜົນ; ປະສານສົມທົບກັບຄະນະນໍາຂອງແຂວງ ໃນການຄົ້ນຄວ້າປັບປຸງ ແລະ ແກ້ໄຂຂໍ້ຄົງຄ້າງ, ບັນຫາຄວາມຫຍຸ້ງຍາກທີ່ເປັນສິ່ງອຸດຕັນ ເປັນຕົ້ນດ້ານງົບປະມານ, ບຸກຄະລາກອນ, ພາຫະນະ, ເຄື່ອງມືອຸປະກອນຮັບໃຊ້ ແລະ ອື່ນໆ ພ້ອມທັງສະເໜີວິທີການແກ້ໄຂ ເພື່ອເຮັດໃຫ້ວຽກງານປະຕິບັດຄໍາຕັດສິນຂອງສານ ໄດ້ຮັບການຈັດຕັ້ງປະຕິບັດຢ່າງສະດວກ, ວ່ອງໄວ ແລະ ມີປະສິດທິຜົນ. ຮີບຮ້ອນແຕ່ງຕັ້ງກອງປະຕິບັດຄໍາຕັດສິນຂອງສານ ເພື່ອໃຫ້ສອດຄ່ອງຕາມກົດໝາຍປະຕິບັດຄຳຕັດ ສິນຂອງສານ; ເອົາໃຈໃສ່ປະຕິບັດດຳລັດຂອງລັດຖະບານ ວ່າດ້ວຍຊັບສິນທີ່ຖືກຢຶດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 09/8/2022 ໂດຍປະສານສົມທົບກັບພະແນກການເງິນຂອງແຂວງ ເພື່ອເກັບ ກໍາ, ຄຸ້ມຄອງ ແລະ ຂຶ້ນບັນຊີຊັບສິນທີ່ຖືກຕັດສິນໃຫ້ຢຶດເປັນຂອງລັດ ເຂົ້າງົບປະມານຂອງລັດ ໃຫ້ສໍາເລັດ, ຈະ ແຈ້ງ ແລະ ປົກປັກຮັກສາບໍ່ໃຫ້ຕົກເຮ່ຍເສຍຫາຍ. ອົງການໄອຍະການປະຊາຊົນແຂວງ ເພີ່ມທະວີການປະຕິບັດ ໜ້າທີ່ໃນການຕິດຕາມກວດກາ ແລະ ປະສານສົມທົບ, ຊຸກຍູ້ ອົງການປະຕິບັດຄໍາຕັດສິນຂອງສານ, ເຈົ້າໜ້າທີ່ສືບ ສວນ-ສອບສວນ, ສານປະຊາຊົນ ໃນການປະຕິບັດຄໍາສິນຂອງສານ ໂດຍສະເພາະແມ່ນການປະຕິບັດໂທດທາງອາ ຍາທີ່ໄດ້ຮັບການປະຕິບັດສໍາເລັດແລ້ວ, ແຕ່ຍັງບໍ່ສາມາດປະຕິບັດໂທດທາງແພ່ງໄດ້.

(ຂ່າວ-ພາບ: ນາງ ອາລິນ ສຸພິມມະປະດິດ)