(ສພຊ) – ໃນຕອນບ່າຍຂອງວັນພຸດທີ 29 ພຶດສະພາ 2024 ທີ່ສະພາແຫ່ງຊາດ, ທ່ານ ທັນຕາ ກອງຜາລີ ຮອງປະທານກໍາມາທິການແຜນການ, ການເງິນ ແລະ ການກວດສອບ (ກຜງສ) ໄດ້ຕ້ອນ ຮັບການເຂົ້າຢ້ຽມຂໍ່ານັບຂອງທ່ານ ອະລາສແດຣ໌ ສະກ໊ອດ (Alasdair Scott) ຫົວໜ້າຄະນະປະເມີນເສດຖະກິດມະຫາພາກ ຂອງອົງການກອງທຶນການເງິນສາກົນ ຫຼື ໄອເອັມເອັຟ (International Monetary Fund – IMF) ເພື່ອສະຫຼຸບຜົນການປະເມີນເສດຖະກິດມະຫາພາກຂອງ ສປປລາວ ຕາມພັນທະມາດຕາ IV ຂອງອົງການ IMF (Article IV) ປະຈໍາປີ 2024 ແລະ ໃຫ້ຄຳແນະນຳດ້ານນະໂຍບາຍເບື້ອງຕົ້ນໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງ ສປປລາວ.
ທ່ານ ທັນຕາ ກອງຜາລີ ໄດ້ສະແດງຄວາມຍິນດີເປັນຢ່າງຍິ່ງທີ່ໄດ້ຕ້ອນຮັບ ແລະ ຕີລາຄາສູງຕໍ່ການເຂົ້າຢ້ຽມຂ່ຳນັບຂອງທ່ານ ອະລາສແດຣ໌ ສະກ໊ອດ ພ້ອມດ້ວຍຄະນະ ໃນຄັ້ງນີ້ ພ້ອມທັງແຈ້ງໃຫ້ຮູ້ກ່ຽວກັບສະພາບຄວາມເປັນມາ, ຈຸດພິເສດ, ທີ່ຕັ້ງ, ພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ ແຫ່ງ ສປປລາວ ໂດຍສັງເຂບ ແລະ ບັນຫາຕ່າງໆທີ່ທ່ານ ອະລາສແດຣ໌ ສະກ໊ອດ ໃຫ້ຄວາມສົນ ໃຈ; ສະແດງຄວາມຂອບໃຈຕໍ່ອົງການ IMF ທີ່ໄດ້ໃຫ້ຄໍາແນະນໍາທີ່ດີຕໍ່ການແກ້ໄຂບັນຫາເສດຖະກິດຂອງ ສປປລາວ ແລະ ຫວັງວ່າຈະສືບຕໍ່ໃຫ້ການຊ່ວຍເຫຼືອໃນດ້ານຕ່າງໆໃຫ້ແກ່ ສປປລາວ ໃນຕໍ່ໜ້າ.
ທ່ານ ອະລາສແດຣ໌ ສະກ໊ອດ ໄດ້ສະແດງຄວາມຂອບໃຈຕໍ່ທ່ານ ທັນຕາ ກອງຜາລີ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງລາຍງານຜົນການປະເມີນເສດຖະກິດມະຫາພາກ ປະຈຳປີ 2024 ຂອງ ສປປລາວ ເຊິ່ງເຫັນໄດ້ວ່າຫຼາຍຂົງເຂດວຽກງານທີ່ຕິດພັນກັບເສດຖະກິດ ແມ່ນໄດ້ຮັບການພັດທະນາໃນລະດັບດີຂຶ້ນເທື່ອລະກ້າວ; ຄຽງຄູ່ກັນນີ້, ກໍຍັງມີສິ່ງທ້າທາຍຫຼາຍດ້ານທີ່ ສປປລາວ ຍັງຈະຕ້ອງສືບຕໍ່ຮັບມື ແລະ ປັບປຸງ ເປັນຕົ້ນການປັບປຸງໂຄງສ້າງໜີ້ສິນພາກລັດ, ການບໍລິຫານງົບປະມານ ແລະ ນະ ໂຍບາຍທາງດ້ານເງິນຕາ ເຊິ່ງອົງການ IMF ກໍໄດ້ອະທິບາຍວ່າ ການມາປະເມີນເສດຖະກິດຄັ້ງນີ້ ແມ່ນເພື່ອວິເຄາະບັນຫາ ແລະ ຊອກຫາວິທີທາງອອກ. ພ້ອມດຽວກັນ, ກໍຍິນດີທີ່ຈະໃຫ້ການຊ່ວຍເຫຼືອທາງດ້ານນະໂຍບາຍ ແລະ ດ້ານວິຊາການ ແກ່ຂະແໜງການເງິນ ແລະ ຂະແໜງການກ່ຽວຂ້ອງຂອງ ສປປ ລາວ ທັງໃນໄລຍະສັ້ນ ແລະ ໄລຍະຍາວ.
(ຂ່າວ ແລະ ພາບ: ສອນສັກ ວັນວິໄຊ)