(ສພຊ) ໃນໂອກາດເດີນທາງໄປຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ລະຫວ່າງວັນທີ 02-07 ມັງ ກອນ 2024 ສະຫາຍ ສຈ. ປອ. ຈະເລີນ ເຍຍປາວເຮີ ກຳມະການສູນກາງພັກ, ຮອງປະທານສະພາແຫ່ງຊາດ, ປະ ທານກຳມາທິການກົດໝາຍ, ຫົວໜ້າຄະນະຮັບຜິດຊອບຄົ້ນຄວ້າ ແລະ ຮຽບຮຽງປະຫວັດຄວາມເປັນມາຂອງສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ພົບປະ ແລະ ເຮັດວຽກກັບຄະນະຜູ້ແທນຫວຽດນາມ ນໍາໂດຍສະ ຫາຍ ບຸ່ຍ ວັນ ເກື່ອງ (Bùi Văn Cường) ກໍາມະການສູນກາງພັກ, ເລຂາທິການສະພາແຫ່ງຊາດ, ຫົວໜ້າຫ້ອງວ່າການສະພາແຫ່ງຊາດ ໃນຕອນເຊົ້າວັນພະຫັດທີ 04 ມັງກອນ ທີ່ຫໍສະພາແຫ່ງຊາດ, ນະຄອນຫຼວງຮ່າໂນ້ຍ.
ສະຫາຍ ບຸ່ຍ ວັນ ເກື່ອງ ໄດ້ຕີລາຄາສູງການຢ້ຽມຢາມຫວຽດນາມຄັ້ງນີ້ຂອງຮອງປະທານສະພາແຫ່ງຊາດລາວ ພ້ອມດ້ວຍຄະນະ ຖືວ່າເປັນການສະແດງໃຫ້ເຫັນເຖິງການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມ-ລາວ, ປະກອບ ສ່ວນຢ່າງຕັ້ງໜ້າໃຫ້ແກ່ການປະຕິບັດເນື້ອໃນຂອງບົດບັນທຶກການຮ່ວມມືທີ່ປະທານສະພາແຫ່ງຊາດສອງປະເທດໄດ້ລົງນາມໃນວັນທີ 16 ພຶດສະພາ 2022 ຢູ່ນະຄອນຫຼວງວຽງຈັນ.
ສະຫາຍ ສຈ. ປອ. ຈະເລີນ ເຍຍປາວເຮີ ສະແດງຄວາມຂອບໃຈ, ຮູ້ສຶກເປັນກຽດ ແລະ ມີຄວາມພາກພູມໃຈເປັນຢ່າງຍິ່ງ ທີ່ໄດ້ຮັບການຕ້ອນຮັບຢ່າງອົບອຸ່ນ ແລະ ສົມກຽດ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ຢ່າງເປັນທາງການໃນຄັ້ງນີ້; ເຫັນດີກັບຄຳເຫັນຂອງສະຫາຍ ບຸ່ຍ ວັນ ເກື່ອງ ເລຂາທິການສະພາແຫ່ງຊາດ, ຫົວໜ້າຫ້ອງວ່າການສະພາແຫ່ງຊາດ ຕໍ່ການພົວພັນອັນດີງາມ, ການພົວພັນມິດຕະພາບທີ່ເປັນມູນເຊື້ອລະຫວ່າງ ລາວ-ຫວຽດນາມ, ໃນນັ້ນມີການພົວພັນຮ່ວມມືຢ່າງເລິກເຊິ່ງ ແລະ ແທດຕົວຈິງຂອງສະພາແຫ່ງຊາດສອງປະເທດ. ໃນປີ 2025 ສະພາແຫ່ງຊາດລາວ ຈະສະເຫຼີມສະຫຼອງ 50 ປີແຫ່ງວັນສ້າງຕັ້ງສະພາແຫ່ງຊາດ, ສະຫາຍຮອງປະທານສະ ພາແຫ່ງຊາດ ຫວັງວ່າໃນໄລຍະຢ້ຽມຢາມຫວຽດນາມຄັ້ງນີ້, ຈະໄດ້ຮັບບັນດາບົດຮຽນ ແລະ ປະສົບການອັນລ້ຳຄ່າກວ່າເກົ່າໃນການຮຽບຮຽງປະຫວັດຂອງສະພາແຫ່ງຊາດຫວຽດນາມ ເພື່ອຮັບໃຊ້ການຮຽບຮຽງປະຫວັດ 50 ປີແຫ່ງການເຕີບໃຫຍ່ ແລະ ພັດທະນາຂອງສະພາແຫ່ງຊາດລາວ.
ສະຫາຍ ບຸ່ຍ ວັນ ເກື່ອງ ສະແດງຄວາມຍິນດີທີ່ຮັບຮູ້ວ່າ ສະພາແຫ່ງຊາດລາວ ພວມດຳເນີນບັນດາການເຄື່ອນໄຫວກະກຽມເພື່ອສະເຫຼີມສະຫຼອງ 50 ປີແຫ່ງວັນສ້າງຕັ້ງ, ທັງໃຫ້ຮູ້ວ່າ ສະພາແຫ່ງຊາດຫວຽດນາມ ກໍພວມຜັນຂະ ຫຍາຍບັນດາການເຄື່ອນໄຫວກະກຽມໃຫ້ວັນຄົບຮອບ 80 ປີແຫ່ງການເລືອກຕັ້ງທົ່ວໄປຄັ້ງທຳອິດເພື່ອເລືອກຕັ້ງສະມາ ຊິກສະພາແຫ່ງຊາດ ໃນເດືອນມັງກອນ 2026, ວຽກງານເຫຼົ່ານີ້ໄດ້ຮັບການປະຕິບັດຕັ້ງແຕ່ປີ 2022. ກ່ຽວກັບປະສົບການໃນການຮຽບຮຽງປະຫວັດຂອງສະພາແຫ່ງຊາດ; ປະຈຸບັນ ຫ້ອງວ່າການສະພາແຫ່ງຊາດ (ໜ່ວຍງານຮັບຜິດຊອບແມ່ນກົມຂໍ້ມູນ) ໄດ້ສົມທົບກັບບັນດາຜູ້ຊ່ຽວຊານດ້ານວິຊາການ, ຂະແໜງວິທະຍາສາດປະຫວັດສາດ ໄດ້ຮຽບຮຽງ ແລະ ຈັດພິມປຶ້ມປະຫວັດຂອງສະພາແຫ່ງຊາດຫວຽດນາມ ລວມມີ 4 ເຫຼັ້ມ (ໄລຍະປີ 1946-2011) ພ້ອມກັນນັ້ນ ພວມສືບຕໍ່ຄົ້ນຄວ້າ, ຮຽບຮຽງ ໄລຍະປີ 2011-2026, ສະແດງໃຫ້ເຫັນເຖິງຂະບວນການສ້າງຕັ້ງ ແລະ ພັດທະນາສະ ພາແຫ່ງຊາດ ໂດຍຜ່ານໄລຍະການພັດທະນາຂອງການປະຕິວັດຫວຽດນາມ.
ຮອງປະທານສະພາແຫ່ງຊາດ ເຮັດວຽກກັບເລຂາທິການສະພາແຫ່ງຊາດຫວຽດນາມ
