(ສພຊ) ລະຫວ່າງວັນທີ 5-6 ຕຸລາ 2023 ທີ່ຫໍສະພາແຫ່ງຊາດ ໄດ້ຈັດກອງປະຊຸມປະຈຳປີ ຂອງຄະນະເລຂາທິການສະພາແຫ່ງຊາດ ຮ່ວມກັບອົງການຈັດຕັ້ງພາຍໃນສະພາແຫ່ງຊາດ ແລະ ຄະນະເລຂາທິການສະພາປະຊາຊົນຂັ້ນແຂວງ ປະຈຳປີ 2023 ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ມີທ່ານຫົວໜ້າຫ້ອງການສູນກາງພັກ, ຫົວໜ້າຫ້ອງວ່າການສໍານັກງານປະທານປະເທດ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານຮອງປະທານກໍາມາທິການ, ຮອງເລຂາທິການສະພາແຫ່ງຊາດ, ຮອງຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ, ເລຂາທິການ, ຮອງເລຂາທິການສະພາປະຊາຊົນຂັ້ນແຂວງ, ຄະນະກົມ, ສູນ, ຄະນະພະແນກ ແລະ ວິຊາການພາຍໃນສະພາແຫ່ງຊາດເຂົ້າຮ່ວມ.

ກອງປະຊຸມ ໄດ້ຮັບຟັງການລາຍງານ ຮ່າງບົດສະຫຼຸບການເຄື່ອນໄຫວວຽກງານ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງຄະນະເລຂາທິການສະພາແຫ່ງຊາດ; ຮັບຟັງເຜີຍແຜ່ນິຕິກຳກ່ຽວກັບຂໍ້ຕົກລົງວ່າດ້ວຍການກຳນົດການໃຊ້ຈ່າຍງົບປະມານຂອງລັດ, ການປະຢັດ ແລະ ການຕ້ານການຟຸມເຟືອຍ ສະບັບເລກທີ 200/ກງ, ລົງວັນທີ 25 ມັງກອນ 2023; ນິຕິກໍາກ່ຽວກັບກົດໝາຍວ່າດ້ວຍການຕ້ານສໍໍ້ລາດບັງຫຼວງ ແລະ ຮັບຟັງການປະກອບຄໍາເຫັນແລກປ່ຽນບົດຮຽນຂອງຄະນະເລຂາທິການສະພາປະຊາຊົນຂັ້ນແຂວງ 3 ແຂວງຄື: ບໍ່ແກ້ວ, ຄຳມ່ວນ ແລະ ແຂວງໄຊສົມບູນ.

ໂອກາດດັ່ງກ່າວ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນໍາວຽກງານຄະນະເລຂາທິການສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້້ນໍາຕໍ່ກອງປະຊຸມ 6 ຂໍ້ດັ່ງນີ້:

1. ສະເໜີໃຫ້ຄະນະເລຂາທິການສະພາແຫ່ງຊາດ ເອົາໃຈໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ ກໍຄືທິດທາງແຜນການເຄື່ອນໄຫວ ທ້າຍສະໄໝຂອງອົງຄະນະພັກສະພາແຫ່ງຊາດ ເຂົ້າໃນການເຄື່ອນໄຫວນໍາພາວຽກງານຂອງຄະນະເລຂາທິການສະພາແຫ່ງຊາດ ໃຫ້ໄດ້ຮັບຜົນສໍາເລັດ;

2. ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດໃຫ້ພະນັກງານຢ່າງເປັນປົກກະຕິ ແນໃສ່ເຮັດໃຫ້ພະນັກງານ, ສະມາຊິກພັກມີຄວາມອຸ່ນອຽນທຸ່ນທ່ຽງ ມີຄຸນທາດການເມືອງທີ່ໜັກແໜ້ນ, ມີຄວາມຮູ້ທາງດ້ານທິດສະດີການເມືອງ, ມີນໍ້າໃຈຮັກຊາດ ແລະ ເອົາໃຈໃສ່ແກ້ໄຂບັນດາປາກົດການຫຍໍ້ທໍ້ໃນຖັນແຖວພະນັກງານ ໃຫ້ເຂັ້ມງວດ, ຂາດຕົວ ແລະ ທັນການ;

3. ເອົາໃຈໃສ່ການເປັນເສນາທິການໃຫ້ແກ່ຄະນະປະຈໍາສະພາແຫ່ງຊາດ ເປັນຕົ້ນ ກະກຽມກອງປະຊຸມສະໄໝເທື່ອທີ 6 ຂອງສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດຮ່ວມກັບລັດຖະບານ, ຮ່ວມກັບສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ຮ່ວມກັບອົງການກວດສອບແຫ່ງລັດ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໃຫ້ມີຄຸນນະພາບ, ມີປະສິດທິພາບ, ປະສິດທິຜົນໃຫ້ສູງຂຶ້ນກວ່າເກົ່າ;

4. ຄົ້ນຄວ້າສ້າງນິຕິກໍາ ການປະສານງານລະຫວ່າງຄະນະເລຂາທິການສະພາແຫ່ງຊາດ ກັບຄະນະເລຂາທິການສະພາປະຊາຊົນຂັ້ນແຂວງ ເພື່ອໃຫ້ເປັນບ່ອນອີງໃນການຈັດຕັ້ງປະຕິບັດ ລວມທັງນິຕິກໍາອື່ນທີເຫັນວ່າມີຄວາມຈໍາເປັນ;

5. ເພີ່ມທະວີການປະສານສົມທົບກັບ ບັນດາກໍາມາທິການ, ສະຖາບັນຄົ້ນຄວ້ານິຕິກໍາ, ຫ້ອງວ່າການສູນກາງພັກ, ຫ້ອງວ່າການສໍານັກງານປະທານປະເທດ, ຫ້ອງວ່າການສໍານັກງານນາຍົກລັດຖະມົນຕີ ໃນດ້ານຕ່າງໆ ໃຫ້ມີຄວາມໂລ່ງລຽນ, ມີປະສິດທິພາບ ແລະ ປະສິດທິຜົນດີກວ່າເກົ່າ;

6. ສໍາລັບຄະນະເລຂາທິການສະພາປະຊາຊົນຂັ້ນແຂວງ ສະເໜີໃຫ້ມີການເພີ່ມທະວີການປະສານສົມທົບກັບບັນດາກໍາມະການ ຂອງສະພາປະຊາຊົນຂັ້ນແຂວງ ໃຫ້ກົມກຽວ, ມີການອໍານວຍຄວາມສະດວກໃຫ້ແກ່ການເຄື່ອນໄຫວ ຂອງຄະນະສະມາຊິກສະພາແແຫ່ງຊາດປະຈໍາເຂດເລືອກຕັ້ງ, ຄະນະປະຈໍາສະພາປະຊາຊົນຂັ້ນແຂວງ ແລະ ປະສານສົມທົບຢ່າງກົມກຽວກັບອໍານາດການປົກຄອງແຂວງ ສືບຕໍ່ປະຕິບັດກົນໄກປະສານງານ ລະຫວ່າງ ຄະນະເລຂາທິການສະພາແຫ່ງຊາດ ແລະ ຄະນະເລຂາທິການສະພາປະຊາຊົນຂັ້ນແຂວງ, ເອົາໃຈໃສ່ການປະຕິບັດລະບົບລາຍງານໃຫ້ສາຍຕັ້ງຢ່າງເປັນປົກກະຕິ ເພື່ອເຮັດໃຫ້ວຽກງານເດີນແມ່ນແລ່ນສະດວກດີກວ່າເກົ່າ.