ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 7-8 ຕຸລາ 2022 ນີ້, ທ່ານ ຄໍາໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ ສົມທົບກັບ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງຈໍາປາສັກ ພ້ອມຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໂຂງ, ແຂວງຈໍາປາສັກ ໂດຍໄດ້ຮັບການຕ້ອນຮັບຈາກ ທ່ານ ນາງ ຄໍາພູ ລິດທິສັກ ກຳມະການພັກແຂວງ, ເລຂາພັກເມືອງ ເຈົ້າເມືອງເມືອໂຂງ ພ້ອມອໍານາດການປົກຄອງເມືອງຢ່າງອົບອຸ່ນ.

 


ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ໄດ້ເຄື່ອນໄຫວລົງຕິດຕາມຕົວຈິງເຂດຊາຍແດນ ລາວ-ກຳປູເຈຍ ທີ່ປັກຫຼັກໝາຍຍັງບໍ່ທັນສໍາເລັດ 2 ຈຸດ ພ້ອມໄດ້ຮັບຟັງການລາຍງານສະພາບການທີ່ພົ້ນເດັ່ນໂດຍຫຍໍ້ ຈາກຄະນະຮັບຜິດຊອບກອງປັກຫຼັກໝາຍຊາຍແດນ ລາວ-ກຳປູເຈຍ. ຈາກນັ້ນ, ໃນມື້ຕໍ່ມາ ຄະນະຂອງທ່ານຮອງປະທານສະພາແຫ່ງຊາດ ໄດ້ສືບຕໍ່ເຄື່ອນໄຫວຢ້ຽມຢາມເຂື່ອນໄຟຟ້າດອນສະໂຮງ ແລະ ເປີດກອງປະຊຸມເຮັດວຽກຮ່ວມກັບອໍານາດການປົກຄອງເມືອງໂຂງ, ໂດຍໄດ້ຮັບຟັງການລາຍງານຈາກ ທ່ານ ນາງ ຄໍາພູ ລິດທິສັກ ເຈົ້າເມືອງເມືອງໂຂງ ກ່ຽວກັບສະພາບທີ່ພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 9 ເດືອນ ປີ 2022 ຜ່ານມາ, ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານປ້ອງກັນຊາດຕາມລຽບຊາຍແດນ ແລະສະພາບພົ້ນເດັ່ນທີ່ເກີດຂື້ນຢູ່ເມືອງ, ຮັບການລາຍງານສະພາບການເຄື່ອນໄຫວຈັດຕັ້ງປະຕິບັດວຽກງານຂອງໜ່ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງໂຂງ ຈາກ ທ່ານ ປອ ສິດທິພອນ ບຸດຕິວົງ ຮອງເລຂາພັກເມືອງ, ປະທານກວດກາລັດ ຫົວໜ້າໜ່ວຍຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງໂຂງ ແລະ
ໄດ້ຮັບຟັງສະພາບການຈັດຕັ້ງປະຕິບັດຈາກໂຄງການເຂດພັດທະນາໃໝ່ສີທັນດອນ ອີກດ້ວຍ.

ໃນໂອກາດດັ່ງກ່າວ, ທ່ານ ຄໍາໃບ ດໍາລັດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ອໍານາດການປົກຄອງເມືອງໂຂງ ແລະ ພາກສ່ວນທີ່ກ່ຽວຂ້ອງ ທີ່ຍາດໄດ້ຜົນສໍາເລັດໃນໄລຍະຜ່ານມາ ພ້ອມກັນສືບຕໍ່ຮັກສາມູນເຊື້ອອັນດີງາມ, ເພີ່ມທະວີຄວາມສາມາດໃນການຊີ້ນໍານໍາພາການຈັດຕັ້ງປະຕິບັດວຽກງານຮອບດ້ານຂອງເມືອງໃຫ້ມີຜົນສໍາເລັດລື່ນເກົ່າ. ໂດຍສະເພາະການຈັດຕັ້ງປະຕິບັດມະຕິກອງປະຊຸມຂອງພັກ, ຈັດຕັ້ງປະຕິບັດແຜນພັດະນາເສດຖະກິດ-ສັງຄົມ, ວຽກງານການທູດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນ ແລະ ພໍ່ແມ່ປະຊາຊົນ ມີແນວຄິດລິເລີ່ມມີສ່ວນຮ່ວມກັບອໍານາດການປົກຄອງຂັ້ນຕ່າງໆ ບົນທ່າແຮງທີ່ບົ່ມຊ້ອນຂອງຕົນໃນການສ້າງເສດຖະກິດຄອບຄົວໃຫ້ມີຄວາມເຂັ້ມແຂງ, ເຮັດໃຫ້ຊີວິດການເປັນຢູ່ຂອງປະຊາຊົນຮັ່ງມີຜາສຸກ ສັງຄົມມີຄວາມສະຫງົບສຸກເປັນກ້າວໆ.


(ພາບ-ຂ່າວ ສົມວິຈິດ ໄຊມົນຕີ)