ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 31 ມັງກອນ 2022 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ສົມທົບກັບສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18 ແຂວງໄຊສົມບູນ ແລະ ສະມາຊິກສະພາປະຊາຊົນແຂວງ ພ້ອມດ້ວຍການນຳຂອງເມືອງຮົ່ມ ໄດ້ເຄື່ອນໄຫວເຮັດວຽກພົບປະກັບຜູ້ມີສິດເລືອກຕັ້ງທີ່ບ້ານຜາແອ່ນ ເມືອງຮົ່ມ ແຂວງໄຊສົມບູນ.

ການເຄື່ອນໄຫວຄັ້ງນີ້ ໄດ້ຮັບຟັງລາຍງານສະພາບການເຄື່ອນໄຫວ, ທີ່ຕັ້ງ, ຈຸດພິເສດຂອງບ້ານໂດຍຫຍໍ້ ຈາກອຳນາດການປົກຄອງບ້ານຜາແອ່ນ; ຈາກນັ້ນ, ໄດ້ຮັບຟັງຄໍາຄິດຄໍາເຫັນ ແລະ ຂໍ້ສະເໜີຕ່າງໆ ຈາກພໍ່ແມ່ປະຊາຊົນຂອງບ້ານດັ່ງກ່າວ; ພ້ອມນັ້ນ, ຄະນະ ຍັງໄດ້ຜັດປ່ຽນກັນອະບາຍຊີ້ແຈງບາງບັນຫາ ແລະ ບາງຂໍ້ສະເໜີ ພ້ອມທັງຈະນໍາເອົາບາງຂໍ້ສະເໜີ ໄປສະເໜີຕໍ່ກະຊວງ ແລະ ພາກສ່ວນທີ່ກ່ຽວຂ້ອງ ເພື່ອແກ້ໄຂຕາມສິດ ແລະ ພາລະບົດບາດຂອງຕົນ.

ໂອກາດນີ້, ຄະນະ ໄດ້ນໍາເອົາເຄື່ອງຊ່ວຍເຫລືອຈໍານວນໜຶ່ງ ເຊິ່ງປະກອບມີຜ້າຫົ່ມ, ເຈວລ້າງມື ແລະ ອຸປະກອນການສຶກສາ ມອບໃຫ້ບ້ານ ເພື່ອນໍາໄປແຈກຢາຍໃຫ້ຄອບຄົວທີ່ມີຄວາມຫຍຸ້ງຍາກ.

(ພາບ ແລະ ຂ່າວ: ສອນສັກ ວັນວິໄຊ)