ໃນຕອນບ່າຍຂອງວັນທີ 9 ສິງຫາ 2023 ທີ່ສຳນັກງານສະພາຊາຊົນແຂວງຄໍາມ່ວນ ທ່ານ ຄໍາໃບ ດຳລັດ ກໍາມະການສູນກາງພັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຮ່ວມກັບ ຄະນະປະຈໍາສະພາປະຊາຊົນແຂວງຄໍາມ່ວນ ໂດຍການຕ້ອນຮັບ ແລະ ເຂົ້າຮ່ວມເຮັດວຽກຂອງທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍບັນດາທ່ານ ຄະນະປະຈຳສະພາປະຊາຊົນແຂວງ, (ສສຊ) ປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ຄະນະກຳມະການສະພາປະຊາຊົນແຂວງເຂົ້າຮ່ວມ.

ຈຸດປະສົງຂອງການເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້ ກໍ່ເພື່ອຮັບຟັງການລາຍງານການກະກຽມບັນດາເນື້ອໃນຮອບດ້ານໃຫ້ແກ່ການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ທີ່ຈະໄດ້ຈັດຂຶ້ນໃນບໍ່ດົນຕໍ່ໜ້ານີ້. ກອງປະຊຸມໄດ້ຮັບຟັງການລາຍງານຄວາມພ້ອມທາງດ້ານເນື້ອໃນຈາກ ຄະນະປະທານສະພາປະຊາຊົນຂັ້ນແຂວງ ແລະ 3 ຄະນະກຳມະການຂອງສະພາປະຊາຊົນຂັ້ນແຂວງ ໃນການພົວພັນປະສານງານການກະກຽມດ້ານເນື້ອໃນ ເພື່ອນໍາເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II. ຈາກນັ້ນ, ບັນດາທ່ານຜູ້ເຂົ້າຮ່ວມກອງປະຊຸມ ກໍ່ໄດ້ສຸມສະຕິປັນຍາຄົ້ນຄວ້າປະກອບຄຳຄິດຄຳເຫັນຕໍ່ບັນດາເນື້ອໃນດັ່ງກ່າວ ເພື່ອຮັບປະກັນດ້ານເນື້ອໃນໃຫ້ມີປະສິດທິພາບ ແລະ ປະສິດທິຜົນ.

       ຕອນທ້າຍກອງປະຊຸມ ຄະນະນຳຂອງສະພາປະຊາຊົນແຂວງຄໍາມ່ວນ, ໄດ້ມີໂອກາດຮັບຟັງການໂອ້ລົມ ແລະ ໃຫ້ທິດຊີ້ນໍາຂອງ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ເພື່ອຍົກສູງຄຸນນະພາບທາງເນື້ອໃນໃຫ້ແກ່ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງຄໍາມ່ວນ ຊຸດທີ II, ເຊິ່ງກ່ອນອຶ່ນ ທ່ານໄດ້ສະແດງຄວາມຊົມເຊີຍຕໍ່ບັນດາທ່ານຜູ້ຮັບຜິດຊອບໃນການກະກຽມບັນດາເນື້ອໃນຕ່າງໆ ທີ່ມີຄວາມຮັບຜິດຊອບສູງໃນການຈັດຕັ້ງປະຕິບັດວຽກງານທີ່ຕົນຮັບຜິດຊອບໄດ້ເປັນຢ່າງດີ ພ້ອມນັ້ນໃຫ້ເອົາໃຈໃສ່ໃນການຈັດຕັ້ງປະຕິບັດໜ້າທີ່ຕາມແນວທາງນະໂຍບາຍຂອງພັກ, ສອດຄ່ອງກັບ ສິດ ແລະ ໜ້າທີ່ຕາມພາລະບົດຂອງສະພາປະຊາຊົນຂັ້ນແຂວງ ຕາມທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ, ສອດຄ່ອງກັບສະພາບຄວາມເປັນຈິງ ຂອງການພັດທະນາເສດຖະກິດ-ສັງຄົມໃນໄລຍະໃໝ່.

ໂດຍ: ເອື້ອ ມະໂນສິງ ( ອາລີ )