(ສພຊ) ໃນໂອກາດເຂົ້າຮ່ວມກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງສະຫວັນນະເຂດ ຊຸດທີ II, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ຕາງໜ້າໃຫ້ຄະນະປະຈຳສະພາແຫ່ງຊາດ ມີຄຳເຫັນຕໍ່ທີ່ປະຊຸມ ເຊິ່ງມີເນື້ອໃນບາງຕອນວ່າ: ໂດຍຜ່ານການຟັງບົດລາຍງານໂດຍສັງເຂບຂອງທ່ານ ເຈົ້າແຂວງສະຫວັນນະເຂດ ກ່ຽວກັບສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງຊາດ ຂອງແຂວງໄລຍະກາງສະໄໝ ຂອງແຜນການ 5 ປີ (2021-2025) ແລະ ທິດທາງແຜນການທ້າຍສະໄໝ, ບົດລາຍງານຂອງຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023, ບົດລາຍງານ ຂອງຫົວໜ້າພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນການ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີນີ້ ກໍຄື ບົດປະກອບຄໍາເຫັນຂອງຄະນະປະຈໍາ ສະພາປະຊາຊົນແຂວງ ຕໍ່ບົດລາຍງານທັງ 3 ບົດດັ່ງກ່າວ, ຂ້າພະເຈົ້າຮູ້ສຶກປິຕິຊົມຊື່ນ ແລະ ຕີລາຄາສູງຕໍ່ບັນດາຜົນງານ, ຜົນສໍາເລັດຮອບດ້ານ ໃນການພັດທະນາຂອງແຂວງສະຫວັນນະເຂດ ໃນທ່າມກາງທີ່ສະພາບໃນປະເທດເຮົາພວມປະເຊີນກັບສະພາບຄວາມຫຍຸ້ງຍາກດ້ານເສດຖະກິດ-ການເງິນບໍ່ໜ້ອຍ ບວກກັບການຜັນແປຢ່າງສັບສົນວ່ອງໄວ ຂອງສະພາບການພາກພື້ນ, ສາກົນ ທີ່ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ຂອງປະເທດເຮົາ ເວົ້າລວມ, ເວົ້າສະເພາະ ຂອງແຂວງສະຫວັນນະເຂດ ອັນເຮັດໃຫ້ຊີວິດການເປັນຢູ່ຂອງປະຊາຊົນ, ພະນັກງານ-ລັດຖະກອນ ມີຄວາມຫຍຸ້ງຍາກບໍ່ໜ້ອຍ. ແຕ່ດ້ວຍຄວາມຕັດສິນໃຈຂອງຄະນະພັກ, ອໍານາດການປົກຄອງຂອງແຂວງ, ດ້ວຍຄວາມປຸ້ມລຸມສາມັກຄີ ເປັນເອກະພາບ ຂອງບັນດາພະແນກການຂອງແຂວງ, ເມືອງ ເຮັດໃຫ້ການພັດທະນາຂອງແຂວງໄດ້ມີຜົນສໍາເລັດຫຼາຍດ້ານ ເຊິ່ງສະແດງອອກໃນຈັງຫວະການຂະຫຍາຍຕົວ ໃນ 6 ເດືອນຕົ້ນປີ 2023 ເພີ່ມຂຶ້ນໃນລະດັບ 5,58% ເຊິ່ງເປັນຕົວເລກທີ່ສູງກວ່າລະດັບການຂະຫຍາຍຕົວ ຂອງທົ່ວປະເທດ 4,8%, ຫຼາຍຕົວເລກຄາດໝາຍສາມາດປະຕິບັດໄດ້ຕາມແຜນການເຊັ່ນ: ໃນຂະແໜງກະສິກໍາ, ອຸດສາຫະກໍາການຄ້າ, ດ້ານພະລັງງານບໍ່ແຮ່, ການພັດທະນາຊົນນະບົດ, ດ້ານວັດທະນະທໍາ-ສັງຄົມ. ສ່ວນບາງຂະແໜງການ ເຖິງວ່າຈະບໍ່ທັນບັນລຸຕາມເປົ້າໝາຍ ແຕ່ກໍມີຄວາມຄືບໜ້າດີຂຶ້ນເລື້ອຍໆ ອັນເປັນການສ້າງພື້ນຖານໃຫ້ແກ່ການແກ້ໄຂຄວາມຫຍຸ້ງຍາກ, ຄວາມທຸກຍາກຂອງປະຊາຊົນຢູ່ເມືອງຕ່າງໆ ພາຍຫຼັງທີ່ມີການກໍານົດມາດຖານຄວາມຫຍຸ້ງຍາກ ຕາມດໍາລັດ 348/ລບ ກໍຄືຕິດພັນກັບການຈັດຕັ້ງປະຕິບັດ ສອງວາລະແຫ່ງຊາດໃຫ້ມີຄວາມຄືບໜ້າ.
ຂ້າພະເຈົ້າ ເຫັນວ່າບັນດາທິດທາງແຜນພັດທະນາເສດຖະກິດ-ສັງຄົມ ໃນໄລຍະ 6 ເດືອນທ້າຍປີ 2023 ກໍຄືໄລຍະທ້າຍສະໄໝນີ້ ເຫັນວ່າໄດ້ມີກຳນົດການຈະແຈ້ງ ແລະ ມີຈຸດສຸມໃນແຕ່ລະດ້ານແລ້ວ ຂ້າພະເຈົ້າເຊື່ອໝັ້ນວ່າ ດ້ວຍການນໍາພາ-ຊີ້ນໍາ ທີ່ແທດເໝາະກັບສະພາບຕົວຈິງ, ທ່າແຮງຂອງແຂວງ ບວກກັບຫົວຄິດປະດິດສ້າງ, ກ້າຄິດ ກ້າທໍາຂອງການນໍາຂັ້ນຕ່າງໆຂອງແຂວງ ຈະສາມາດເຮັດໃຫ້ບັນດາເປົ້າໝາຍທີ່ແຂວງວາງໄວ້ນັ້ນ ຈະປາກົດຜົນເປັນຈິງ, ສາມາດສ້າງໃຫ້ແຂວງສະຫວັນນະເຂດ ເຊິ່ງເປັນແຂວງໃຫຍ່ກວ່າໝູ່ໃນປະເທດລາວ ທັງມີທ່າແຮງຫຼາຍດ້ານນັ້ນ ໃຫ້ເປັນແຂວງທີ່ນໍາໜ້າໃນການພັດທະນາເສດຖະກິດ-ສັງຄົມ, ປະກອບສ່ວນເຂົ້າໃນຜົນສໍາເລັດລວມຂອງທົ່ວປະເທດ.
ທ່ານ ຮອງປະທານສະພາແຫ່ງຊາດ ຍັງໄດ້ຕີລາຄາສູງຕໍ່ການເຄື່ອນໄຫວຂອງສະພາປະຊາຊົນແຂວງ ທີ່ມີຜົນສຳເລັດຫຼາຍດ້ານ ໃນການປະຕິບັດພາລະບົດບາດສ້າງ ແລະ ປັບປຸງນິຕິກຳ, ການຕົກລົງບັນຫາພື້ນຖານຂອງທ້ອງຖິ່ນ, ການຕິດຕາມກວດກາ, ອັນໄດ້ບົດບາດຂອງສະພາປະຊາຊົນແຂວງໄດ້ຮັບການຍົກສູງຂຶ້ນເລື້ອຍໆ.
ພ້ອມດຽວກັນນີ້, ທ່ານ ຮອງປະທານສະພາແຫ່ງຊາດ ໄດ້ມີການເນັ້ນໜັກບາງບັນຫາ ເພື່ອໃຫ້ແຂວງສືບຕໍ່ເຮັດສໍາເລັດແຜນການໃນທ້າຍສະໄໝ ກໍຄືແຜນ 6 ເດືອນທ້າຍປີ ການເຄື່ອນໄຫວຂອງສະພາປະຊາຊົນແຂວງ ວາງອອກນັ້ນ ເຊັ່ນ:
1. ໃນສະພາບທີ່ປະເທດເຮົາຍັງສືບຕໍ່ມີຄວາມຫຍຸ້ງຍາກດ້ານເສດຖະກິດ-ການເງິນ, ມີໄພເງິນເຟີ້, ອັດຕາແລກປ່ຽນເໜັງຕິງແຮງ, ລາຄາສິນຄ້າຖີບຕົວຂຶ້ນສູງຄືປັດຈຸບັນນີ້, ຍິ່ງກວ່າຍາມໃດໝົດທີ່ການນໍາຂອງແຂວງຈະຕ້ອງໄດ້ສາມັກຄີ ເປັນຈິດໜຶ່ງໃຈດຽວກັນ ເພື່ອນໍາພາຊີ້ນໍາ ແລະ ຮ່ວມກັບປະຊາຊົນ ເພື່ອສ້າງໃຫ້ມີຄວາມເປັນເອກະພາບກັບພັກ, ລັດ, ເພື່ອເປັນແຮງໜຶ່ງຊວ່ຍໃຫ້ປະເທດເຮົາສາມາດຫຼຸດພົ້ນອອກຈາກຄວາມທຸກຍາກ ບົນພື້ນຖານສ້າງເສດຖະກິດ ໃຫ້ເຂັ້ມແຂງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໂດຍສຸມໃຊ້ທ່າແຮງທີ່ເຮົາມີໃນປະເທດ, ໃນແຂວງຂອງພວກເຮົາ. ທີ່ຜ່ານມາ ກອງປະຊຸມກາງສະໄໝ ຂອງຄະນະບໍລິຫານງານສູນກາງພັກ ແລະ ກອງປະຊຸມສະໄໝສາມັນ ເທື່ອທີ 5 ກໍໄດ້ເນັ້ນໜັກເຖິງການແກ້ໄຂຄວາມທຸກຍາກຕ່າງໆຂອງປະເທດເຮົາ ໃຫ້ບັນລຸຜົນຕົວຈິງແລ້ວ ແລະ ລັດຖະບານກໍພວມມີມາດຕະການຕ່າງໆ ເພື່ອແກ້ໄຂບັນຫາທັງໃນໄລຍະສະເພາະໜ້າ ແລະ ຍາວນານ.
2. ອໍານາດການປົກຄອງແຂວງ, ສະພາປະຊາຊົນແຂວງ ພ້ອມກັນປຶກສາຫາລືບັນຫາຕ່າງໆ ຢ່າງກົມກຽວ ກໍານົດທ່າແຮງຂອງຕົນໃຫ້ຈະແຈ້ງ ຖືກກັບຄວາມເປັນຈິງ ເພື່ອສາມາດພັດທະນາແຂວງໃຫ້ໄປຖືກທິດ ແລະ ໃຫ້ນັບມື້ນັບເຂັ້ມແຂງ.
3. ປັບປຸງກົງຈັກຂອງແຂວງໃຫ້ມີຄວາມເຂັ້ມແຂງ ເພື່ອສາມາດຮອງຮັບກັບໜ້າທີ່ການເມືອງໃນໄລຍະໃໝ່, ເອົາໃຈໃສ່ການປັບປຸງກໍ່ສ້າງຮາກຖານການເມືອງໃຫ້ເຂັ້ມແຂງ, ສ້າງພູມຕ້ານທານມາແຕ່ຮາກຖານ ເພື່ອຕ້ານໄດ້ກົນອຸບາຍທໍາລາຍມ້າງເພຂອງພວກບໍ່ຫວັງດີ ທີ່ພະຍາຍາມສວຍໃຊ້ຄວາມຫຍຸ້ງຍາກ ຂອງພວກເຮົາ ເພື່ອໃສ່ຮ້າຍປ້າຍສີ, ໂຈມຕີປະເທດເຮົາ, ແບ່ງແຍກຄວາມສາມັກຄີ ໂດຍຜ່ານສື່ອອນລາຍຄືປັດຈຸບັນ.
4. ໂຄສະນາ, ເຜີຍແຜ່ບັນດາແນວທາງນະໂຍບາຍຂອງພັກ-ລັດ ໃຫ້ປະຊາຊົນເຂົ້າໃຈ, ຮັບຮູ້, ເຂົ້າຮ່ວມການຈັດຕັ້ງປະຕິບັດ. ສະເພາະໜ້ານີ້ ບັນດາສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ ໃນທົ່ວປະເທດ ມີໜ້າທີ່ໃນການໂຄສະນາເຜີຍແຜ່ ບັນດາຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ເພື່ອໃຫ້ປະຊາຊົນຮັບຮູ້ໄດ້ວ່າ ຕົວແທນຂອງປະຊາຊົນ ບັນດາ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ພວມເຮັດຫຍັງເພື່ອຜົນປະໂຫຍດຂອງເຂົາເຈົ້າ.
5. ໃຫ້ຄວາມສໍາຄັນໃນການປະຕິບັດກົນໄກປະສານງານ ລະຫວ່າງສູນກາງ-ທ້ອງຖິ່ນ, ລະຫວ່າງສະພາແຫ່ງຊາດ-ສະພາປະຊາຊົນແຂວງ ກັບອໍານາດການປົກຄອງຂອງແຂວງ ເພື່ອພ້ອມກັນປະຕິບັດໜ້າທີ່ການເມືອງຂອງຕົນໃຫ້ມີຜົນສໍາເລັດຫຼາຍຂຶ້ນກວ່າເກົ່າ.
ໃນຕອນທ້າຍ, ທ່ານ ຮອງປະທານສະພາແຫ່ງຊາດ ໄດ້ສະແດງຄວາມເຊື່ອໝັ້ນວ່າ ດ້ວຍຄວາມສາມັກຄີປຸ້ມລຸມກັນ, ແຂວງສະຫວັນນະເຂດ ຈະສາມາດປະຕິບັດບັນດາຄາດໝາຍຂອງແຂວງໃຫ້ປາກົດຜົນເປັນຈິງ ພ້ອມທັງອວຍພອນໃຫ້ກອງປະຊຸມປະສົບຜົນສຳເລັດຢ່າງຈົບງາມ.