(ສພຊ) – ຕອນບ່າຍວັນທີ 15 ກໍລະກົດນີ້ ທີ່ຫ້ອງຮັບແຂກສະພາແຫ່ງຊາດ, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ລັດດາ ແທມມີ ດັກເວີດ (Ladda Tammy Duckworth) ສະມາຊິກສະພາສູງລັດອິວລິນອຍ (Illinois), ສະຫະລັດອາເມລິກາ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 14-17 ກໍລະກົດ 2024.
ໃນການຢ້ຽມຂ່ຳນັບ, ນາງ ລັດດາ ແທມມີ ດັກເວີດ ໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບອັນອົບອຸ່ນ ແລະ ລາຍງານການປະຕິບັດໜ້າທີ່ວຽກງານຂອງຕົນໂດຍຫຍໍ້ ພ້ອມທັງແຈ້ງໃຫ້ຊາບຈຸດປະສົງຂອງການມາຢ້ຽມຢາມ ແລະ ເຮັດວຽກຄັ້ງນີ້ ເພື່ອຕິດຕາມກວດກາການນຳໃຊ້ງົບປະມານການຊ່ວຍເຫຼືອຂອງສະຫະລັດອາເມລິກາ ຢູ່ ສປປ ລາວ ຕໍ່ເສດຖະກິດ, ພະລັງງານເປັນມິດກັບສິ່ງແວດລ້ອມ ແລະ ການພັດທະນາແບບຍືນຍົງ.
ທ່ານ ສົມມາດ ພົລເສນາ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຄັ້ງນີ້ ເປັນການປະກອບສ່ວນເສີມສ້າງສາຍພົວພັນຮ່ວມມືອັນດີນຳກັນ ແລະ ໄດ້ຍົກລະດັບການພົວພັນຮ່ວມມືສອງຝ່າຍ ສປປລາວ – ສ.ອາເມລິກາ ເປັນຄູ່ຮ່ວມມືແບບກວມລວມ ໃຫ້ເປັນຮູບປະທຳຫຼາຍຂຶ້ນ; ທັງປິຕິຍິນດີເປັນຢ່າງຍິ່ງທີ່ການພົວ ພັນຮ່ວມມືສອງຝ່າຍໃນໄລຍະຜ່ານມາ ໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ ນັບແຕ່ໄດ້ສ້າງຕັ້ງສາຍພົວພັນການທູດຮ່ວມກັນໃນວັນທີ 10 ສິງຫາ 1955 ທ່ານຍັງໄດ້ສະແດງຄວາມຂອບໃຈເປັນຢ່າງສູງຕໍ່ລັດຖະບານສະຫະລັດອາເມລິກາ ທີ່ໄດ້ໃຫ້ການສະໜັບສະໜູນ ສປປລາວ ພາຍໃຕ້ການເປັນຄູ່ຮ່ວມມືແບບກວມລວມ ລາວ-ອາເມລິກາ ໃນຂະແໜງການຕ່າງໆເຊັ່ນ: ການແກ້ໄຂບັນຫາຕົກຄ້າງຈາກສົງຄາມ (ເກັບກູ້ລະເບີດຍັງບໍ່ທັນແຕກ – UXO, ຊອກຄົ້ນສິ່ງເສດເຫຼືອປາງສົງຄາມ – MIA), ການຈັດຕັ້ງປະຕິບັດກົດໝາຍ ແລະ ປາບປາມຢາເສບຕິດ, ດ້ານເສດຖະກິດ-ການຄ້າ, ສາທາລະນະສຸກ, ສຶກສາ, ພະລັງງານ, ກະສິກໍາ, ວັດທະນະທໍາ-ສັງຄົມ ແລະ ອື່ນໆ. ການສະໜັບສະໜູນ ແລະ ຊ່ວຍເຫຼືອຂອງອາເມລິກາ ເປັນການປະກອບສ່ວນອັນສຳຄັນໃຫ້ແກ່ການພັດທະນາຢູ່ ສປປລາວ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການບັນລຸເປົ້າໝາຍການພັດທະນາແບບຍືນຍົງ (SDGs) ລວມທັງປະກອບສ່ວນໃນການສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19; ການຈັດຕັ້ງປະຕິບັດໂຄງການຮ່ວມມືຕ່າງໆໃນໄລຍະຜ່ານມາ ເຫັນວ່າມີປະສິດທິພາບ, ປະສິດທິຜົນ ກໍຄືສາມາດບັນລຸໄດ້ຕາມເປົ້າໝາຍ ໂດຍຜ່ານອົງການຈັດຕັ້ງສາກົນຕ່າງໆ.
ສໍາລັບການພົວພັນຮ່ວມມືລະຫວ່າງສອງອົງການນິຕິບັນຍັດຂອງສອງປະເທດ ແມ່ນມີການພົວພັນຮ່ວມມືອັນດີນຳກັນ; ໃນໄລຍະ 5 ປີຜ່ານມາ ໄດ້ມີຄະນະຜູ້ແທນລະດັບກຳມາທິການຂອງລັດຖະສະພາອາເມລິກາ ຢ້ຽມຢາມຢ່າງເປັນທາງການຢູ່ ສປປລາວ 2 ຄະນະ, ຝ່າຍລາວແມ່ນທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ຢ້ຽມຢາມ ແລະ ທັດສະນະສຶກສາຢູ່ ສ.ອາເມລິກາ ໃນເດືອນກໍລະກົດ 2023 ເຊິ່ງຖືວ່າເປັນບາດກ້າວໃໝ່ແຫ່ງການພົວ ພັນຮ່ວມມື; ສຳລັບການພົວພັນຮ່ວມມືໃນເວທີລັດຖະສະພາພາກພື້ນ ແລະ ສາກົນ ກໍມີການພົວພັນປະສານງານກັນ ເປັນຕົ້ນໃນເວທີລັດຖະສະພາອາຊີ-ປາຊີຟິກ (APPF), ສະມັດຊາລັດຖະສະພາລະຫວ່າງຊາດອາຊຽນ (AIPA) ແລະ ອື່ນໆ.
ສໍາລັບການພົວພັນຮ່ວມມືລະຫວ່າງສອງອົງການນິຕິບັນຍັດໃນຕໍ່ໜ້າ, ທ່ານຮອງປະທານສະພາແຫ່ງຊາດ ສະເໜີສືບຕໍ່ການແລກປ່ຽນຄະນະຜູ້ແທນຂັ້ນສູງ, ກຳມາທິການ, ຄະນະເລຂາທິການ, ຄະນະມິດຕະພາບລັດຖະສະພາ ແລະ ວິຊາການຮ່ວມກັນ ຕິດພັນກັບການແລກປ່ຽນຂໍ້ມູນ ແລະ ບົດຮຽນປະສົບການກ່ຽວກັບການປະຕິບັດພາລະບົດບາດດ້ານນິ ຕິບັນຍັດ; ສະໜັບສະໜູນ ແລະ ຊ່ວຍເຫຼືອພາຍໃຕ້ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະ ຊາຊົນຂັ້ນແຂວງ ຫຼື ສະເຕັບສ໌ (STEPs) ທີ່ພວມຈັດຕັ້ງປະຕິບັດຮ່ວມກັບສະພາແຫ່ງຊາດລາວ; ຊຸກຍູ້ການພົວພັນຮ່ວມມືໃນເວທີລັດຖະສະພາພາກພື້ນ ແລະ ສາກົນ ໂດຍສະເພາະໃນປີນີ້ ສປປລາວ ເປັນປະທານອາຊຽນ ແລະ ສະພາແຫ່ງຊາດລາວ ເປັນປະທານໄອປາ ແລະ ຈະຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 (AIPA-45) ໃນວັນທີ 17-23 ຕຸລາ 2024 ແລະ ຫວັງຢ່າງຍິ່ງວ່າ ສະຫະລັດອາເມລິກາ ຈະໃຫ້ການສະໜັບສະໜູນໂດຍສົ່ງຄະນະເຂົ້າຮ່ວມໃນນາມລັດຖະສະພາສັງເກດການ.
(ນາງ ອາລິນ ສຸພິມມະປະດິດ)