ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນໂອກາດເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ເຊິ່ງນຳໂດຍທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ທັງເປັນສະມາ ຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ, ທ່ານ ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ແຂວງໄຊຍະບູລີ ຮ່ວມກັບທ່ານ ເພັງນິລັນ ຄຳພັນເພັງ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ແຂວງໄຊຍະບູລີ, ມີສະມາຊິກສະພາປະຊາຊົນແຂວງ, ຄະນະປະຈຳພັກເມືອງໄຊຍະບູລີ, ຫົວໜ້າ-ຮອງຫົວໜ້າພະແນກ ການອ້ອມຂ້າງແຂວງ ຕະຫຼອດຮອດພະນັກງານຫຼັກແຫຼ່ງຂອງແຂວງຢູ່ທີ່ຫໍປະຊຸມໃຫຍ່ຂອງແຂວງໄຊຍະບູລີ ໃນວັນທີ 8 ກັນຍາ 2022.
ໂອກາດດັ່ງກ່າວ, ສະມາຊິກສະພາແຫ່ງຊາດ ໄດ້ຜັດປ່ຽນກັນເຜີຍແຜ່ຜົນຂອງກອງປະຊຸມ ປະກອບມີບັນດາມະຕິ, ກົດໝາຍ ແລະ ບັນດາເນື້ອໃນເອກະສານບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ໄຊຍະບູລີ ຊຸດທີ II; ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ມີການແລກປ່ຽນຄຳຄິດເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ.
ນອກນັ້ນ, ສະມາຊິກສະພາແຫ່ງຊາດ ຍັງໄດ້ນຳເອົາເຄື່ອງມາມອບໃຫ້ສະພາປະຊາຊົນແຂວງໄຊຍະບູລີ ເປັນຕົ້ນ ເຂົ້າສານ 50 ເປົາ, ຄອມພິວເຕີ, ເຄື່ອງປຣິນເຕີ, ເຄື່ອງກິລາ ແລະ ຊຸດໂຊລາເຊວ 10 ຊຸດ ລວມມູນຄ່າທັງໝົດ 160 ລ້ານກວ່າກີບ ເພື່ອນຳໄປມອບຕໍ່ໃຫ້ບັນດາເມືອງທີ່ຍັງມີຄວາມຫຍຸ້ງຍາກ.
ກ່ອນໜ້ານັ້ນ, ໃນວັນທີ 7 ກັນຍາ 2022, ຄະນະ ກໍໄດ້ເຜີຍແຜ່ຜົນສຳເລັດຂອງສອງກອງປະຊຸມດັ່ງກ່າວ ຢູ່ເມືອງທົ່ງມີໄຊ ແຂວງໄຊຍະບູລີ ເຊິ່ງມີສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງທົ່ງມີໄຊ, ຄະນະປະຈຳພັກເມືອງທົ່ງມີໄຊ, ພະນັກງານອາວຸໂສ-ບຳນານ ຕະຫຼອດຮອດພະນັກງານຫຼັກແຫຼ່ງໃນທົ່ວເມືອງທົ່ງມີໄຊເຂົ້າຮ່ວມທັງໝົດ 94 ທ່ານ ຍິງ 17 ທ່ານ.
ໃນການລົງເຄື່ອນໄຫວຄັ້ງນີ້ ໄດ້ຮັບຟັງການລາຍງານການຈັດຕັ້ງປະຕິບັດວຽກງານທີ່ພົ້ນເດັ່ນຂອງເມືອງທົ່ງມີໄຊ ໃນໄລຍະ 6 ເດືອນຜ່ານມາ ຈາກທ່ານ ສົມພອນ ໄຊດວງຕາ ເຈົ້າເມືອງເມືອງທົ່ງມີໄຊ ໂດຍສັງເຂບ ຕໍ່ສະມາຊິກສະພາແຫ່ງຊາດ ແລະ ສະມາຊິກປະຊາຊົນແຂວງ ໂດຍຕິດພັນກັບອົງການປົກຄອງເມືອງ.
ຈາກນັ້ນ, ທ່ານ ພົທ. ສຸວອນ ເລືອງບຸນມີ ໄດ້ຍົກໃຫ້ເຫັນບາງເນື້ອໃນມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022, ການຈັດຕັ້ງປະຕິບັດແຜນງົບປະມານແຫ່ງລັດ ແລະ ແຜນເງິນຕາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022, ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງໂຄວິດ-19, ມະຕິ ວ່າດ້ວຍການຮັບຮອງເອົາບົດລາຍງານຜົນການຕິດຕາມກວດກາຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໃນໄລຍະຜ່ານມາ ແລະ ທິດທາງແຜນການຕິດຕາມກວດກາຮອດປີ 2023 ຂອງສະພາແຫ່ງຊາດ, ມະຕິ ວ່າດ້ວຍການຮັບຮອງເອົາການແຕ່ງຕັ້ງຮອງນາຍົກລັດຖະມົນຕີ ແຫ່ງ ສປປລາວ, ມະຕິ ວ່າດ້ວຍການຮັບຮອງເອົາການຍົກຍ້າຍ ແລະ ແຕ່ງຕັ້ງສະມາຊິກລັດຖະບານ, ມະຕິ ວ່າດ້ວຍການເລືອກຕັ້ງປະທານອົງການກວດສອບແຫ່ງລັດ ແລະ ມະຕິ ວ່າດ້ວຍການຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 9 ສະບັບ.
(ພາບ ແລະ ຂ່າວ: ນາງ ກຸກກິກ ບຸດດາໄຊ ແລະ ນີ່ຕູ່ ປະສິດທິພົງ)