ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 ​(ສພຊ) ວັນທີ 17-18 ກຸມພາຜ່ານມາ, ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ເພື່ອຕິດຕາມຊີ້ນໍາການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ພ້ອມທັງໂອ້ລົມພະນັກງານການນຳຫລັກແຫລ່ຢູ່ທີ່ເຮືອນພັກເລກ 1 ຂອງແຂວງ ໂດຍມີທ່ານ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງຄຳມ່ວນ, ມີບັນດາຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ, ຄະ ນະສະມາຊິກສະພາປະຊາຊົນແຂວງ, ຫົວໜ້າພະແນກການ ແລະ ຂະແໜງການອ້ອມຂ້າງແຂວງເຂົ້າຮ່ວມ.

ທ່ານ ບຸນມີ ພິມມະສອນ ໄດ້ລາຍງານໃຫ້ຮູ້ວ່າ: ແຂວງຄຳມ່ວນໄດ້ຈັດຕັ້ງເຊື່ອມຊຶມມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງໄດ້ 161 ຄັ້ງ, ມີຜູ້ເຂົ້າຮ່ວມຮັບຟັງທັງໝົດ 72.741 ສະຫາຍ, ຍິງ 31.632 ສະຫາຍ ໃນນັ້ນມີສະມາຊິກພັກ 15.398 ສະຫາຍ ເທົ່າກັບ 75,98% ຂອງສະມາຊິກພັກໃນທົ່ວແຂວງ. ສູ້ຊົນຈັດຕັ້ງປະຕິບັດ ເຮັດໃຫ້ເສດຖະກິດຂອງແຂວງຂະຫຍາຍຕົວໃນລະດັບ 5,73%, ສະເລ່ຍລາຍຮັບຕໍ່ຫົວຄົນໄດ້ 2.272 ໂດລາ/ປີ, ທາງດ້ານການຜະລິດເຂົ້າແມ່ນບັນລຸໄດ້ 100,20% ແລະ ການຜະລິດພືດບັນລຸຄາດໝາຍຢ່າງກ້າວກະໂດດເຖິງ 180,41%. ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ແມ່ນໄດ້ປັບປຸງກຳລັງເຈົ້າໜ້າທີ່ ປກສ ແຕ່ລະຂັ້ນໃຫ້ມີຄວາມເຂັ້ມແຂງ, ບັນດາປາກົດການຫຍໍ້ທໍ້ຈຳນວນໜຶ່ງ ໄດ້ຮັບການແກ້ໄຂ ເຮັດໃຫ້ທົ່ວແຂວງ ຮັກສາໄດ້ສະຖຽນລະພາບທາງດ້ານການເມືອງຢ່າງໜັກ  ແໜ້ນ, ສັງຄົມມີຄວາມສະຫງົບ ແລະ ປອດໄພໂດຍພື້ນຖານ ດ້ານວຽກງານອື່ນໆ ກໍໄດ້ຮັບການຈັດຕັ້ງປະຕິບັດ ແລະ ພັດທະນາດີຂຶ້ນເປັນກ້າວໆ.

ໂອກາດດັ່ງກ່າ, ທ່ານ ປອ. ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມ ເຊິ່ງໄດ້ສະແດງຄວາມຊົມເຊີຍມາຍັງການນຳຂອງແຂວງ ທີ່ໄດ້ເອົາໃຈໃສ່ໃນການເຜີຍແຜ່ມະຕິກອງປະຊຸມໃຫຍ່ ຄັ້ງທີ XIອງພັກ ຕິດພັນກັບການຜັນຂະຫຍາຍ 2 ວາລະແຫ່ງຊາດໄດ້ຢ່າງກວ້າງຂວາງ ແລະ ທົ່ວເຖິງ ພິເສດແມ່ນຄວາມພະຍາຍາມເອົາໃຈໃສ່ສູ້ຊົນ ເຮັດໃຫ້ເສດຖະກິດມີການຂະຫຍາຍຕົວໃນລະດັບທີ່ດີ, ການເກັບລາຍຮັບປະຕິບັດໄດ້ລື່ນແຜນການແລະ ມີຄວາມເຊື່ອໝັ້ນວ່າ ດ້ວຍຄວາມພະຍາມ, ຄວາມສາມັກຄີເປັນອັນໜຶ່ງດຽວ ແລະ ຄວາມເປັນເອກະພາບສູງຂອງການນຳທຸກຂັ້ນຂອງແຂວງ ຈະປະຕິບັດບັນດາຄາດໝາຍສູ້ຊົນໃນທຸກດ້ານທີ່ໄດ້ວາງໄວ້ໃນປີ 2022 ໃຫ້ບັນລຸຕາມຄາດໝາຍ ບໍ່ວ່າຈະເປັນທາງດ້ານການເກັບລາຍຮັບ, ການສືບຕໍ່ປະຕິບັດຜັນຂະຫຍາຍມະຕິກອງປະຊຸມໃຫຍ່ຂອງພັກ, ກອງປະຊຸມໃຫຍ່ຂອງອົງຄະນະພັກແຂວງ ກໍຄືການປະຕິບັດ 2 ວາລະແຫ່ງຊາດຢູ່ພາຍໃນແຂວງ, ການປະຢັດ ຕ້ານການຟຸມເຟືຍ ແລະ ອື່ນໆ.

ໂອກາດດຽວກັນ, ທ່ານຮອງປະທານສະພາແຫ່ງຊາດ ຍັງໄດ້ຢ້ຽມຢາມເບິ່ງຈຸດຕັ້ງໂຮງງານຜະລິດໄຟຟ້າພະລັງຖ່ານຫີນ ຂອງບໍລິສັດບົວລະພາພາວເວີ ແລະ ຢ້ຽມຊົມແຫລ່ງທ່ອງທ່ຽວ ຖໍ້ານໍ້າລອດເຊບັ້ງໄຟ ຢູ່ເມືອງບົວລະພາ.

(ຂ່າວ ແລະ ພາບໂດຍກົງໃຈ ແສງອໍາພັນ)