ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ໃນລະຫວ່າງ ວັນທີ 19 – 23 ສິງຫາ 2022 ນີ້ ທ່ານ ສົມມາດ ພົລເສນາ ກໍາມະການສູນກາງພັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 15 ແຂວງຈໍາປາສັກ ພ້ອມຄະນະໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ແຂວງຈໍາປາສັກ ເຊິ່ງໃນຄະນະປະກອບມີ ທ່ານ ປອ. ໄຊບັນດິດ ຣາສະພົນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15  ແລະ ທ່ານ ນາງ ບູນມີ ຈຸນລະຈັກ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ສົມທົບກັບບັນດາສະມາຊິກສະພາປະຊາຊົນແຂວງ ຢູ່ບັນດາເຂດເລືອກຕັ້ງ ໂດຍປະກອບມີ 6 ຈຸດເຄື່ອນໄຫວ ຄື: ບ້ານກົ່ງຕູນ, ບ້ານເສັດຄົດ, ຫ້ອງວ່າການເມືອງປາກຊ່ອງ, ໂຮງຮຽນຕໍາຫຼວດເລກ 4, ມະຫາວິທະຍາໄລຈໍາປາສັກ ແລະ ຫ້ອງວ່າການນະຄອນປາກເຊ ໂດຍໄດ້ຮັບການຕອນຮັບຢ່າງອົບອຸ່ນຈາກຄະນະພັກ ແລະ ຄະນະນໍາຂອງບັນດາຈຸດດັ່ງກ່າວ.

 

ການເຄື່ອນໄຫວຂອງທ່ານຮອງປະທານສະພາແຫ່ງຊາດ ພ້ອມຄະນະ ໃນຄັ້ງນີ້, ເພື່ອພົບປະຢ້ຽມຢາມ ແລະ ຊຸກຍູ້ວຽກງານຕ່າງໆ ໂດຍຕິດພັນກັບການນໍາເອົາເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຈໍາປາສັກ ຊຸດທີ II ເຜີຍແຜ່ໃຫ້ປະຊາຊົນ, ພະນັກງານ-ລັດຖະກອນ, ທະຫານ-ຕໍາຫຼວດ ໄດ້ຮັບຮູ້ເຊື່ອມຊຶມ ແລະ ເຂົ້າໃຈຢ່າງເລິກເຊິ່ງ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ພິຈາລະນາຮັບຮອງເອົາຫຼາຍບັນກາສໍາຄັນທີ່ເປັນພື້ນຖານຂອງຊາດ ເປັນຕົ້ນ: ກອງປະຊຸມໄດ້ຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນ ຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ແຜນງົບປະມານແຫ່ງລັດ, ການສັບຊ້ອນກົງຈັກຂອງລັດຖະບານ ແລະ ໄດ້ຮັບຮອງເອົາຮອງນາຍຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕປະຊາຊົນລາວ ຈໍານວນ 2 ທ່ານ, ແຕ່ງຕັ້ງ ທ່ານ ວິໄລ ຫລ້າຄໍາຟອງ ເປັນຮອງນາຍຍົກລັດຖະມົນຕີ, ທັງເປັນລັດຖະມົນຕີກະຊວງປ້ອງກັນຄວາມສະຫງົບ, ແຕ່ງຕັ້ງທ່ານ ສະເຫຼີມໄຊ ກົມມະສິດ ເປັນຮອງນາຍຍົກລັດຖະມົນຕີ, ທັງເປັນລັດຖະມົນຕີກະຊວງການຕ່າງປະເທດ, ພ້ອມໄດ້ຮັບຮອງເອົາທ່ານ ວຽງທະວີສອນ  ເທບພະຈັນ ກໍາມະການສໍາຮອງສູນກາງພັກເປັນປະທານອົງການກວດສອບແຫ່ງລັດ,  ແຕ່ງຕັ້ງທ່ານ ມະໄລທອງ ກົມມະສິດ ເປັນລັດຖະມົນຕີກະຊວງອຸດສະຫະກຳ ແລະ ການຄ້າ, ການສ້າງ ແລະ ປັບປຸງກົດໝາຍ ແລະ ບັນຫາອື່ນໆ ທີ່ທ່ານຮອງປະທານສະພາແຫ່ງຊາດ ໄດ້ຍົກໃຫ້ເຫັນຢ່າງລະອຽດຈະແຈ້ງ.

ໃນການລົງເຄື່ອນໄຫວຂອງທ່ານຮອງປະທານສະພາແຫ່ງຊາດ ພ້ອມຄະນະໃນຄັ້ງນີ້, ຍັງໄດ້ນໍາເງິນສົດ ແລະ ເອົາເຄື່ອງອຸປະກອນຈໍານວນໜຶ່ງ ເຊັ່ນ: ເຄື່ອງນຸ່ງຮົ່ມ, ຜ້າຮົ່ມ, ປື້ມຂຽນ ແລະ ສິ່ງຂອງຊ່ວຍເຫຼືອອື່ນໆ ມອບໃຫ້ພໍ່ແມ່ປະຊາຊົນ ແລະ ສະຖາບັນການສຶກສາ ລວມມູນຄາ 92,300 000 ກີບ ( ເກົ້າສິບສອງລ້ານສາມແສນກີບ).