(ສພຊ) ໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຽງຂວາງ ຊຸດທີ II ທີ່ໄດ້ຈັດຂຶ້ນໃນລະຫວ່າງວັນທີ 15-17 ກຸມພາ 2023 ທີ່ແຂວງຊຽງຂວາງ. ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ນຳເອົາເຄື່ອງນຸ່ງຫົ່ມຈຳນວນ 100 ຊຸດ ມອບໃຫ້ພໍ່ແມ່ປະຊາຊົນເຂດບ້ານສັນ ເມືອງຄູນ ແລະ ມອບໃຫ້ສະພາປະຊາຊົນແຂວງຊຽງຂວາງ ຈຳນວນ 270 ຊຸດ ເພື່ອນຳໄປມອບຕໍ່ໃຫ້ປະຊາຊົນທີ່ຂາດເຂີນເຂດຫ່າງໄກສອກຫຼີກ ລວມມູນຄ່າທັງໝົດ 10 ລ້ານກີບ. ພ້ອມນັ້ນ, ຍັງໄດ້ເຂົ້າຮ່ວມພິທີມອບຫຼຽນລາງວັນກິລາຄົນພິການ, ເຂົ້າຮ່ວມພິທີປິດກິລາຄົນພິການແຫ່ງຊາດ ຄັ້ງທີ III ທີ່ແຂວງຊຽງຂວາງເປັນເຈົ້າພາບ ແລະ ຍັງໄດ້ຢ້ຽມຢາມພື້ນຖານເສດຖະກິດຈຳນວນໜຶ່ງຂອງແຂວງຊຽງຂວາງຕື່ມອີກ.