ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 10 ກັນຍາ 2022 ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍທ່ານ ບຸນໂຮມ ເທດທານີ ປະທານສະພາປະຊາຊົນແຂວງຊຽງຂວາງ ແລະ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 9 ແຂວງຊຽງຂວາງ, ຄະນະຕິດຕາມຈາກສະພາແຫ່ງຊາດ, ສະພາປະຊາຊົນແຂວງຊຽງຂວາງ, ສະມາຊິກສະພາປະຊາຊົນແຂວງຊຽງຂວາງ ປະຈຳເມືອງໜອງແຮດ ໄດ້ເດີນທາງຢ້ຽມຢາມ ແລະ ມອບເຄື່ອງອຸປະກອນການສຶກສາ ແລະ ກິລາ ໃຫ້ໂຮງຮຽນປະຖົມສົມບູນ ບ້ານແກ່ວຕະປູ, ໂຮງຮຽນປະຖົມບ້ານໜອງອໍ້, ໂຮງຮຽນປະຖົມສົມບູນ ບ້ານໜອງຊ້າງ.
ເຄື່ອງອຸປະກອນທີ່ນຳໄປມອບໃນຄັ້ງນີ້ ປະກອບມີປື້ມຂຽນ, ຊຸດສີລະບາຍຮູບພາບ, ບານເຕະ, ປິ່ງປ໋ອງ, ຕະກໍ້ ແລະ ອື່ນໆອີກຈຳນວນໜຶ່ງ ລວມມູນຄ່າ 50 ກວ່າລ້ານກີບ ໂດຍໄດ້ຮັບທຶນສະໜັບສະໜູນຈາກມູນນິທິພັດທະນາລ້ານຊ້າງ-ແມ່ຂອງ ແລະ ຄອບຄົວຂອງທ່ານຮອງປະທານສະພາແຫ່ງຊາດ.
ໃນໂອກາດດັ່ງກ່າວ, ບັນດາທ່ານອຳນວຍການຂອງໂຮງຮຽນ ໄດ້ລາຍງານກ່ຽວກັບສະພາບການໂດຍຫຍໍ້ຂອງໂຮງຮຽນ ເຊິ່ງເຫັນວ່າ ນັກຮຽນຈຳນວນຫຼາຍຍັງຂາດເຂີນເຄື່ອງນຸ່ງທີ່ກັນໜາວ ແລະ ອຸປະກອນການຮຽນ, ຂາດງົບປະມານໃນການສ້ອມແປງໂຮງຮຽນທີ່ເປ່ເພ.
ໃນໂອກາດນີ້, ທ່ານ ປອ. ນາງ ສູນທອນ ໄຊຍະຈັກ ໄດ້ສະແດງຄວາມຊົມເຊີຍບັນດາພະນັກງານ, ຄູສອນຂອງໂຮງຮຽນທີ່ໄດ້ເອົາໃຈໃສ່ໃນການສິດສອນນັກຮຽນຂອງຕົນ ເຖິງແມ່ນວ່າຈະພົບບັນຫາຫຍຸ້ງຍາກຕ່າງໆກໍຕາມ, ທ່ານຍັງໄດ້ເນັ້ນໃຫ້ຄູອາຈານທຸກທ່ານ ສືບຕໍ່ເປັນແມ່ພິມທີ່ດີຂອງຊາດ, ຜ່ານການສິດສອນ ໃຫ້ເດັກກາຍເປັນອະນາຄົດຂອງຊາດທີ່ມີຄຸນນະພາບ, ກາຍເປັນຄົນດີຂອງຊາດ, ຂອງສັງຄົມ ແລະ ປະເທດຊາດ.
(ພາບ ແລະ ຂ່າວ: ນາງ ປາກາລັກ ພົມມີໄຊ)