ວັນທີ 17 ສິງຫາ 2024 ທ່ານ ສົມມາດ ພົລເສນາ ຮອງປະທານສະພາແຫ່ງຊາດ, ພ້ອມດວ້ຍ ທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ໂດຍສົມທົບ ກັບຂະແໜງການທີ່ກ່ຽວຂ້ອງທຸກຂັ້ນ ໄດ້ເຄື່ອນໄຫວຕິດຕາມສະພາບຜົນກະທົບດ້ານສິ່ງແວດລ້ອມ ຂອງບັນດາບໍລິສັດ ທີ່ຂຸດຄົ້ນ ແຮ່ກົ່ວ ຢູ່ບໍ່ແໜ່ງ-ບໍ່ໂພນຕີ້ວ ເມືອງຫີນບູນ ແຂວງຄໍາມ່ວນ.

   ໂອກາດການເຄື່ອນໄຫວ ຮອງປະທານສະພາແຫ່ງຊາດ ແລະ ຄະນະ ແມ່ນໄດ້ຮັບຟັງການລາຍງານໂດຍສັງເຂບກ່ຽວກັບການຈັດຕັ້ງປະຕິບັດ ໂຄງການລົງທຶນ ຂອງຜູ້ປະກອບການທຸລະກິດ ທີ່ດໍາເນີນການຂຸດຄົ້ນແຮ່ກົ່ວ ຢູ່ທີ່ບໍ່ແໜ່ງ-ບໍ່ໂພນຕິ້ວ, ປັດຈຸບັນມີຈໍານວນທັງໝົດ 22 ບໍລິສັດ, ໃນນັ້ນໂຄງການຂຸດຄົ້ນປົກກະຕິມີ 18 ບໍລິສັດ ແລະ ອີກ 4 ບໍລິສັດເປັນການຂຸດຄົ້ນທົດລອງ, ບັນດາໂຄງການດັ່ງກ່າວ ສ່ວນຫຼາຍແມ່ນຂັ້ນສູນກາງອະນຸມັດ, ພ້ອມດຽວກັນ ຍັງໄດ້ຮັບຟັງລາຍງານການຄຸ້ມຄອງ ສະພາບບັນຫາດ້ານສິ່ງແວດລ້ອມ ເປັນຕົ້ນແມ່ນ: ບັນຫາການຈັດການອ່າງຮາງແຮ່ ແລະ ການຂຸດຄົ້ນຕ່າງໆ ທີ່ສົງຜົນກະທົບທາງກົງ ແລະ ທາງອ້ອມຕໍ່ສິ່ງແວດລ້ອມ-ສັງຄົມ, ໂດຍສະເພາະແມ່ນສົ່ງຜົນເສຍໃຫ້ຫ້ວຍນໍ້າລໍາທານໃນເຂດດັ່ງກ່າວ ບໍ່ສາມາດນໍາໃຊ້ໄດ້, ເຊິ່ງບັນຫາຕົ້ນຕໍ ແມ່ນເກີດຈາກການເຊາະລ້າງເສັ້ນທາງ, ຈາກການຂຸດຄົ້ນແຮ່ຂອງບໍລິສັດ ແລະ ການຂຸດຄົ້ນແຮ່ແບບຫັດຖະກໍາຂອງປະຊາຊົນ.

ໃນນາມຕາງໜ້າການນໍາພັກ-ລັດ ກໍຄືສະພາແຫ່ງຊາດ ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ຍັງໄດ້ແນະນໍາ ໃຫ້ບັນດາກົມທີ່ກ່ຽວຂ້ອງຂອງສອງກະຊວງຄື: ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ກະຊວງພະລັງງານ ແລະ ບໍ່ແຮ່ ຈົ່ງໄດ້ປະສານສົມທົບກັນຢ່າງໜັກແໜ້ນ ເພື່ອສືບຕໍ່ໃນການແກ້ໄຂບັນຫາ ລວມເຖິງການກໍານົດ ຂອບເຂດພື້ນທີ່ສໍາປະທານໃຫ້ລະອຽດຊັດເຈນ ແລະ ມີແບບແຜນໃນການຈັດຕັ້ງປະຕິບັດຢ່າງເຄັ່ງຄັດໃນການຮັກສາສິ່ງແວດລ້ອມ. ເພື່ອໃຫ້ບັນດາບໍລິສັດ ໄດ້ປະຕິບັດຕາມມາດຕະການຢ່າງເດັດຂາດ, ໃຫ້ຫັນເປັນມືອາຊີບ ແລະ ເຂັ້ມງວດ, ພ້ອມດຽວກັນນັ້ນ ຍັງໄດ້ສະເໜີໃຫ້ຂະແໜງການລັດຂັ້ນທ້ອງຖິ່ນ ຈົ່ງໄດ້ສືບຕໍ່ເກັບກໍາຂໍ້ມູນສະພາບບັນຫາຕ່າງໆ ທີ່ຕິດພັນກັບທຸລະກິດການຂຸດຄົ້ນແຮ່ທາດ ເພື່ອລາຍງານເປັນເອກະສານ ສົ່ງຜ່ານສະພາປະຊາຊົນແຂວງ ຕາມຂັ້ນຕອນ. ນອກນັ້ນ ທ່ານ ແລະ ຄະນະຍັງໄດ້ເຄື່ອນໄຫວເບິ່ງໂຮງງານຜະລິດແຮ່ກົ່ວຂອງບໍລິສັດຈໍານວນໜຶ່ງໃນເຂດດັ່ງກ່າວຕື່ມອີກ.