ວັນທີ 7 ກຸມພາ 2024, ເນື່ອງໃນໂອກາດທີ່ມາເຄື່ອນໄຫວຢ້ຽມຢາມ, ພົບປະ ຜູ້ມີສິດເລືອກຕັ້ງທີຕິດພັນກັບການຈັດຕັ້ງຜັນຂະຫຍາຍເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II, ຢູ່ເມືອງຄູນຄໍາ, ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ມີ ຮອງປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ໄດ້ເຄື່ອນໄຫວຢ້ຽມຢາມ, ຕິດຕາມຄວາມຄືບໜ້າຂອງໂຄງການກໍ່ສ້າງເຂື່ອນໄຟຟ້ານໍ້າຫີນບູນ, ໂດຍໄດ້ຮັບການຕ້ອນຮັບ ແລະເຂົ້າຮ່ວມເຮັດວຽກຂອງທ່ານ ແກ້ວວິໄລ ໄຊຍະບູດ ເຈົ້າເມືອງຄູນຄໍາ, ມີທ່ານ ແສງເພັດ ຍາບັນດິດ ຮອງຫົວໜ້າໂຄງການເຂື່ອນໄຟຟ້ານໍ້າຫີນບູນ, ມີຄະນະພະແນກການທີ່ກ່ຽວຂ້ອງຂອງແຂວງ, ພ້ອມດ້ວຍບັນດາທ່ານຄະນະປະຈໍາພັກເມືອງ, ກຳມະການພັກເມືອງ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.

ໂອກາດດັ່ງກ່າວ ຄະນະໄດ້ຮັບຟັງການລາຍງານຄວາມຄືບໜ້າວຽກງານໂຄງການເຂື່ອນໄຟຟ້ານໍ້າຫີນບູນ. ຈາກນັ້ນ, ຄະນະຕິດຕາມ ໄດ້ມີຄໍາຖາມເຈາະຈີ້ມ ແລະ ແລກປ່ຽນຄຳຄິດຄໍາເຫັນ ເຊິ່ງກັນ ແລະ ກັນ; ຈາກນັ້ນ, ທ່ານ ຮອງປະທານສະພາແຫ່ງຊາດ ໄດ້ມີຄໍາເຫັນ ເພື່ອໃຫ້ທິດຊີ້ນໍາໂຄງການດັ່ງກ່າວໃຫ້ສືບຕໍ່ດຳເນີນການກໍ່ສ້າງຕໍ່ໃຫ້ສຳເລັດ, ເອົາໃຈ ໃສ່ບັນຫາຜົນກະທົບຕໍ່ສິ່ງແວດລ້ອມ, ການຈັດສັນທີ່ຢູ່ອາໄສໃຫ້ປະຊາຊົນມີບ່ອນການຜະລິດກະສິກຳ, ຊົນລະປະທານ, ການສ້າງວຽກເຮັດງານທຳ, ການທ່ອງທ່ຽວ, ການສ້າງບຸກຄະລາກອນສືບທອດ.

ຫຼັງຈາກນັ້ນ, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ພົບປະກັບປະຊາຊົນຢູ່ບ້ານໜອງຮາງ ແລະ ເຂດບ້ານຈັດສັນທີ່ຢູ່ອາໃສໃຫ້ປະຊາຊົນ ທີ່ບ້ານຄູນມະນີ ເມືອງຄູນຄໍາອີກດ້ວຍ.

ໂດຍ: ເອື້ອ ມະໂນສິງ