(ສພຊ) ພາຍຫຼັງສຳເລັດການເຂົ້າຮ່ວມກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງສະຫວັນນະເຂດ ຊຸດທີ II ທີ່ດຳເນີນແຕ່ວັນທີ 23-25 ສິງຫາຜ່ານມາ, ໃນວັນທີ 26 ສິງຫາ 2023, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍບັນດາທ່ານ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງສະຫວັນນະເຂດ ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນສະຫວັນນະເຂດ ຊຸດທີ II ຢູ່ທີ່ສະໂມສອນເມືອງຈຳພອນ ແລະ ບ້ານເຄືອເຂົາກາດ ເມືອງຈຳພອນ ແຂວງສະຫວັນນະເຂດ ໂດຍໄດ້ຮັບການຕ້ອນຮັບຈາກທ່ານ ປອ. ພູລຳພອນ ສີຫາວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງຈຳພອນ, ບັນດາການນຳຂອງເມືອງ, ພະແນກການ, ຂະແໜງການ, ອົງການຈັດຕັ້ງມະຫາຊົນ, ອຳນາດການປົກຄອງບັນດາບ້ານ ພ້ອມດ້ວຍຜູ້ມີສິດເລືອກຕັ້ງພາຍໃນບັນດາບ້ານເທສະບານເມືອງເຂົ້າຮ່ວມຢ່າງພ້ອມພຽງ.

ໃນເວລາເຄື່ອນໄຫວຢູ່ແຕ່ລະຈຸດ, ບັນດາທ່ານ ການນຳຂອງເມືອງ, ບ້ານ ໄດ້ລາຍງານໂດຍຫຍໍ້ ກ່ຽວກັບສະພາບການພັດທະນາເສດຖະກິດ-ສັງຄົມຂອງເມືອງ ແລະ ບ້ານ, ຈາກນັ້ນ ທ່ານ ຮອງປະທານສະພາແຫ່ງຊາດ ແລະ ບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ໄດ້ຜັດປ່ຽນກັນຂຶ້ນສະເໜີຜົນສໍາເລັດກອງປະຊຸມສະພາແຫ່ງຊາດ ຊຸດທີ IX ແລະ ສະພາປະຊາຊົນສະຫວັນນະເຂດ ຊຸດທີ II ເຊິ່ງໄດ້ຍົກໃຫ້ເຫັນການພິຈາລະນາ ແລະ ຮັບຮອງບາງບັນຫາສຳຄັນຕ່າງໆຂອງຊາດ, ຂອງທ້ອງຖິ່ນ ທັງໄດ້ຮັບຟັງຄຳຄິດຄຳເຫັນ ແລະ ຂໍ້ສະເໜີຕ່າງໆຂອງຜູ້ມີສິດເລືອກຕັ້ງ ເຊິ່ງສ່ວນໃຫຍ່ແມ່ນກ່ຽວກັບການແກ້ໄຂຄວາມທຸກຍາກຂອງປະຊາຊົນໃນສະພາບທີ່ປະເທດເຮົາພວມມີການປະເຊີນໜ້າກັບຄວາມຫຍຸ້ງຍາກດ້ານເສດຖະກິດ-ການເງິນ, ບັນຫາເສັ້ນທາງຄົມມະນາຄົມມີຄວາມຫຍຸ້ງຍາກ, ບັນຫາປາກົດການຫຍໍ້ທໍ້ດ້ານຢາເສບຕິດ, ຄຸນນະພາບການສຶກສາ, ຄູອາສາສະໝັກ.

ໂອກາດດັ່ງກ່າວ, ທ່ານ ຮອງປະທານສະພາແຫ່ງຊາດ, ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ສະຫວັນນະເຂດ ກໍໄດ້ສະແດງຄວາມຊົມເຊີຍຕໍ່ບັນດາຜົນສຳເລັດຂອງເມືອງ, ບ້ານ ໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ, ຮຽກຮ້ອງໃຫ້ເມືອງ, ບ້ານ ສືບຕໍ່ນຳໃຊ້ທ່າແຮງທີ່ມີຂອງຕົນ ເພື່ອພ້ອມກັນຜ່ານຜ່າຄວາມຫຍຸ້ງຍາກໃນປັດຈຸບັນ, ອະທິບາຍ, ຊີ້ແຈງຕໍ່ຂໍ້ສະເໜີຕ່າງໆຂອງຜູ້ມີສິດເລືອກຕັ້ງ ທັງຮັບເອົາຄຳຄິດຄຳເຫັນ, ຄຳສະເໜີຂອງພໍ່ແມ່ປະຊາຊົນບາງບັນຫາ ເພື່ອນຳໄປສະເໜີໃຫ້ພາກສ່ວນກ່ຽວຂ້ອງ ຄົ້ນຄວ້າພິຈາລະນາ ແລະ ຫາທິດທາງແກ້ໄຂໃນຕໍ່ໜ້າ.