(ສພຊ) ວັນທີ 27 ກຸມພາ 2023, ສະຫາຍ ພົນໂທ ສຸວອນ ເລືອງບຸນມີ ກໍາມະການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ ພ້ອມດ້ວຍຄະນະ ໄດ້ລົງເຄື່ອນໄຫວພົບປະໂອ້ລົມພະນັກງານຫຼັກແຫຼງຢູ່ກອງພົນທີ 3, ມີສະຫາຍ ພົນຈັດຕະວາ ໄຊຍະວົງ ໄຊນາມທິລາດ ເລຂາຄະນະພັກ ຫົວໜ້າການທະຫານ ກອງພົນທີ 3, ສະຫາຍ ພັນເອກ ສໍຍັນ ລໍອິນສອນ ຮອງເລຂາຄະນະພັກ ຫົວໜ້າການເມືອງກອງພົນທີ 3, ມີພະນັກງານຫຼັກແຫຼ່ງມາຈາກອົງການ, ກົມກອງເຂົ້າຮ່ວມ.

ສະຫາຍ ພົນຈັດຕະວາ ໄຊຍະວົງ ໄຊນາມທິລາດ ໄດ້ລາຍງານສະພາບການໂດຍຫຍໍ້ ເປັນຕົ້ນແມ່ນສະພາບເງື່ອນໄຂຂໍ້ສະດວກ, ຂໍ້ຫຍຸ້ງຍາກ, ການນຳພາ-ບັນຊາ, ການສຶກສາອົບຮົມການເມືອງ-ແນວຄິດ ຂອງພະນັກງານ-ນັກຮົບ, ວຽກງານພັກ-ພະນັກງານ, ການປັບປຸງກໍ່ສ້າງກຳລັງ-ກໍ່ສ້າງກົມກອງ ແລະ ສະພາບພາຍໃນຂອບເຂດກົມກອງຮັບຜິດຊອບ.

ໂອກາດນີ້ ສະຫາຍ ພົນໂທ ສຸວອນ ເລືອງບຸນມີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ-ຄະນະບັນຊາ, ພະນັກງານ-ນັກຮົບທົ່ວກອງພົນທີ 3 ຍາດມາໄດ້ຕະຫຼອດໄລຍະຜ່ານມາ, ພ້ອມທັງຍົກໃຫ້ເຫັນສະພາບການອັນຜົນເດັ່ນຂອງໂລກ, ພາກພື້ນ ແລະ ສະພາບພາຍໃນທີ່ພວມຜັນແປ່ໄປຢ່າງສັບສົນ, ພ້ອມທັງຮຽກຮ້ອງໃຫ້ຄະນະພັກ-ຄະນະບັນຊາແຕ່ລະຂັ້ນຍົກສູງນ້ຳໃຈຮັບຜິດຊອບຂອງຕົນຕໍ່ໜ້າທີ່ການເມືອງທີ່ພັກ-ລັດຂັ້ນເທິງ ກໍຄືການຈັດຕັ້ງມອບໝາຍໃຫ້, ເປັນເຈົ້າການປະຕິບັດຄຳຂວັນຮັກຊາດ ແລະ ພັດທະນາ, ຕັ້ງໜ້າປັບປຸງກໍ່ສ້າງກຳລັງໃຫ້ມີຄວາມເຂັ້ມແຂງ, ປັບປຸງກໍ່ສ້າງກົມກອງໃຫ້ມີຄວາມແໜ້ນໜາຖາວອນ, ເປັນເຈົ້າການເຮັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະກໍຄືຂອບເຂດກົມກອງຮັບຜິດຊອບໃຫ້ມີຄວາມສະຫງົບເປັນພື້ນຖານ, ປະຊາຊົນມີທາງທຳມາຫາກິນ, ມີໂອກາດພັດທະນາເສດຖະກິດ-ສັງຄົມ, ຫັນລົງກໍ່ສ້າງຮາກຖານການເມືອງ ຕິດພັນກັບການປະຕິບັດ 2 ວາລະແຫ່ງຊາດ ຂອງລັດຖະບານ ເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ຂອງສັງຄົມ ໃຫ້ນັບມື້ດີຂຶ້ນກວ່າເກົ່າ.

ໂອກາດດັ່ງກ່າວ ຄະນະ ຍັງໄດ້ມອບຄອມພິວເຕີ ຈຳນວນ 1 ຊຸດ ແລະ ອຸປະກອນກິລາອີກຈຳນວນໜຶ່ງ ໃຫ້ຄະນະພັກ-ຄະນະບັນຊາກອງພົນທີ 3.