ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ຕອນເຊົ້າວັນທີ 6 ກັນຍາ 2022 ທີ່ສະໂມສອນເມືອງປາກລາຍ ແຂວງໄຊຍະບູລີ ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ແຂວງໄຊຍະບູລີ ພ້ອມດ້ວຍຄະນະ ປະກອບມີທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ ໄດ້ຢ້ຽມຢາມພົບປະຜູ້ມີສິດເລືອກຕັ້ງ ຢູ່ເມືອງປາກລາຍ ແຂວງໄຊຍະບູລີ ໂດຍການຕ້ອນຮັບຂອງທ່ານ ກອງສີ ວົງສີ ເຈົ້າເມືອງໆປາກລາຍ ພ້ອມດ້ວຍພະນັກງານອ້ອມຂ້າງ ລວມທັງໝົດ 260 ທ່ານ ຍິງ 120 ທ່ານ.
ໃນກອງປະຊຸມ ຄະນະ ໄດ້ຮັບຟັງການລາຍງານສະພາບພົ້ນເດັ່ນ ໃນການຊີ້ນໍາ-ນໍາພາຈັດຕັ້ງປະຕິບັດວຽກງານໃນໄລຍະ 6 ເດືອນຕົ້ນປີ 2022 ແລະ ການຈັດຕັ້ງປະຕິບັດມະຕິທີ່ສະພາໄດ້ຮັບຮອງ ຕິດພັນກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ມະຕິ ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງ, ມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 9 ສະໄໝທີ VIII ແຜນພັດທະນາເສດຖະກິດ-ສັງຄົມຂອງເມືອງມີຜົນສໍາເລັດພົ້ນເດັ່ນໃນຫຼາຍດ້ານ.
ໃນຕອນບ່າຍຂອງວັນດຽວກັນ ຄະນະ ໄດ້ສືບຕໍ່ເຜີຍແຜ່ເຊື່ອມຊຶມຜົນສຳເລັດຂອງສອງກອງປະຊຸມ ຢູ່ກອງພັນໃຫຍ່ 201 ກອງພົນທີ 2 ເຊິ່ງນຳໂດຍທ່ານ ພົນໂທ ສຸວອນ ເລືອງບຸນມີ ຮ່ວມກັບທ່ານ ເພັງນິລັນ ຄຳພັນເພັງ, ມີຄະນະປະຈຳພັກເມືອງປາກລາຍ, ມີຄະນະພັກ-ຄະນະບັນຊາກອງພັນໃຫຍ່, ພະແນກການ, ກອງພັນນ້ອຍ ຕະຫຼອດຮອດພະນັກ ງານຫຼັກແຫຼ່ງໃນທົ່ວກອງພັນໃຫຍ່ເຂົ້າຮ່ວມທັງໝົດ 100 ກວ່າທ່ານ.
ໃນໂອກາດດັ່ງກ່າວ ໄດ້ຮັບຟັງການລາຍງານການຈັດຕັ້ງປະຕິບັດວຽກງານທີ່ພົ້ນເດັ່ນຂອງກອງພັນໃຫຍ່ 201 ໃນໄລຍະ 6 ເດືອນຜ່ານມາ ຈາກທ່ານ ພັນໂທ ຄຳແສງ ພັນອິນດາ ຮອງເລຂາຄະນະພັກ, ຫົວໜ້າການທະຫານ ກອງພັນໃຫຍ່ 201 ໂດຍສັງເຂບ.
ພາຍຫຼັງຮັບຟັງການລາຍງານແລ້ວ, ທ່ານ ພົນໂທ ສຸວອນ ເລືອງບຸນມີ ໄດ້ມີຄໍາເຫັນໂອ້ລົມ ແລະ ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ວ່າ: ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022 ເຊິ່ງໄດ້ຕີລາຄາສູງຕໍ່ຄວາມພະຍາຍາມຂອງລັດຖະບານ ໃນການສູ້ຊົນເຮັດໃຫ້ອັດຕາການເຕີບໂຕທາງດ້ານເສດຖະກິດ ສາມາດບັນລຸໄດ້ 4,3%, ຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ ແລະ ສາມາດປະຄັບປະຄອງເສດຖະກິດບໍ່ໃຫ້ເຂົ້າສູ່ວິກິດການທີ່ໜັກໜ່ວງໄປກວ່ານີ້, ມີການແຕ່ງຕັ້ງຄະນະຮັບຜິດຊອບ ເພື່ອແກ້ໄຂບັນຫາການເໜັງຕີງແຮງຂອງລາຄາສິນຄ້າ, ອັດຕາແລກປ່ຽນ, ຄວາມຫຍຸ້ງຍາກທາງດ້ານນໍ້າມັນເຊື້ອໄຟ, ພ້ອມກັນນັ້ນ, ໄດ້ມີການໂຄສະນາເຜີຍແຜ່, ປຸກລະດົມໃຫ້ປະຊາຊົນລາວບັນດາເຜົ່າ ເພີ່ມທະວີນໍ້າໃຈປະຢັດມັດທະຍັດ, ມີຄວາມສາມັກຄີເປັນຈິດໜຶ່ງໃຈດຽວ ພ້ອມກັນແກ້ໄຂບັນຫາໃນເວລາທີ່ປະເທດຊາດພົບຄວາມຫຍຸ້ງຍາກ; ມະຕິ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ ຕິດພັນກັບການປ້ອງກັນ ແລະ ຮັບມືກັບການແຜ່ລະບາດຂອງພະຍາດໂຄວິດ-19, ການຈັດຕັ້ງປະຕິບັດບັນດາຄາດໝາຍຂະແໜງສຶກສາທິການ ແລະ ກິລາ, ການປັບປຸງຄຸນນະພາບລະບົບການຮຽນ-ການສອນ ທຸກຊັ້ນທຸກສາຍ ໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍຍະກໍາ, ມະຕິ ວ່າດ້ວຍການຮັບຮອງເອົາບົດລາຍງານຜົນການຕິດຕາມກວດກາຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໃນໄລຍະຜ່ານມາ ແລະ ທິດທາງແຜນການຕິດຕາມກວດກາຮອດປີ 2023 ຂອງສະພາແຫ່ງຊາດ, ມະຕິ ວ່າດ້ວຍການຮັບຮອງເອົາການແຕ່ງຕັ້ງຮອງນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ມະຕິ ວ່າດ້ວຍການຮັບຮອງເອົາການຍົກຍ້າຍ ແລະ ແຕ່ງຕັ້ງສະມາຊິກລັດຖະບານ, ມະຕິ ວ່າດ້ວຍການເລືອກຕັ້ງປະທານອົງການກວດສອບແຫ່ງລັດ ແລະ ມະຕິ ວ່າດ້ວຍການຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 9 ສະບັບ, ທັງນີ້ ກໍເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ບັນດາເນື້ອໃນບັນຫາສໍາຄັນຕ່າງໆ ທີ່່ລັດຖະບານສະເໜີຕໍ່ກອງປະຊຸມສະພາແຫ່ງຊາດ ໃຫ້ບັນດາພະນັກງານຫຼັກແຫຼ່ງຂອງເມືອງປາກລາຍ ແລະ ກອງພັນໃຫຍ່ຮັບຮູ້ເຂົ້າໃຈຢ່າງຈະແຈ້ງ.
ໂອກາດດັ່ງກ່າວ ຄະນະ ຍັງໄດ້ນຳເອົາຄອມພິວເຕີ ແລະ ອຸປະກອນກິລາຈຳນວນໜຶ່ງ ມອບໃຫ້ກອງພັນໃຫຍ່ 201.
(ພາບ-ຂ່າວ: ນາງ ກຸກກິກ ບຸດດາໄຊ ແລະ ເກດ ອານຸສອນ)