ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

  ໃນຕອນເຊົ້າຂອງວັນທີ 9 ກຸມພາ 2022 ນີ້ ທ່ານ ສົມມາດ ພົລເສນາ ກໍາມະການສູນກາງພັກ, ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 15 ແຂວງຈໍາປາສັກ ສົມທົບກັບບັນດາທ່ານສະມາຊິກສະພາປະຊາຊົນແຂວງ ພ້ອມດ້ວຍຄະນະ ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄຫມສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະພາປະຊາຊົນແຂວງຈໍາປາສັກ ຊຸດທີ II ທີ່ສະໂມສອນເມືອງສຸຂຸມາ ແຂວງຈໍາປາສັກ, ມີຄະນະນໍາຂອງເມືອງ, ທະຫານ, ຕຳຫລວດ, ພະນັກງານ-ລັດຖະກອນ ແລະ ນາຍບ້ານອ້ອມຂ້າງເມືອງເຂົ້າຮ່ວມ.

ທ່ານ ສົມເພັດ ບຸດສະດີ ກໍາມະການພັກແຂວງ, ເລຂາພັກເມືອງ, ເຈົ້າເມືອງເມືອງສຸຂຸມາ : ໄດ້ລາຍງານໂດຍຫຍໍ້ ກ່ຽວກັບສະພາບທີ່ຕັ້ງ ແລະ ຈຸດພິເສດຂອງເມືອງ, ດ້ານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາດ້ານເສດຖະກິດ, ດ້ານວັດທະນະທຳ-ສັງຄົມ, ວຽກງານຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19. ນອກຈາກນັ້ນ, ກໍໄດ້ຍົກໃຫ້ເຫັນດ້ານຄົງຄ້າງ ແລະວຽກງານຈຸດສຸມໃນຕໍ່ຫນ້າ. ຈາກນັ້ນ, ກອງປະຊຸມໄດ້ຮັບຟັງການເຜີຍແຜ່ຜົນເນື້ອໃນສໍາເລັດ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຈໍາປາສັກ ຊຸດທີ II ຈາກສະມາຊິກສະພາປະຊາຊົນແຂວງ.

ໂອກາດດັ່ງກ່າວ, ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຕີລາຄາສູງຕໍ່ໝາກຜົນຜົນງານຂອງເມືອງທີ່ຍາດມາໄດ້ ພ້ອມທັງມີຄໍາເຫັນໂອ້ລົມ ໂດຍໄດ້ເຜີຍແຜ່ຜົນເນື້ອໃນສໍາເລັດກອງປະຊຸມສະໄໝວິສາມັນເທື່ອທີ 1- ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ໄດ້ພິຈາລະນາຮັບຮອງເອົາຫຼາຍບັນຫາສໍາຄັນ ທີ່ເປັນພື້ນຖານຂອງຊາດ ແລະ ຂອງທ້ອງຖິ່ນ ອອກເປັນມະຕິກອງປະຊຸມຈໍານວນຫຼາຍມະຕິ ທີ່ລັດຖະບານ ແລະ ອົງການປົກຄອງທ້ອງຖິ່ນ ຈະໄດ້ສຸມໃສໃນການຈັດຕັ້ງປະຕິບັດ. ການລົງເຄື່ອນໄຫວຂອງທ່ານຮອງປະທານສະພາແຫ່ງຊາດໃນຄັ້ງນີ້, ຍັງຈະສືບຕໍ່ເຄື່ອນໄຫວພົບປະຜູ້ມີສິດເລືອກຕັ້ງອີກຫຼາຍຈຸດພາຍໃນແຂວງຈໍາປາສັກ.

(ພາບ-ຂ່າວ: ສົມວິຈິດ ໄຊມົນຕີ ແລະ ສີສຸພັນ ສີສະຫວັດ)