(ສພຊ) ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ-ຣັດເຊຍ ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ນະຄອນຫຼວງມົດສະກູ ສ.ຣັດເຊຍ ໃນລະຫວ່າງວັນທີ 20-25 ກໍລະກົດ 2023 ໂດຍການຕ້ອນຮັບຂອງທ່ານ ປາເວວ ຕຣາການົບ ປະທານຄະນະມິດຕະພາບລັດຖະສະພາ ຣັດເຊຍ-ລາວ, ສະມາຊິກກໍາມາທິການງົບປະມານ ເເລະ ຕະຫຼາດການເງິນ ສະພາສູງ ຣັດເຊຍ.

ໃນການເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້ ທ່ານ ພົນໂທ ສຸວອນ ເລືອງບຸນມີ ໄດ້ນຳພາຄະນະພົບປະສອງຝ່າຍກັບທ່ານ ປາແວວ ທາຣາການົບ ພ້ອມດ້ວຍຄະນະມິດຕະພາບລັດຖະສະພາ ຣັດເຊຍ-ລາວ, ທັງສອງຝ່າຍໄດ້ຕີລາຄາສູງຕໍ່ການພົບປະ ແລະ ຢ້ຽມຢາມໃນຄັ້ງນີ້ ຖືເປັນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ມີມາແຕ່ດົນນານ ແລະ ຕໍ່ເນື່ອງ ລະຫວ່າງ ສປປລາວ ແລະ ສ.ຣັດເຊຍ ເວົ້າລວມ, ເວົ້າສະເພາະລະຫວ່າງສະພາແຫ່ງຊາດລາວ ແລະ ລັດຖະສະພາຣັດເຊຍ ໃຫ້ແໜ້ນແຟ້ນ ແລະ ນັບມື້ນັບຂະຫຍາຍຕົວຍິ່ງໆຂຶ້ນ ເຊິ່ງຖືເປັນກົນໄກໜຶ່ງເພື່ອຊຸກຍູ້ ແລະ ສົ່ງເສີມການພົວພັນ ແລະ ຮ່ວມມື ຂອງສອງອົງການນິຕິບັນຍັດ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທຳຍິ່ງໆຂຶ້ນ ໂດຍສະເພາະແມ່ນການຊຸກຍູ້ ຂະແໜງການເສດະກິດຂອງສອງຝ່າຍ ໃຫ້ເພີ່ມທະວີການຮ່ວມມືໃນແຕ່ລະຂົງເຂດທີ່ທັງສອງຝ່າຍມີທ່າແຮງ ແລະ ມີຄວາມສົນໃຈນຳກັນ.

ໃນການພົບປະແລກປ່ຽນບົດຮຽນນຳກັນ ທັງສອງຝ່າຍໄດ້ແຈ້ງສະພາບການໂດຍສັງເຂບ ກ່ຽວກັບການພັດທະນາເສດຖະກິດ-ສັງຄົມ ແລະ ການເຄື່ອນໄຫວ ຂອງອົງການນິຕິບັນຍັດ ໃຫ້ກັນ ແລະ ກັນຊາບ. ພ້ອມນີ້, ສອງຝ່າຍໄດ້ຕີລາຄາສູງການພົວພັນ ແລະ ຮ່ວມມືສອງຝ່າຍ ຂອງອົງການນິຕິບັນຍັດ ແລະ ຂອງສອງຄະນະມິດຕະພາບລັດຖະສະພາລາວ-ຣັດເຊຍ, ຣັດເຊຍ-ລາວ ໃນໄລຍຜ່ານມາ ເຊິ່ງສະແດງອອກໃນການຈັດຕັ້ງປະຕິບັດບັນດາແຜນການຮ່ວມມື, ກົນໄກການຮ່ວມມືຕ່າງໆ ລະຫວ່າງສອງຄະນະມິດຕະພາບ ແລະ ສອງສະພາລາວ-ຣັດເຊຍ ຢ່າງຕັ້ງໜ້າ ແລະ ນັບມື້ນັບເປັນຮູບປະທໍາ ເປັນຕົ້ນ ການແລກປ່ຽນການຢ້ຽມຢາມ, ແລກປ່ຽນຂໍ້ມູນຂ່າວສານ ແລະ ທັດສະນະຕໍ່ບັນຫາຕ່າງໆ ຂອງພາກພື້ນ ແລະ ສາກົນ, ພ້ອມກັນນີ້ ຍັງໄດ້ເອກະພາບກ່ຽວກັບທິດທາງການຮ່ວມມືໃນຕໍ່ໜ້າອີກດ້ວຍ.

ນອກຈາກນັ້ນ ທ່ານ ພົນໂທ ສຸວອນ ເລືອງບຸນມີ ພ້ອມດ້ວຍຄະນະ ຍັງໄດ້ພົບປະກັບທ່ານ ກັນສະຕານຈິນ ໂກຊາຈົບ ຮອງປະທານສະພາສູງ, ທ່ານ ໂຊບານ ວາເລລີເອວິຈ ຮອງປະທານດູມາ ແຫ່ງ ສ.ຣັດເຊຍ, ພົບປະຢ້ຽມຢາມສະມາຄົມມິດຕະພາບ ຣັດເຊຍ-ລາວ ເຊິ່ງໄດ້ພ້ອມກັນຍົກໃຫ້ເຫັນຄວາມໝາຍສໍາຄັນ ຂອງສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສປປລາວ ແລະ ສ.ຣັດເຊຍ ກໍຄືຄວາມສະໜິດສະໜົມ ຂອງປະຊາຊົນສອງປະເທດ ທີ່ມີມູນເຊື້ອຊ່ວຍເຫຼືອ ສະໜັບສະໜູນ ເຊິ່ງກັນ ແລະ ກັນ ເປັນຕົ້ນ ດ້ານການສຶກສາ, ສ້າງຊັບພະຍາກອນມະນຸດໃນທຸກຂົງເຂດ. ນອກນີ້, ສອງຝ່າຍ ຍັງໄດ້ສັງເກດຕີລາຄາວ່າ ການພົວພັນທາງດ້ານເສດຖະກິດ, ການຄ້າ ແລະ ການທ່ອງທ່ຽວຍັງບໍ່ຫຼາຍ ເຊິ່ງສອງຝ່າຍຄວນສົ່ງເສີມຕໍ່ໜ້າ. ໃນໂອກາດນີ້, ສະຫາຍຮອງປະທານສະພາແຫ່ງຊາດ ຍັງໄດ້ພົບປະໂອ້ລົມກັບພະນັກງານສະຖານທູດ ແລະ ນັກສຶກສາລາວ ທີ່ກຳລັງສຶກສາ ຢູ່ ສ.ຣັດເຊຍ ເພື່ອຢ້ຽມຢາມຖາມຂ່າວ ແລະ ໃຫ້ກຳລັງໃຈນັກສຶກສາທີ່ຢູ່ຕ່າງແດນ ໃຫ້ຕັ້ງໃຈສຶກສາຄົ້ນຄວ້າຮ່ຳຮຽນ ເພື່ອນຳເອົາຄວາມຮູ້ ແລະ ບົດຮຽນອັນດີໄປພັດທະນາ ປະເທດຊາດ.

ນອກຈາກນີ້, ຄະນະ ຍັງໄດ້ຢ້ຽມຢາມພື້ນຖານປະຫວັດສາດ, ເສດຖະກິດ-ວັດທະນະທໍາ ຈຳນວນໜຶ່ງ ຂອງຣັດເຊຍ ຕື່ມອີກ.